ທ່ານ ນາງ ອັງເກລາ ແມເຄິລ ເຂົ້າຮັບລາງວັນເຊີດຊູກຽດສູງສຸດຂອງເຢຍລະມັນ

ທ່ານ ນາງ ອັງເກລາ ແມເຄິລ ອະດີດນາຍົກລັດຖະມົນຕີຂອງເຢຍລະມັນ ເຂົ້າຮັບລາງວັນເຊີດຊູກຽດສູງສຸດຂອງປະເທດ “Order of Marit” ຈາກທ່ານ ຟຣັງ-ວັລເທີ ຊໄຕໄມເອີ ປະທານາທິບໍດີເຢຍລະມັນ ຢູ່ທໍານຽບປະທານາທິບໍດີໃນນະຄອນຫລວງເບີລິນ ເມືອງຫລວງຂອງເຢຍລະມັນ ໃນວັນທີ 17 ເມສາ ຖືເປັນນາຍົກລັດຖະມົນຕີຄົນທີ 3 ຂອງເຢຍລະມັນທີ່ໄດ້ຮັບລາງວັນອັນຊົງກຽດນີ້ ຕໍ່ຈາກທ່ານ ຄອນຣາດ ອາເດິເນົາເອີ ແລະ ທ່ານ ເຮລມຸດ ໂຄລ.

ນາງ ແມເຄິລ ເຈົ້າຂອງສາຍາ “ນາຍົກຍິງເຫລັກແຫ່ງເຢຍລະມັນ” ກຸມບັນລັງບໍລິຫານປະເທດມາຍາວນານກວ່າ 16 ປີ ນັບແຕ່ທ້າຍປີ 2005-2021 ອີກທັງຍັງດໍາລົງຕໍາແໜ່ງຜູ້ນໍາພັກຄຣິສຕຽນເດໂມເຄຣຕິກຢູນຽນ (CDU) ນັບແຕ່ປີ 2000-2018 ຖືເປັນໜຶ່ງໃນຜູ້ນໍາປະເທດທີ່ດໍາລົງຕໍາແໜ່ງຍາວນານທີ່ສຸດໃນປະຫວັດສາດການເມືອງເຢຍລະມັນ.

ໂດຍນາງ ແມເຄິລ ເປັນນາຍົກລັດຖະມົນຕີຍິງຄົນທໍາອິດ ແລະ ພຽງຄົນດຽວຂອງເຢຍລະມັນໃນປັດຈຸບັນ, ນາງມີບົດບາດສໍາຄັນຫລາຍໃນຖານະເສົາຫລັກຂອງສະຫະພາບເອີຣົບ ອີກທັງນາງຍັງໄດ້ຮັບການຈັດອັນດັບໃຫ້ເປັນ “ບຸກຄົນແຫ່ງປີ” (Person of the Year) ລວມທັງ “ຜູ້ຍິງທີ່ມີອິດທິພົນທີ່ສຸດໃນໂລກ” (Most Powerful Woman) ຫລາຍຄັ້ງໃນໄລຍະທີ່ນາງຍັງດໍາລົງຕໍາແໜ່ງຜູ້ນໍາຂອງເຢຍລະມັນ.

ການຕັດສິນໃຈກ້າວລົງຈາກຕໍາແໜ່ງຜູ້ນໍາປະເທດຂອງນາງໃນປີ 2021 ສົ່ງຜົນໃຫ້ຫລາຍຝ່າຍກັງວົນເຖິງຄວາມໝັ້ນຄົງ ແລະ ສະຖຽນລະພາບຂອງສະຫະພາບເອີຣົບໃນຍຸກຫລັງນາງ ແມເຄິລ ເຊິ່ງທ່ານ ໂອລາບ ໂຊລ ນາຍົກລັດຖະມົນຕີເຢຍລະມັນ ທີ່ກ້າວຂຶ້ນມາຮັບໜ້າທີ່ຕໍ່ຈາກນາງ ມັກໄດ້ຮັບສຽງວິພາກວິຈານວ່າເປັນຜູ້ນໍາເຢຍລະມັນທີ່ອາດຈະບໍ່ໄດ້ແຂງແກ່ນ ແລະ ເດັດຂາດເທົ່ານາງ ແມເຄິລ.

ເຖິງຢ່າງໃດກໍຕາມ, ພັກຝ່າຍຄ້ານຂອງເຢຍລະມັນ ຫລື ສະມາຊິກພັກ CDU ບາງສ່ວນ ຍັງຕັ້ງຄໍາຖາມເຖິງຜົນງານ ແລະ ມໍລະດົກທີ່ນາງ ແມເຄິລ ປະໄວ້ ບໍ່ວ່າຈະເປັນການລົ້ມເຫລວໃນການຢັບຢັ້ງການເກີດສົງຄາມຣັດເຊຍ-ອູແກຣນ, ການຕັດສິນໃຈຢຸດການໃຊ້ພະລັງງານນິວເຄຼຍຂອງເຢຍລະມັນ ລວມທັງການເປີດຊາຍແດນປະເທດຮັບບັນດາຜູ້ລີ້ໄພຄັ້ງໃຫຍ່ໃນປີ 2015 ເຊິ່ງທັງໝົດລ້ວນສ້າງຜົນກະທົບຈໍານວນຫລາຍຕາມມາ ທັງຕໍ່ເຢຍລະມັນ ລວມທັງວົງກວ້າງໃນປະຊາຄົມໂລກ.

ອ້າງອີງ:

https://news.yahoo.com/angela-merkels-own-party-questions…

https://www.independent.co.uk/…/angela-merkel-germany…

https://news.yahoo.com/ex-leader-merkel-decorated-highest…