ການາຢືນຢັນພົບ “ຍຸງພາຫະ” ນໍາເຊື້ອພະຍາດມາລາເຣຍຊະນິດໃໝ່ເປັນຄັ້ງທໍາອິດ

ວັນທີ 15 ເມສາ, ສໍານັກງານບໍລິການສາທາລະນະສຸກການາ (GHS) ຢືນຢັນເປັນຄັ້ງທໍາອິດວ່າ: ຍຸງກົ້ນຊີ້ສະເຕຟານຊີ (Anopheles stephensi) ເປັນຍຸງພາຫະນໍາເຊື້ອມາລາເຣຍຊະນິດໃໝ່.

ສໍານັກງານບໍລິການສາທາລະນະສຸກການາ ໄດ້ປະກາດເລື່ອງນີ້ໃນການຖະແຫລງຂ່າວ, ພ້ອມລະບຸວ່າ: ສາຍພັນຂອງຍຸງດັ່ງກ່າວໄດ້ລະຫວ່າງການເຝົ້າລະວັງພະຍາດມາລາເຣຍທົ່ວປະເທດ.

ສໍານັກງານດັ່ງກ່າວອະທິບາຍວ່າ: ຍຸງກົ້ນຊີ້ສະເຕຟານຊີເປັນຍຸງພາຫະທີ່ມີລັກສະນະສະເພາະ, ຂະຫຍາຍພັນໃນອ່າງນໍ້າ, ໜອງນໍ້າ ແລະ ແຫລ່ງເພາະພັນດັ້ງເດີມທັງໝົດຂອງຍຸງກົ້ນຊີ້ທົ່ວໄປ, ແຕ່ຍຸງກົ້ນຊີ້ສະເຕຟານຊີຢູ່ລອດໄດ້ໃນອຸນຫະພູມສູງຊ່ວງລະດູແລ້ງ ເຊິ່ງເປັນຊ່ວງການແພ່ກະຈາຍຂອງເຊື້ອມາລາເຣຍຈະຫລຸດລົງ. ພ້ອມກ່າວວ່າ: ໄດ້ຈັດຕັ້ງໜ່ວຍງານເພື່ອໃຫ້ຄໍາແນະນໍາ ແລະ ປະສານງານເພື່ອການຄວບຄຸມພະຍາດໃນປະເທດ.

ຂໍ້ມູນຈາກອົງການອະນາໄມໂລກ (WHO) ລະບຸວ່າ: ຍຸງກົ້ນຊີ້ສະເຕຟານຊີມີຖິ່ນກໍາເນີດບາງພື້ນທີ່ຂອງອາຊີໃຕ້ ແລະ ແຫລມອາຣັບ ໂດຍກວດພົບໃນ 5 ປະເທດໃນອາຟຣິກາຊ່ວງ 10 ປີຜ່ານມາ.

ທັງນີ້, ໃນວັນທີ 13 ເມສາ, ອົງການອາຫານ ແລະ ຢາຂອງການາ ປະກາດວ່າຕົນໄດ້ຮັບການອະນຸມັດໃຫ້ໃຊ້ວັກຊີນປ້ອງກັນພະຍາດມາລາເຣຍອາຣ21 (R21) ຂອງມະຫາວິທະຍາໄລອ໊ອກຟອດ ເພື່ອປ້ອງກັນເດັກອາຍຸ 5-36 ເດືອນຈາກພະຍາດຮ້າຍແຮງດັ່ງກ່າວແລ້ວ.