ນາຍົກລັດຖະມົນຕີຍີ່ປຸ່ນໃຫ້ຄຳໝັ້ນຮັກສາຄວາມປອດໄພຜູ້ນຳ G7 ຂັ້ນສູງສຸດ ຫລັງເກີດເຫດລະເບີດລະຫວ່າງຫາສຽງ
ນາຍົກລັດຖະມົນຕີ ຟູມິໂອະ ຄິຊິດະ ຂອງຍີ່ປຸ່ນ ໃຫ້ຄໍາໝັ້ນວ່າ: ຈະປົກປ້ອງຜູ້ນໍາໂລກໃຫ້ປອດໄພໃນລະຫວ່າງກອງປະຊຸມ G7 ທີ່ຍີ່ປຸ່ນເປັນເຈົ້າພາບ ເຊິ່ງມີກຳນົດຈະຈັດຂຶ້ນໃນເດືອນໜ້າ. ຄໍາຖະແຫລງຂອງທ່ານ ຄິຊິດະ ມີຂຶ້ນ 1 ວັນຫລັງຈາກທ່ານຖືກຜູ້ຊາຍຄົນໜຶ່ງພະຍາຍາມດຶກລະເບີດຄວັນເຂົ້າໃສ່ລະຫວ່າງການປາໄສຫາສຽງຢູ່ວາກາຢາມະ.
“ຍີ່ປຸ່ນທົ່ວປະເທດຕ້ອງພະຍາຍາມຢ່າງເຕັມສ່ວນ ເພື່ອຮັກສາຄວາມປອດໄພສູງສຸດໃນໄລຍະການຈັດກອງປະຊຸມສຸດຍອດຢູ່ຮິໂຣຊິມະໃນເດືອນໜ້າ ແລະ ກອງປະຊຸມອື່ນໆ ທີ່ຈະມີບຸກຄົນສໍາຄັນຈາກທົ່ວໂລກມາລວມກັນ” ທ່ານ ຄິຊິດະ ກ່າວໃນວັນທີ 16 ເມສາ 2023.
ໃນວັນທີ 15 ເມສາ 2023 ຜ່ານມາ, ທ່ານ ຄິຊິດະ ຕ້ອງຢຸດປາໄສກະທັນຫັນ ເນື່ອງຈາກມີການດຶກວັດຖຸລະເບີດຂະໜາດນ້ອຍເຂົ້າໃສ່ລະຫວ່າງທ່ານທ່ານກໍາລັງຫາສຽງສະໜັບສະໜູນໃຫ້ຜູ້ສະໝັກຮັບເລືອກຕັ້ງຂອງພັກເສລີປະຊາທິປະໄຕ (LDP) ຢູ່ວາກາຢາມະ.
ເຖິງວ່າທ່ານ ຄິຊິດະ ຈະຖືກພາຫລົບໜີອອກຈາກຈຸດເກີດເຫດຢ່າງປອດໄພໂດຍບໍ່ໄດ້ຮັບບາດເຈັບ, ແຕ່ເຫດການດັ່ງກ່າວເຮັດໃຫ້ເກີດແຮງສັ່ນສະເທືອນໄປທົ່ວປະເທດ ແລະ ຖືກນໍາເອົາມາປຽບທຽບໃສ່ເຫດການລອບສັງຫານອະດີດນາຍົກລັດຖະມົນຕີ ຊິນໂຊ ອາເບະ ເຊິ່ງຖືກຍິງລະຫວ່າງການປາໄສຫາສຽງໃນເມືອງນາຣາ ທາງຕາເວັນຕົກຂອງປະເທດ ໃນເດືອນກໍລະກົດປີຜ່ານມາ.
