ວັນທີ 11-15 ເມສາ 2023 ການສັນຈອນຢູ່ເມືອງນາຊາຍທອງມີຄວາມຄ່ອງຕົວດີ ນັກຂັບຂີ່ເອົາໃຈໃສ່ປະຕິບັດກົດລະບຽບຈະລາຈອນຢ່າງເຂັ້ມງວດ
ທ່ານ ພັຕ ວຽງສະຫວັນ ກິດຕິສັກ ຮອງກອງຮ້ອຍຕໍາຫລວດຈະລາຈອນເມືອງນາຊາຍທອງ ໃຫ້ຮູ້ວ່າ: ໃນໄລຍະການສະເຫລີມສະຫລອງບຸນປີໃໝ່ລາວ ພສ 2566, ກໍາລັງຕໍາຫລວດຈະລາຈອນ ປກສ ເມືອງນາຊາຍທອງໄດ້ສົມທົບກັບພະແນກຕໍາຫລວດຈະລາຈອນນະຄອນຫລວງວຽງຈັນ ໄດ້ລົງອໍານວຍຄວາມສະດວກລະບາຍການສັນຈອນຢູ່ເສັ້ນທາງເລກທີ 13 ເໜືອ ເຂດບ້ານນາດີທີ່ເປັນຊາຍແດນເຊື່ອມຕໍ່ກັບແຂວງວຽງຈັນ.
ຜ່ານການຈັດຕັ້ງປະຕິບັດແຕ່ວັນທີ 11-15 ເມສາ 2023 ຂອງການສະເຫຼີມສະຫຼອງບຸນປີໃໝ່ລາວ ເຫັນວ່າ: ສະພາບການສັນຈອນ ມີຄວາມຄ່ອງຕົວດີ, ນັກຂັບຂີ່ກໍເອົາໃຈໃສ່ປະຕິບັດກົດລະບຽບຈະລາຈອນຢ່າງເຂັ້ມງວດ. ຄຽງຄູ່ກັນນັ້ນກໍຍັງພົບເຫັນຜູ້ລະເມີດ ຈໍານວນ 80 ຄົນ ສ່ວນຫຼາຍແມ່ນນັກຂັບຂີ່ລົດຈັກ ແລະ ເຈົ້າໜ້າທີ່ກໍໄດ້ສຶກສາອົບຮົມ ພ້ອມທັງໄດ້ເນັ້ນໃຫ້ເອົາໃຈໃສ່ປະຕິບັດກົດຈະລາຈອນຢ່າງເຂັ້ມງວດ.
ໂອກາດດັ່ງກ່າວ, ທ່ານຍັງໄດ້ຮຽກຮ້ອງໃຫ້ນັກຂັບຂີ່ ມີສະຕິໃນການໃຊ້ລົດໃຊ້ຖະໜົນ, ຫ້າມແລ່ນລົດໄວເກີນກໍານົດ, ຫ້າມດືມສິ່ງມຶນເມົາແລ້ວຂັບຂີ່ລົດ ແລະພ້ອມກັນປະຕິບັດກົດຈະລາຈອນທາງບົກ ເພື່ອຫຼີກລ່ຽງການເກີດອຸບັດຕິເຫດ.
