ປະທານປະເທດພ້ອມດ້ວຍການນໍານະຄອນຫລວງວຽງຈັນ ເຂົ້າຮ່ວມ ພິທີອັງເຊີນພຣະພຸດທະຮູບລົງຫົດສົງ ໂອກາດປີໃໝ່ລາວ

ສໍາລັບການສະເຫລີມສະຫລອງປີໃໝ່ລາວ ທີ່ນະຄອນຫລວງວຽງຈັນປີນີ້ ຈັດຂຶ້ນເປັນເວລາ 3ວັນ ຄືແຕ່ ວັນທີ 14-15 -16 ເມສາ 2023 ພາຍໃຕ້ຄໍາຂວັນ ສະຫລອງປີໃໝ່ລາວ ກ້າວສູ່ເມືອງວັດທະນະທໍາອາຊຽນ.

ເພື່ອໃຫ້ຮັກສາໄດ້ປະເພນີອັນດີງາມຂອງຊາດ, ມີບັນຍາກາດເບີກບາມມ່ວນຊື່ນ, ຮັກສາໄດ້ຄວາມສະຫງົບປອດໄພ, ຄວາມເປັນລະບຽບຮຽບຮ້ອຍ ແລະສະອາດຈົບງາມ ຕາມນາມມະຍົດເມືອງທ່ອງທ່ຽວສະອາດອາຊຽນ ເຊິ່ງຢູ່ຕາມວັດວາອາຮາມແຫ່ງຕ່າງໆ ໂດຍກໍານົດເອົາເຂດຄຸ້ມເມືອງເກົ່າວັດຈັນ ເມືອງຈັນທະບູລີ ຈັດ 2 ກິດຈະກໍາຄື : ກິດຈະກໍາທາງສາສະໜາ ໂດຍໄດ້ອັງເຊີນພະພຸດທະຮູບລົງຫົດສົງ, ຂະບວນແຫ່ພຣະພຸດທະຮູບມິ່ງເມືອງ,

ນອກນັ້ນຢູ່ຕາມວັດຕ່າງໆຍັງມີພິທີໃສ່ບາດ, , ຕົບພະທາດຊາຍ, ແລະກິດຈະກໍາທ່ອງທ່ຽວຢູ່ຖະໜົນເສດຖາທິລາດ ສະເພາະວັນທີ 14 ເມສາ ເລີ່ມແຕ່ເວລາ 12ໂມງ 30 ນາທີເປັນຕົ້ນໄປ ທີ່ວັດອິນແປງ ນະຄອນຫລວງວຽງຈັນ ໄດ້ອັງເຊີນພະພຸດທະຮູບລົງຫົດສົງ ແລະພິທີແຫ່ພຣະພຸດທະຮູບມິ່ງເມືອງ ຈາກວັດອິນແປງໄປຕາມຖະໜົນເສດຖາທິລາດ ຫານໍ້າພຸ ແລ້ວຂຶ້ນໄປທາງແຄມຂອງ ກັບຄືນຫາວັດອິນແປງ.

ສ່ວນວັນທີ 15 ແລະ16 ເມສາ ມວນຊົນທົ່ວໄປ ລວມທັງນັກທ່ອງທ່ຽວແມ່ນຫົດສົງພຣະພຸດທະຮູບຕາມວັດຕ່າງໆ ຕາມຮີດຄອງປະເພນີອັນດີງາມຂອງລາວ.

ໂດຍ: ຄໍາກອງ