ຄະດີຂ້າກັນຕາຍພວມທ້າທາຍຕໍາຫຼວດລາວ
ໂດຍ: ທິດກໍ່າ
ເທົ່າທີ່ທິດກໍ່າໄດ້ຕິດຕາມສະພາບສັງຄົມຢູ່ບ້ານເຮົາໃນປັດຈຸບັນ ຖ້າເບິ່ງໃນແງ່ບວກກໍເຫັນວ່າມີຄວາມສະຫງົບໂດຍພື້ນຖານ, ແຕ່ວ່າຖ້າຫາກເບິ່ງໃນແງ່ລົບ ໂດຍນໍາເອົາເຫດການຕ່າງໆກິໆກີໆໃນທົ່ວປະເທດໃນແຕ່ລະວັນ, ແຕ່ລະອາທິດ ແລະ ໃນແຕ່ລະເດືອນມາວັດກັນກໍຈະເຫັນໄດ້ວ່າຍັງມີຫຼາຍປາກົດການຫຍໍ້ທໍ້ທີ່ພວກເຮົາຈະຕ້ອງໄດ້ພ້ອມກັນແກ້ໄຂ. ນອກຈາກປາກົດການທີ່ພົ້ນເດັ່ນໃນເລື່ອງຢາເສບຕິດແລ້ວ ກໍແມ່ນການຄາດຕະກໍາຂ້າກັນຕາຍຍິງກັນຕາຍຢ່າງໜ້າອະໜາດ ແລະ ໜ້າສົມເພດເວດທະນາ. ດັ່ງເຫດການທີ່ເກີດຂຶ້ນຢູ່ແຖວອຸດົມໄຊ, ບໍລິຄໍາໄຊ, ຢູ່ບັນດາແຂວງອື່ນໆ ແລະ ຢູ່ນະຄອນຫຼວງຂອງພວກເຮົາໃນໄລຍະຜ່ານມາ ກໍຄືໄລຍະປັດຈຸບັນນີ້ເອງ. ອັນທີ່ສົດໆຮ້ອນໆກໍແມ່ນເຫດການຍິງກັນຕາຍໃນຕອນເຊົ້າວັນທີ 1 ກັນຍາ 2017 ຢູ່ບ້ານສາລາຄໍາ ເມືອງຫາດຊາຍຟອງ ນະຄອນຫຼວງວຽງຈັນ ຈົນເຮັດໃຫ້ມີຜູ້ຍິງ 2 ຄົນຕາຍຟູມເລືອດຢູ່ຄາເຮືອນ ເຊິ່ງຜູ້ໜຶ່ງແມ່ນນາງ ຈັນທະວີ ລາດສະວົງສິງ ຜູ້ເປັນເຈົ້າຂອງເຮືອນ ແລະ ນາງ ໂມະ ທີ່ເປັນແມ່ເຮືອນ.
ເວົ້າເລື່ອງປາກົດການຫຍໍ້ທໍ້ໃນບ້ານເຮົາໄລຍະຜ່ານມາ ຄືໃນເດືອນກໍລະກົດແລ້ວນີ້, ທິດກໍ່າກໍໄດ້ຂຽນບົດໜຶ່ງທີ່ຍົກເອົາສອງເຫດການເດັ່ນໆມາເວົ້າ ເປັນຕົ້ນອັນທີໜຶ່ງແມ່ນບັນຫາການສໍ້ລາດບັງຫຼວງຢ່າງໜັກໜ່ວງ ແລະ ແຜ່ລາມຢູ່ບ້ານເຮົາ ຈົນເຮັດໃຫ້ພາກລັດຕ້ອງເສຍຜົນປະໂຫຍດຢ່າງມະຫາສານ, ພະນັກງານທີ່ປະຕິບັດຢູ່ຂອບເຂດຊົນນະບົດສອກຫຼີກຫ່າງໄກພາກັນໄດ້ເງິນເດືອນຊ້າເປັນຕັ້ງວ່າສາມສີ່ເດືອນ ແລະ ບັນຫາອື່ນໆຕາມມາ. ອັນທີສອງແມ່ນຢາເສບຕິດລາມໄປຮອດການຕາມລ່າຂ້າຟັນລັນແທງກັນ ອັນເປັນການກໍ່ຄວາມບໍ່ສະຫງົບໃນສົງຄົມບ້ານເມືອງ ແລະ ທັງເປັນການທ້າທາຍເຈົ້າໜ້າທີ່ຕໍາຫຼວດທີ່ມີໜ້າທີ່ຮັບຜິດຊອບໂດຍກົງ. ມາຮອດໄລຍະປັດຈຸບັນ, ຕາມທີ່ທິດກໍ່າເຫັນສະພາບຄວາມເປັນຈິງຂອງບັນຫາການສໍ້ລາດບັງຫຼວງກໍເຫັນໄດ້ວ່າມັນຄ່ອຍຫຼຸດໜ້ອຍຖອຍລົງ ແລະ ມະຫັບມະຫາຍໄປຈາກສັງຄົມລາວໄປແດ່ແລ້ວ. ອັນນີ້ມັນກໍເນື່ອງມາຈາກຫຼາຍປັດໄຈ ແລະ ຫຼາຍສາເຫດ, ແຕ່ວ່າອັນຕົ້ນຕໍນັ້ນມັນກໍແມ່ນເນື່ອງມາຈາກພັກ ແລະ ລັດຖະບານເຮົາໄດ້ສຸມໃສ່ເອົາຈິງເອົາຈັງກ່ຽວກັບການໃຊ້ມາດຕະການຕ່າງໆໃນການປາບປາມການສໍ້ລາດບັງຫຼວງມັນຈຶ່ງໄດ້ເປັນຮູບປະທໍາຂຶ້ນມາ. ສ່ວນວ່າບັນຫາຢາເສບຕິດ ເຊິ່ງເປັນໜໍ່ແໜງ ແລະ ເປັນຕົ້ນເຫດຂອງການກໍ່ອາດຊະຍາກໍາຕ່າງໆພາຍໃນຊາດ ເປັນຕົ້ນວ່າລັກໝົກຈົກຫໍ່, ປຸ້ນຈີ້ຊິງຊັບ, ຍິງກັນຕາຍຂ້າກັນຕາຍ ຫຼື ດ້ວຍການກະທໍາໃນຮູບແບບອື່ນໆ ສ່ວນຫຼາຍກໍເປັນສາຍໄຍມາຈາກຢາເສບຕິດກັນທັງນັ້ນ.
ຕາມທິດກໍ່າວ່າ, ຈົນມາຮອດປັດຈຸບັນ ບັນຫາຢາເສບຕິດກໍຍັງບໍ່ທັນມີວີ່ແວວວ່າຈະຫຼຸດໜ້ອຍຖອຍລົງ, ສ່ວນທາງເບື້ອງເຈົ້າໜ້າທີ່ເຮົາເພິ່ນກໍໄດ້ມີການມ້າງກຸ່ມແກ້ງລາຍໃຫຍ່ລາຍນ້ອຍຢ່າງລຽນຕິດ, ແຕ່ກໍເຫັນວ່າປາບໄດ້ຢູ່ບ່ອນນີ້ພັດໄປໂປໂລຢູ່ບ່ອນອື່ນຢ່າງບໍ່ມີອັນຊິ້ນສຸດ. ສໍາລັບເຫດການຍິງກັນຕາຍຢູ່ບ້ານສາລາຄໍາຈະມີການພົວພັນເຖິງຢາເສບຕິດ ຫຼື ບໍ່ນັ້ນກໍຍັງບໍ່ທັນຮູ້ຢ່າງຈະແຈ້ງ, ແຕ່ສິ່ງທີ່ຢືນຢັນຢ່າງຄັກແນ່ນັ້ນບໍ່ແມ່ນຍ້ອນການຊິງຊັບແຕ່ປະການໃດ ວ່າຊັ້ນ ! ນີ້ແມ່ນຜ່ານການສັນນະສູດໃນຂັ້ນຕົ້ນຈາກເຈົ້າໜ້າທີ່ຕໍາຫຼວດນະຄອນຫຼວງ. ຄືດັ່ງພວກເຮົາຮູ້ນໍາກັນລ້ວວ່າ, ການຍິງກັນຕາຍຂ້າກັນຕາຍແບບສະຫຍອງຂວັນເປັນການທໍາລາຍຄວາມສະຫງົບ ແລະ ຄວາມໝັ້ນຄົງຂອງຊາດຢ່າງໃຫຍ່ຫຼວງ ແລະ ມັນກໍເປັນການທໍາລາຍຊີວິດອິນຊີຂອງມະນຸດຕາດໍາໆດ້ວຍກັນຢ່າງໄຮ້ມະນຸດສະທໍາ, ຊ້ຳບໍ່ໜຳໃນບາງກໍລະນີ ຜູ້ບໍລິສຸດກໍຕ້ອງໄດ້ກາຍເປັນເປົ້າແຫ່ງຄວາມໂຫດຫ້ຽມຂອງພວກໂຈນໃຈດໍາອໍາມະຫິດທີ່ຂ້າຢ່າງບໍ່ເລືອກໜ້າ.
ເຖິງຢ່າງໃດກໍດີ, ຕາມທິດກໍ່າວ່າ ຕໍ່ບັນຫາດັ່ງກ່າວນອກຈາກກໍ່ຄວາມບໍ່ສະຫງົບຢູ່ໃນສັງຄົມບ້ານເມືອງແລ້ວ ຍັງເປັນການທ້າທາຍຕໍາຫຼວດລາວທີ່ເຮັດໜ້າທີ່ປ້ອງກັນຄວາມສະຫງົບໂດຍກົງໃນສັງຄົມປັດຈຸບັນ. ເຖິງວ່າພວກມັນຈະກະທໍາໃນສິ່ງທີ່ບໍ່ດີ ແລະ ເປື້ອນເລືອດໃນຊົ່ວພິບຕາດຽວໄດ້ໃນເວລາທີ່ມີຊ່ອງຫວ່າງ ແລະ ຊ່ອງໂຫວ່ ແຕ່ບໍ່ໄວກໍຊ້າພວກໂຈນເຫຼົ່ານີ້ຕ້ອງໄດ້ມາຮັບໂທດຢ່າງສາສົມ ເພາະວ່າເທົ່າທີ່ທິດກໍ່າເຄີຍເຫັນຜ່ານມາຄວາມຈິງມັນກໍຕ້ອງພິສູດດ້ວຍຄວາມຈິງ, ບາບມັນບໍ່ເຄີຍຊະນະບຸນ ຖ້າບໍ່ທັນຢາກຕາຍຢ່າມາທ້າທາຍຕໍາຫຼວດລາວ.
