IMF ຫລຸດການຄາດຄະເນເສດຖະກິດໂລກປີນີ້ຢູ່ລະດັບ 2,8% ທໍາລາຍສະຖິຕິເຕີບໃຫຍ່ຕໍ່າທີ່ສຸດໃນຮອບ 30 ປີ

ກອງທຶນການເງິນສາກົນ (IMF) ເປີດເຜີຍລາຍງານທ່າອ່ຽງເສດຖະກິດໂລກ (World Economic Outlook) ໃນວັນທີ 11 ເມສາຜ່ານມາ ໂດຍຄາດຄະເນວ່າການເຕີບໃຫຍ່ຂອງເສດຖະກິດໂລກໃນປີນີ້ຈະຫລຸດລົງມາຢູ່ພຽງ 2,8% ຫລຸດລົງຈາກການຄາດຄະເນໃນເດືອນມັງກອນທີ່ຢູ່ລະດັບ 2,9%. ຂະນະທີ່ການຂະຫຍາຍຕົວຂອງເສດຖະກິດໂລກໃນໄລຍະ 5 ປີຕໍ່ໜ້າທີ່ຄາດວ່າຈະຢູ່ລະດັບ 3% ສົ່ງຜົນໃຫ້ການຂະຫຍາຍຕົວທາງເສດຖະກິດໃນປີນີ້ ແລະ ໄລຍະ 5 ປີຕໍ່ໜ້າ ສ້າງສະຖິຕິເປັນຕົວເລກຄາດຄະເນການຂະຫຍາຍຕົວຂອງເສດຖະກິດໂລກໃນໄລຍະກາງຕໍ່າສຸດໃນຮອບ 30 ກວ່າປີ ຫລື ນັບແຕ່ປີ 1990.

ສ່ວນການຄາດຄະເນການຂະຫຍາຍຕົວຂອງເສດຖະກິດໂລກໃນປີ 2024 ຈະເຕີບໃຫຍ່ໃນລະດັບ 3% ເຊິ່ງຫລຸດລົງຈາກການຄາດຄະເນກ່ອນໜ້ານີ້ 3,1%.

ສໍາລັບສາເຫດຕົ້ນຕໍທີ່ເຮັດໃຫ້ເສດຖະກິດໂລກຂະຫຍາຍຕົວຫລຸດລົງ, IMF ລະບຸວ່າ: ເປັນຜົນມາຈາກການທີ່ເສດຖະກິດໂລກໄດ້ຮັບຜົນກະທົບຈາກນະໂຍບາຍການເງິນທີ່ເຂັ້ມງວດເພື່ອສະກັດເງິນເຟີ້ຂອງທະນາຄານກາງຕ່າງໆ ບວກກັບບັນຫາສະຖຽນລະພາບໃນຂະແໜງການເງິນ, ການຂະຫຍາຍຕົວຊ້າຂອງຕະຫລາດແຮງງານ ແລະ ປັດໄຈຄວາມຂັດແຍ່ງດ້ານພູມສາດ ເຊິ່ງລວມທັງກໍລະນີຣັດເຊຍບຸກໂຈມຕີອູແກຣນ ແລະ ການແຍກຕົວຂອງອັງກິດອອກຈາກສະຫະພາບເອີຣົບ (Brexit).

ນອກຈາກນີ້, ທ່າອ່ຽງການເຕີບໃຫຍ່ທີ່ອ່ອນແອຍັງມີສ່ວນຈາກກໍລະນີເສດຖະກິດປະເທດກໍາລັງພັດທະນາຄືຈີນ ແລະ ສ.ເກົາຫລີ ເພີ່ມມາດຕະຖານການຄອງຊີບຂອງຕົນ.

ສ່ວນການເຕີບໃຫຍ່ຂອງປະເທດເສດຖະກິດທີ່ມີຂະໜາດໃຫຍ່ທີ່ສຸດໃນໂລກ ຄືອາເມລິກາໃນປີ 2023 IMF ຄາດວ່າເສດຖະກິດອາເມລິກາຈະຂະຫຍາຍຕົວ 1,6%. ຂະນະທີ່ເຂດໃຊ້ເງິນເອີໂຣຂະຫຍາຍຕົວ 0,8%, ສ່ວນອັງກິດຜະເຊີນສະພາບຫລຸດລົງ 0,3%.

ສ່ວນເສດຖະກິດໃນພາກພື້ນອາຊີຢູ່ໃນສະຖານະທີ່ຂ້ອນຂ້າງດີກວ່າເອີຣົບ ໂດຍ IMF ຄາດວ່າເສດຖະກິດຈີນຈະເຕີບໃຫຍ່ 5,2% ໃນປີນີ້, ຂະນະທີ່ອິນເດຍຂະຫຍາຍຕົວ 5,9% ແລະ ຣັດເຊຍຂະຫຍາຍຕົວ 0,7% ຫລັງຈາກຫລຸດລົງກວ່າ 2% ໃນປີ 2022.

ນອກຈາກນີ້, IMF ຍັງຄາດວ່າ: ອັດຕາເງິນເຟີ້ທົ່ວໄປ (Headline CPI) ເຊິ່ງລວມໝວດອາຫານ ແລະ ພະລັງງານ ຈະຫລຸດລົງສູ່ລະດັບ 7% ໃນປີນີ້ ຫລັງຈາກຢູ່ລະດັບ 8,7% ໃນປີ 2022 ຕາມການປັບລົງຂອງລາຄາພະລັງງານ ລວມທັງເບິ່ງວ່າອັດຕາເງິນເຟີ້ທົ່ວໄປບໍ່ອາດຈະກັບສູ່ລະດັບເປົ້າໝາຍກ່ອນປີ 2025.

ຂະນະດຽວກັນ, IMF ຍັງໄດ້ສະແດງຄວາມເຫັນລົງໃນລາຍງານວ່າ: ເສດຖະກິດໂລກໃນເວລານີ້ບໍ່ອາດຈະກັບມາໃນໄລຍະປານກາງເທົ່າກັບອັດຕາການເຕີບໃຫຍ່ທີ່ເກີດຂຶ້ນກ່ອນເກີດວິກິດໂຄວິດລະບາດ.

ອ້າງອີງ:

https://www.cnbc.com/…/imf-world-economic-outlook-april…