ຫລາຍຄຸນປະໂຫຍດຈາກບັນດາເຫັດ

   – ເຫັດຫູໜູ : ເປັນກຸ່ມຄາໂບໄຮເດຣດ ສາມາດເພີ່ມຄວາມແຂງແຮງໃຫ້ເມັດເລືອດຂາວໃນຜູ້ເຖົ້າ ເຮັດໃຫ້ພູມຕ້ານທານຮ່າງກາຍດີຂຶ້ນ ລວມທັງຊ່ວຍປິ່ນປົວພະຍາດກະເພາະອາຫານ ແລະ ລິດສີດວງ. ສ່ວນເຫັດຫູໜູຂາວຈະຊ່ວຍບຳລຸງປອດ ແລະ ໝາກໄຂ່ຫລັງ.

– ເຫັດຫລິນຈື : ມີສານສຳຄັນ ເບຕ້າກລູແຄນ ເຊິ່ງມີສັບພະຄຸນຕ້ານມະເຮັງ. ຄົນຍີ່ປຸ່ນມັກໃຊ້ຄູ່ກັບການປິ່ນປົວພະຍາດມະເຮັງ ແລະ ພະຍາດຜູ້ເຖົ້າ ເຊັ່ນ : ພະຍາດຫົວໃຈ, ພະຍາດຫລອດລົມອັກເສບຊ້ຳເຮື້ອ ແລະ ພະຍາດຄວາມດັນເລືອດສູງ. ປະຈຸບັນຍັງມີການນຳໄປເປັນສ່ວນປະສົມໃນເຄື່ອງສຳອາງນຳອີກ ເພາະມີສັບພະຄຸນຊ່ວຍຕ້ານອະນຸມູນອິດສະລະ, ຂັດຂວາງການເຕີບໃຫຍ່ຂອງຊີ້ນຮ້າຍ ລວມທັງກະຕຸ້ນພູມຕ້ານທານໄວຣັສ.

– ເຫັດກະດຸມ ຫລື ເຫັດແຊມປີຢອງ : ຮູບຮ່າງມົນກົມຄ້າຍຄືກະດຸມທີ່ມີຂະໜາດໃຫຍ່, ຜິວກ້ຽງນຽນ, ມີໃຫ້ເລືອກທັງຊະນິດສົດ ຫລື ບັນຈຸກະປ໋ອງ, ມີບົດບາດໃນການປິ່ນປົວ ແລະ ປ້ອງກັນການເກີດມະເຮັງເຕົ້ານົມຫລາຍທີ່ສຸດ ໂດຍສານບາງຢ່າງໃນເຫັດນີ້ໄປຊ່ວຍຂັດຂວາງເອັນໄຊອະໂຣມາເຕສ (aromatase) ເຮັດໃຫ້ເກີດການຂັດຂວາງການປ່ຽນຮໍໂມນເອນໂດຣເຈນເປັນຮໍໂມນເອສໂຕຣເຈນໃນແມ່ຍິງໄວໝົດປະຈຳເດືອນ ເມື່ອຮ່າງກາຍຜະລິດຮໍໂມນເອສໂຕຣເຈນໄດ້ໜ້ອຍລົງ ກໍຫລຸດໂອກາດການຈະເລີນເຕີບໃຫຍ່ຂອງແຊນມະເຮັງເຕົ້ານົມໃຫ້ໜ້ອຍລົງໄປນຳ.

– ເຫັດນາງລົມ, ເຫັດນາງຟ້າ ແລະ ເຫັດເປົາຮື້ : ເຫັດ 3 ຊະນິດນີ້ຢູ່ຕະກູນດຽວກັນ ຈະເລີນເຕີບໃຫຍ່ເປັນຊໍ່ໆ, ເຫັດນາງລົມມີສີຂາວປົນຂີ້ເທົ່າ, ເຫັດນາງຟ້າມີສີຂາວປົນນຳ້ຕານ. ຂະນະທີ່ເຫັດເປົາຮື້ຈະມີສີຄ້ຳ ແລະ ຊີ້ນໜຽວໜາ ແລະ ນຸ້ມຄ້າຍຄືຊີ້ນສັດຫລາຍກ່ວາ ເຊື່ອວ່າສາມາດປ້ອງກັນພະຍາດຫວັດ ຊ່ວຍການໄຫລວຽນເລືອດ ແລະ ປ້ອງກັນພະຍາດກະເພາະອາຫານໄດ້.

– ເຫັດເຟືອງ : ເປັນເຫັດຍອດນິຍົມຂອງຄົນລາວ ຫາຊື້ງ່າຍ ໃຫ້ວິຕາມິນເຊຫລາຍ ແລະ ມີກົດອະມິໂນສຳຄັນຢູ່ຫລາຍຊະນິດ ຫາກກິນເປັນປະຈຳກໍຈະຊ່ວຍເສີມພູມຕ້ານທານການຕິດເຊື້ອຕ່າງໆອີກ ທັງຍັງຊ່ວຍຫລຸດຄວາມດັນເລືອດ  ແລະ ເລັ່ງການສະໝານບາດແຜໃຫ້ເຊົາໄວ.

– ເຫັດເຂັມ : ເປັນເຫັດສີຂາວຫົວນ້ອຍໆຂຶ້ນຕິດກັນເປັນແພ ລົດ ຊາດໜຽວນຸ້ມ ກິນເປັນປະຈຳຈະຊ່ວຍປິ່ນປົວພະຍາດຕັບ, ກະເພາະອາຫານ ແລະ ລຳໄສ້ອັກເສບຊ້ຳເຮື້ອໄດ້.

– ເຄັດລັບການເກັບຮັກສາເຫັດໄວ້ກິນດົນ : ເຫັດເປັນອາຫານທີ່ມີກາລໍຣີໜ້ອຍ, ມີໂປຣຕິນໜ້ອຍ ແລະ ເໝາະສົມກັບຄົນທີ່ກຳ ລັງຄວບຄຸມນ້ຳໜັກ, ແຕ່ເຫັດກໍຄືກັບພືດຊະນິດອື່ນໆ ເມື່ອຊື້ມາແລ້ວ ເກັບມ້ຽນໄວ້ໃນຕູ້ເຢັນຈະເຮັດໃຫ້ເຫັດຈະເລີນເຕີບໃຫຍ່ຕໍ່ ຈະມີການຖິ້ມສະປໍ ແລະ ຍ່ອຍສະຫລາຍໂຕເອງ ເຮັດໃຫ້ລົດຊາດປ່ຽນ ແລະ ເກັບມ້ຽນບໍ່ໄດ້ດົນ. ສຳລັບການເກັບມ້ຽນເຫັດທີ່ຖືກວິທີນັ້ນ ຈະຕ້ອງບໍ່ໃຫ້ເຫັດຖືກນ້ຳ ເພາະນ້ຳຈະເຮັດໃຫ້ເນົ່າໄວ, ຕັດຮາກ ແລະ ດິນອອກໃຫ້ໝົດ, ເອົາໃສ່ຖົງເຈ້ຍ ຫລື ຖົງປລາສະຕິກເຈາະຮູ ເພື່ອໃຫ້ອາຍນຳ້ລະເຫີຍອອກ ຮັດປາກຖົງ ເກັບມ້ຽນໃນຕູ້ເຢັນຊ່ອງທຳມະດາ ວິທີນີ້ຈະຮັກສາເຫັດໄວ້ໄດ້ດົນ 1 – 2 ມື້ ຍົກເວັ້ນເຫັດເຟືອງ ທີ່ເກັບມ້ຽນຂ້າມຄືນບໍ່ໄດ້. ສ່ວນການປຸງແຕ່ງເປັນອາຫານນັ້ນ ລະວັງໜ້ອຍດຽວວ່າຢ່າແຊ່ເຫັດຖິ້ມໄວ້ໃນນ້ຳ ເພາະຈະເຮັດໃຫ້ເຫັດອົມນ້ຳຈົນເບິ່ງບໍ່ເປັນຕາກິນ.