ປກສ ເມືອງໂຂງ ວາງ 14 ຂໍ້ຫ້າມ ໄລຍະບຸນປີໃໝ່ລາວ ພສ 2566 ຖ້າຜູ້ໃດລະເມີດຈະປະຕິບັດຕາມລະບຽບການ
ແຫລ່ງຂ່າວຈາກແຂວງຈຳປາສັກ ໃຫ້ຮູ້ວ່າ: ກອງບັນຊາການ ປກສ ເມືອງໂຂງ ແຂວງຈຳປາສັກ ໄດ້ວາງ 14 ຂໍ້ຫ້າມ ແລະ ມາດຕະການຕ່າງໆຕໍ່ຜູ້ລະເມີດ ໃນໄລຍະສະເຫລີມສະຫລອງບຸນປີໃໝ່ລາວ ພສ 2566 ເພື່ອຮັບປະກັນໃຫ້ສັງຄົມມີຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມປອດໄພ, ທັງເຮັດໃຫ້ການສະເຫລີມສະຫລອງບຸນດັ່ງກ່າວ ມີຄວາມສະຫງົບ, ເບີກບານມ່ວນຊື່ນ ແລະ ຖືກຕ້ອງຕາມຮີດຄອງປະເພນີອັນດີງາມຂອງລາວເຮົາ.
ທ່ານ ພັທ ສົມສະໜຸກ ພະໄຊສົມບັດ ຫົວໜ້າກອງບັນຊາການ ປກສ ເມືອງໂຂງ ໄດ້ໃຫ້ສຳພາດໃນທ້າຍອາທິດຜ່ານມາວ່າ: ກອງບັນຊາການ ປກສ ເມືອງໂຂງ ໄດ້ອອກແຈ້ງການ ກ່ຽວກັບການເພີ່ມທະວີຮັກ ສາຄວາມສະຫງົບ, ຄວາມເປັນລະບຽບຮຽບຮ້ອຍ ໃນໄລຍະສະເຫລີມສະຫລອງບຸນປີໃໝ່ລາວ ທີ່ໃກ້ຈະມາເຖິງນີ້ ໂດຍສະເພາະ ມາດຕະການ ແລະ ຂໍ້ຫ້າມຕ່າງໆ ເປັນຕົ້ນ ໃຫ້ບັນດາຫ້ອງການ, ກົມກອງອ້ອມຂ້າງເມືອງ, ກຳລັງ ປກສ 9 ກຸ່ມ ແລະ 3 ກຸ່ມບ້ານໃຫຍ່ ຕະຫລອດຮອດອຳນາດການປົກຄອງບ້ານ 114 ບ້ານໃນທົ່ວເມືອງ ໃຫ້ເອົາໃຈ ໃສ່ເພີ່ມທະວີວຽກງານປ້ອງກັນຄວາມສະຫງົບ ຄວາມເປັນລະບຽບຮຽບຮ້ອຍຂອງສັງຄົມ, ຕ້ານ ແລະ ສະກັດກັ້ນ ແກ້ໄຂປະການຫຍໍ້ທໍ້ທີ່ເກີດຂຶ້ນ ໃນຂອບເຂດຄວາມຮັບຜິດຊອບຂອງຕົນໃຫ້ໄດ້ດີ ແລະ ທັນກັບສະພາບການ, ເຊິ່ງ 14 ຂໍ້ຫ້າມປະກອບມີ:
- ຫ້າມປະຊາຊົນລາວຂ້າມໄປຫລິ້ນປີໃໝ່ ແລະ ນອນຄ້າງຄືນຢູ່ປະເທດກໍາປູເຈຍ ໂດຍບໍ່ ຖືກຕ້ອງຢ່າງເດັດຂາດ
- ຜູ້ຂັບຂີ່ລົດ, ເຮືອ-ບັກ ຕ້ອງເຄົາລົບ ແລະ ປະຕິບັດຕາມກົດລະບຽບຈາລະຈອນທາງບົກ ແລະ ທາງນໍ້າ
- ຫ້າມຜູ້ຂັບຂີ່ລົດດື່ມສິ່ງມຶນເມົາ (ເມົາຫ້າມຂັບຂີ່ລົດ) ຢ່າງເດັດຂາດ
- ຜູ້ຂັບຂີ່ເຮືອ-ບັກ ແລະ ຜູ້ໂດຍ ສານ ຕ້ອງໃສ່ເສື້ອຊູຊີບ ເພື່ອຮັບປະກັນຄວາມປອດໄພໃຫ້ແກ່ຜູ້ຂັບຂີ່ເຮືອ-ບັກ ແລະ ຜູ້ໂດຍສານ
- ຫ້າມຂັບຂີ່ ຍານພານະເກີນຄວາມໄວທີ່ກົດໝາຍ ແລະ ປ້າຍສັນຍານຈາລະຈອນກໍານົດໄວ້
- ຜູ້ຂັບຂີ່ລົດໃຫຍ່ ແລະ ຜູ້ໂດຍສານ ຕ້ອງຮັດສາຍແອວນິລະໄພ ເພື່ອຮັບປະກັນຄວາມປອດໄພໃຫ້ແກ່ຜູ້ຂັບຂີ່ ແລະ ຜູ້ໂດຍສານ
- ຫ້າມຜູ້ໂດຍ ສານນັ່ງ ຂອບກະບະລົດ, ນັ່ງຝາທ້າຍລົດ ແລະ ຫລັງຄາລົດ ໃນເວລາລົດກຳລັງສັນຈອນຢ່າງເດັດຂາດ
- ຫ້າມຂີ່ລົດຈັກເປັນ ພຶງ-ເປັນເເພ ກີດຂວາງການສັນຈອນຕາມເສັ້ນທາງຢ່າງເດັດຂາດ
- ຫ້າມໃຊ້ສິ່ງເປີະເປື້ອນ, ສາດນໍ້າສີ, ນໍ້າເປື້ອນ, ນໍ້າຄັນ, ແກ່ວງຖົງນໍ້າ, ແກ່ວງນ້ຳກ້ອນໃສ່ກັນ,
- ຫ້າມນຸ່ງເຄື່ອງໂປ້-ເປືອຍ ເຂົ້າວັດ ແລະ ສະຖານທີ່ຊຸມຊົນ
- ຫ້າມຕັ້ງຈຸດ ຕາມເສັ້ນທາງ ແລະ ຕັນທາງການສັນຈອນຂອງພາຫະນະ, ລັດຫົດນໍ້າຢູ່ຕາມເສັ້ນທາງ 13, ທາງຊອຍໃຫຍ່ເຂົ້າບ້ານ ແລະ ຈຸດທີ່ເຫັນວ່າມີຄວາມສ່ຽງຕໍ່ການເກີດອຸບັດຕິເຫດ
- ຫ້າມຈັດງານຄອນເສີດໃນບ້ານ, ວັດວາອາຮາມ, ສະຖານ ທີ່ສາທາລະນະ, ຕາມຫາດ-ແຄມນ້ຳຕ່າງໆ ທີ່ບໍ່ໄດ້ຮັບອະນຸຍາດ
- ຫ້າມຈູດໝາກກະໂພກ ແລະ ໃຊ້ສຽງດັງເກີນ ຂອບເຂດ
- ຫ້າມຈັດງານມ່ວນຊື່ນຕ່າງໆ ທີ່ເປັນການຫາລາຍໄດ້ ໂດຍບໍ່ໄດ້ຮັບອະນຸຍາດ ຈາກພາກສ່ວນທີ່ກ່ຽວຂ້ອງ ໂດຍເດັດຂາດ.
ທຸກການກະທຳທີ່ເປັນການລະເມີດທີ່ກ່າວມານັ້ນ, ດ້ວຍເຈດຕະນາ ແລະ ບໍ່ເຈດຕະນາ ລ້ວນແຕ່ຈະຖືກສຶກສາອົບຮົມ, ກ່າວເຕືອນ, ປັບໃໝຕາມສະຖານການລະເມີດ ຫລື ດຳເນີນຄະດີຕໍ່ຜູ້ລະເມີດຕາມລະບຽບການ.
