ກຳປູເຈຍເປີດຕົວເຂົ້າສາຍພັນໃໝ່ ຫລັງຈາກວິໄຈ ແລະ ພັດທະນາມາເກືອບທົດສະວັດ

ກະຊວງກະສິກໍາ, ປ່າໄມ້ ແລະ ປະມົງຂອງກໍາປູເຈຍ ເປີດຕົວເຂົ້າສາຍພັນໃໝ່ “ຊຳເປ ຊາ 70” (Champei Sar 70 – CPS 70) ຫລັງຈາກວິໄຈ ແລະ ພັດທະນາມາເກືອບທົດສະວັດ.

ລາຍງານລະບຸວ່າ: ເຂົ້າສາຍພັນໃໝ່ນີ້ເກີດຈາກການຮ່ວມມືລະຫວ່າງສະຖາບັນວິໄຈ ແລະ ພັດທະນາກະສິກໍາຂອງກໍາປູເຈຍ ແລະ ອົດສະຕຣາລີ ເຊິ່ງມີການສຶກສາມາ 9 ປີ ແລະ ທົດລອງປູກຊ່ວງລະດູແລ້ງ ແລະ ລະດູຝົນ 80 ກວ່າຄັ້ງ.

CPS 70 ໄດ້ຮັບການພັດທະນາຈາກພັນເຂົ້າຂອງກໍາປູເຈຍທີ່ໄດ້ຮັບລາງວັນ ຄືເຂົ້າຫອມຜະກາລໍາດວນ (Phka Rumduol) ກັບ Cni9024 ໂດຍ CPS 70 ເປັນເຂົ້າທີ່ສຸກຮວງພາຍໃນໄລຍະເວລາ 3 ເດືອນ.

ທັງນີ້, ເຂົ້າຫອມເປັນທີ່ຕ້ອງການສູງທົ່ວໂລກ ແລະ ກວມອັດຕາສ່ວນຫລາຍກວ່າ 60% ຂອງການສົ່ງອອກເຂົ້າທັງໝົດຂອງກໍາປູເຈຍ ໂດຍກໍາປູເຈຍຕັ້ງເປົ້າໝາຍສົ່ງອອກເຂົ້າ 1 ລ້ານໂຕນພາຍໃນປີ 2025.

ກະສິກໍາເປັນໜຶ່ງໃນເສົາຫລັກຄໍ້າຈູນເສດຖະກິດກໍາປູເຈຍ ມີສ່ວນສົ່ງເສີມລວມຍອດຜະລິດຕະພັນພາຍໃນ (GDP) ທັງໝົດເກືອບ 1 ໃນ 4 ໃນປີ 2021 ໂດຍຂະແໜງກະສິກໍາຈ້າງວຽກແຮງງານກໍາປູເຈຍຫລາຍກວ່າ 1 ໃນ 3 ເຊິ່ງຫລາຍກວ່າເຄິ່ງໜຶ່ງເປັນຜູ້ຍິງ.