ປີ 2022 ສປປ ລາວ ມີຜູ້ຖືກເຄາະຮ້າຍຈາກອຸບັດຕິເຫດລະເບີດບໍ່ທັນແຕກ 20 ຄົນ ແລະ ເສຍຊີວິດ 5 ຄົນ

ກອງປະຊຸມສະຫລຸບການຈັດຕັ້ງປະຕິບັດວຽກງານແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ປີ 2022 ແລະ ທິດທາງແຜນການ 2023, ໂດຍການເປັນປະທານ ຂອງ ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ປະທານຄະນະກໍາມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ.

ສປປ ລາວ ເປັນປະເທດທີ່ໄດ້ຮັບຜົນກະທົບຈາກລະເບີດບໍ່ທັນແຕກ ທີ່ຕົກຄ້າງ ຫລາຍກວ່າໝູ່ໃນໂລກ ຖ້າທຽບໃສ່ຈຳນວນປະຊາກອນ ເຊິ່ງໃນ 1964 ຫາ 1973 ໃນສົງຄາມອິນດູຈີນ ໄດ້ມີລະເບີດລູກຫວ່ານຖິ້ມໃສ່ ສປປ ລາວ ຫລາຍກວ່າ 2 ລ້ານໂຕນ, ມີລະເບີດລູກຫວ່າ 270 ລ້ານໜ່ວຍ ແລະ ຄາດວ່າ 30 ເປີເຊັນ ແມ່ນລະເບີດບໍ່ທັນແຕກທີ່ຕົກຄ້າງ ຫລື ປະມານ 80 ລ້ານໜ່ວຍ. ລະເບີດບໍ່ທັນແຕກທີ່ຕົກຄ້າງ ເປັນຜົນກະທົບອັນໃຫຍ່ຫລວງ ຕໍ່ກັບການພັດທະນາເສດຖະກິດ-ສັງຄົມ, ການດຳລົງຊີວິດຂອງພໍ່ແມ່ປະຊາຊົນລາວບັນດາເຜົ່າ ເຮັດໃຫ້ມີຜູ້ຖືກເຄາະຮ້າຍ 50.000 ຄົນ. ໃນນັ້ນ, ບາດເຈັບ 20.000 ຄົນ ແລະ ເສຍຊີວິດ 30.000 ຄົນ. ນອກນີ້, ຍັງສົ່ງຜົນກະທົບຕໍ່ກັບຊັບສິນ ແລະ ສິ່ງແວດລ້ອມອ້ອມຂ້າງ.

ນັບແຕ່ໄດ້ມີການເກັບກຳຂໍ້ມູນສະຖິຕິເປັນທາງການເຂົ້າໃນຖານຂໍ້ມູນແຫ່ງຊາດມີຈຳນວນອຸປະຕິເຫດເກີດຂຶ້ນໃນຂອບເຂດທົ່ວປະເທດ 683 ຄັ້ງ, ມີຜູ້ຖືກເຄາະຮ້າຍທັງໝົດ 1.107 ຄົນ, ໃນນັ້ນ, ບາດເຈັບ 821 ຄົນ ແລະ ເສຍຊີວິດ 286 ຄົນ.

ທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງ ຮສສ ກ່າວວ່າ:ໄລຍະ 1 ປີຜ່ານມາ ໄດ້ສົມທົບພາກສ່ວນກ່ຽວຂ້ອງເອົາໃຈໃສ່ຕິດຕາມ, ຊຸກຍູ້ ບັນດາອົງການປະຕິບັດງານຈັດຕັ້ງບັນດາກິດຈະກຳກ່ຽວກັບວຽກງານໂຄສະນາສຶກສາຄວາມສ່ຽງໄພຈາກ ລບຕ ເພື່ອເປັນການປູກຈິດສຳນຶກ, ຮັບຮູ້ທີ່ມາ ແລະ ຜົນຮ້າຍຂອງລະເບີດບໍ່ທັນແຕກ ໄດ້ທັງໝົດ 873 ເທື່ອບ້ານ, ມີຜູ້ໄດ້ຮັບຜົນປະໂຫຍດທັງໝົດ 237.962 ຄົນ, ຍິງ 118.840 ຄົນ; ໄດ້ຕິດຕາມ, ຊຸກຍູ້ໃຫ້ສະຖານີວິທະຍຸກະຈາຍສຽງແຫ່ງຊາດ ແລະ ວິທະຍຸກະຈາຍສຽງປະຈໍາແຂວງ ຈັດລາຍການໄດ້ຈໍານວນ 7 ແຂວງ ຄື: ນະຄອນຫລວງວຽງຈັນ (ວິທະຍຸກະຈາຍສຽງແຫງຊາດ), ຈຳປາສັກ, ເຊກອງ, ສາລະວັນ, ຄໍາມ່ວນ, ແຂວງວຽງຈັນ ແລະ ໄຊສົມບູນ; ໄດ້ສົມທົບກັບພາກສ່ວນກ່ຽວຂ້ອງເຊື່ອມສານວຽກໂຄສະນາສຶກສາຄວາມສ່ຽງໄພເຂົ້າໃນຫລັກສູດການຮຽນ-ການສອນ ຊັ້ນປະຖົມ ແລະ ວິທະຍາໄລຄູ ທັງໝົດ 5.784 ແຫ່ງ ໃນຂອບເຂດທົ່ວປະເທດ; ເກີດອຸບັດຕິເຫດລະເບີດຕົກຄ້າງ ຈໍານວນ 16 ຄັ້ງ, ມີຜູ້ຖືກເຄາະຮ້າຍ 20 ຄົນ. ບາດເຈັບ 15 ຄົນ, ເດັກນ້ອຍຊາຍ 5 ຄົນ, ຜູ້ໃຫຍ່ຊາຍ 8 ຄົນ ແລະ ເສຍຊີວິດ 5 ຄົນ.

ສຳລັບວຽກງານຜົນສໍາເລັດກ່ຽວກັບການຊ່ວຍເຫລືອຜູ້ຖືກເຄາະຮ້າຍ ຈາກ ລບຕ ໝົດ 225 ຄັ້ງ ຈໍານວນ 183 ຄົນ, ໃນນີ້ໄດ້ໃຫ້ການຊ່ວຍເຫລືອປິ່ນປົວດ້ານການແພດ ຈຳນວນ 40 ຄັ້ງ ຈໍານວນ 34 ຄົນ, ຟື້ນຟູບໍາບັດດ້ານສຸຂະພາບຈິດ 4 ຄັ້ງ ຈໍານວນ 4 ຄົນ, ຟື້ນຟູໜ້າທີ່ການຂອງຮ່າງກາຍ ຈຳນວນ 119 ຄົນ ແລະ ໄດ້ສະໜອງອຸປະກອນ 153 ອັນ.

ຂໍ້ມູນ: ຂ່າວສານ ຮສສ