ດາວີ່ ຄຣາສເຊັນ ກອງກາງຂອງ ອາແຈ໊ກ ຖືກແຟນບານ ເຟເຢນູດ ຖິ້ມຂອງໃສ່ ຈົນຫົວແຕກໃນເກມຮອບຮອງ ດັດ ຄັບ

ເຫດການເກີດຂຶ້ນໃນການແຂ່ງຂັນເຕະບານ ດັດ ຄັບ ຮອບຮອງຊະນະເລີດທີ່ບ້ານຂອງ ເຟເຢນູດ ຂະນະທີ່ເກມດຳເນີນມາເຖິງນາທີ 50 ແລະ ຜົນສະເໝີກັນຢູ່ 1-1, ດາວີ່ ຄຣາສເຊັນ ກອງກາງຂອງ ອາແຈ໊ກ ຍິງປະຕູໃຫ້ທີມຢາມໜີເປັນ 2-1.

ຫລັງຈາກນັ້ນໃນຈັງຫວະຕໍ່ເນື່ອງກັນ ມີຊ່ວງທີ່ຜູ້ຫລິ້ນຂອງທັງສອງທີມໄດ້ປະທະກັນຢູ່ຂ້າງສະໜາມໃກ້ກັບສະຖານທີ່ຂອງແຟນບານເຈົ້າບ້ານ, ເຖິງແມ່ນວ່າ ດາວີ່ ຄຣາສເຊັນ ບໍ່ແມ່ນຜູ້ທີ່ເຂົ້າໄປຮ່ວມວົງໂຕ້ຖຽງ. ແຕ່ລາວໄດ້ເຂົ້າປົກປ້ອງ ແລະ ພະຍາຍາມແຍກເພື່ອນຮ່ວມທີມຂອງລາວອອກມາ ແລະ ໃນເວລານັ້ນ, ແຟນບານເຈົ້າຖິ່ນໄດ້ຖິ້ມສິ່ງຂອງລົງມາຕໍ່ເນື່ອງໃນສະໜາມ ເຊິ່ງມີວັດຖຸໜັກໄດ້ຕົກລົງໃສ່ຫົວຂອງ ດາວີ່ ຄຣາສເຊັນ. ຈົນລາວລົ້ມລົງ ແລະ ເອົາມືຈັບໃສ່ຫົວຂອງລາວດ້ວຍຄວາມເຈັບ.

ເມື່ອລາວລຸກຂຶ້ນ, ຫົວຂອງ ຄຣາສເຊັນ ມີເລືອດອອກ. ລາວໄດ້ໂມໂຫຢ່າງໜັກກ່ອນທີ່ຈະແລ່ນໄປຕໍານິຕິຕຽນຜູ້ຕັດສິນ. ແລ້ວ​ທີ່​ທີມ​ແພດ​ກໍ່ໄດ້ມາ​ໃຫ້​ການ​ຊ່ວຍ​ເຫລືອ​​, ເຫດການດັ່ງກ່າວເຮັດໃຫ້ເກມຢຸດເວລາປະມານ 30 ນາທີກ່ອນທີ່ ຄຣາສເຊັນ ຈະຖືກປ່ຽນຕົວອອກໃນນາທີ 68.

ຫລ້າສຸດ, BBC ໄດ້ລາຍງານວ່າ ຕຳຫລວດໄດ້ຈັບຕົວຜູ້ກະທຳຜິດແລ້ວ, ເປັນຜູ້ຊາຍອາຍຸ 32 ປີ ເຊິ່ງປະຈຸບັນກຳລັງດຳເນີນຄະດີຕາມກົດໝາຍ.