ເຊລຊີ ກຽມຕັ້ງ ແຟຣັງ ແລມພາດ ຄຸມທີມຊົ່ວຄາວຈົນຈົບລະດູການນີ້

ບັນດາສື່ຊື່ດັງລາຍງານກົງກັນວ່າ ເຊລຊີ ກຽມແຕ່ງຕັ້ງ ແຟຣັງ ແລມພາດ ອະດີດນັກເຕະ ລວມເຖິງຜູ້ຈັດການທີມຂອງພວກເຂົາ ໃຫ້ເຂົ້າມາຮັບຕຳແໜ່ງຜູ້ຈັດການທີມຊົ່ວຄາວຈົນຈົບລະດູການ.

ສຳລັບ ເຊລຊີ ພວມຢູ່ໃນໄລຍະຫາຜູ້ຈັດການທີມຖາວອນຄົນໃຫມ່ ຫລັງແຍກທາງກັບ ແກຣມ ພັອດເຕີ ໂດຍມີ ຢູລຽນ ນາເກລມັນ ແລະ ຫລຸຍ ເອັນຣິເກ ເປັນຕົວໃນການຮັບຕຳແໜ່ງ ເຊິ່ງປັດຈຸບັນພວກເຂົາໃຫ້ ບຣູໂນ ຊັລຕໍ ເຮັດໜ້າທີ່ຜູ້ຈັດທີມຊົ່ວຄາວ.

ແນວໃດກໍຕາມຫລ້າສຸດ ເດວິດ ອອນສະຕີນ ນັກຂ່າວຈາກ The Athletic ລວມເຖິງ ຟາບຣາຊີໂອ ໂຣມາໂນ ນັກຂ່າວຄົນດັງຂອງອິຕາລີ ລະບຸວ່າ ເຊລຊີ ພວມເຈລະຈາກັບ ແລມພາດ ໃນການໃຫ້ເຂົ້າມາເຮັດໜ້າທີ່ເປັນຜູ້ຈັດການທີມຊົ່ວຄາວຈົນຈົບລະດູການນີ້.

ໂດຍ ໂຣມາໂນ ລາຍງານເພີ່ມອີກວ່າ ການເຈລະຈາລະຫວ່າງສະໂມສອນຂອງ ແລມພາດ ນັ້ນມີຄວາມຄືບໜ້າເປັນຢ່າງຫລາຍ ແລະ ແລມພາດ 44 ກໍພ້ອມທີ່ຈະກັບຮັບໜ້າທີ່ ຈົນເຖິງເດືອນ ມິຖຸນາ ເຊິ່ງການຕັດສິນໃຈສຸດທ້າຍຢູ່ທີ່ເຈົ້າຂອງທີມ ເຊລຊີ.

ທັງນີ້ ແລມພາດ ເຄີຍເປັນນັກເຕະຂອງ ເຊລຊີ ຕັ້ງແຕ່ປີ 2001-2014 ແລະ ຫລັງແຂວນເກີບລາວກໍໄດ້ເຮັດໜ້າທີ່ເປັນຜູ້ຈັດການທີມຂອງທີມໃນປີ 2019-2021.