ທະນາຄານແຫ່ງ ສປປ ລາວ ແລະ ກະຊວງອຸດສາຫະກໍາ ແລະ ການຄ້າ ພົບປະສອງຝ່າຍເພື່ອແກ້ໄຂບັນຫາການຄຸ້ມຄອງເສດຖະກິດ
ທະນາຄານແຫ່ງ ສປປ ລາວ (ທຫລ) ໄດ້ຈັດກອງປະຊຸມພົບປະລະຫວ່າງການນຳຂອງ ທຫລ ແລະ ກະຊວງອຸດສາຫະກຳ ແລະ ການຄ້າ (ອຄ) ໃນວັນທີ 4 ເມສາ 2023, ໂດຍການເປັນປະທານຂອງທ່ານ ບຸນເຫລືອ ສິນໄຊວໍຣະວົງ ຜູ້ວ່າການ ທຫລ ແລະ ທ່ານ ມະໄລທອງ ກົມມະສິດ ລັດຖະມົນຕີກະຊວງ ອຄ ພ້ອມດ້ວຍຄະນະນຳ, ຄະນະກົມຂອງທັງ 2 ຝ່າຍເຂົ້າຮ່ວມ.
ໃນກອງປະຊຸມໄດ້ຮັບຟັງລາຍງານສະພາບການປະຕິບັດແຜນເງິນຕາຂອງ ໄຕມາດທີ I ແລະ ທິດທາງແຜນການຂອງ ໄຕມາດທີ II ຈາກ ທຫລ ພ້ອມທັງປຶກສາຫາລືກ່ຽວກັບບັນຫາການຄຸ້ມຄອງລາຄາສິນຄ້າ; ບັນຫາການສ້າງລະບົບຄຸ້ມຄອງຫົວໜ່ວຍສົ່ງອອກ-ດັດສົມຫົວໜ່ວຍນໍາເຂົ້າສິນຄ້າ; ບັນຫາການຄຸ້ມຄອງບັນດາຮ້ານຂາຍຄໍາ-ວັດຖຸມີຄ່າ ທີ່ຕິດພັນກັບວຽກຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ແລະ ການຄຸ້ມຄອງອັດຕາແລກປ່ຽນ, ການແລກປ່ຽນເງິນຕາຊະຊາຍ ແລະ ການອະນຸຍາດໃຫ້ອອມຄໍາ; ບັນຫາການຄຸ້ມຄອງການນໍາໃຊ້ເງິນຕາແບບຊະຊາຍ-ການຕິດປະກາດລາຄາສິນຄ້າ ແລະ ບໍລິການ ເປັນເງິນຕາຕ່າງປະເທດຢູ່ສະຖານທີ່ຕ່າງໆ; ການຄຸ້ມຄອງການລົງທຶນໂດຍກົງຂອງຕ່າງປະເທດ (FDI – Foreign Direct Investment).
ນອກນີ້, ຝ່າຍກະຊວງອຸດສາຫະກຳ ແລະ ການຄ້າ ຍັງໄດ້ລາຍງານສະພາບ ແລະ ແລກປ່ຽນຄຳຄິດເຫັນກ່ຽວກັບການຄຸ້ມຄອງການນໍາເຂົ້າ-ສົົ່ງອອກ ແລະ ຫັນເອົາເງິນຕາຕ່າງປະເທດທີ່ໄດ້ຈາກການສົ່ງອອກໃຫ້ເຂົ້າສູ່ລະບົບທະນາຄານ; ມາດຕະການການຈໍາກັດການນໍາເຂົ້າສິນຄ້າຟຸມເຟືອຍ; ການຄຸ້ມຄອງການຄ້າທາງເອເລັກໂຕຣນິກ (E-commerce) ແລະ ບັນຫາປິ່ນອ້ອມອື່ນໆ.
ພ້ອມນີ້, ໃນກອງປະຊຸມໄດ້ມີການຕົກລົງເຫັນດີເພື່ອເຮັດວຽກຮ່ວມກັນໃນຕໍ່ໜ້າ ເປັນຕົ້ນແມ່ນ: ການຄຸ້ມຄອງລາຄາສິນຄ້າ; ການຄຸ້ມຄອງອັດຕາແລກປ່ຽນ; ອັດຕາເງິນເຟີ້; ການຄຸ້ມຄອງການຕິດ ແລະ ປະກາດລາຄາສິນຄ້າເປັນເງິນກີບ; ການຄຸ້ມຄອງການນຳໃຊ້ແອັບພິເຄຊັ້ນຂອງຮ້ານຂາຍຄຳ; ການແລກປ່ຽນຂໍ້ມູນລະຫວ່າງກັນ; ການປະຢັດການນຳໃຊ້ເງິນຕາຕ່າງປະເທດຂອງສັງຄົມ ແລະ ບັນຫາອື່ນໆທີ່ຕິດພັນ.
