ໂຮງໝໍ 103 ລາວ-ຫວຽດນາມ ສຳເລັດການຜ່າຕັດປູກຖ່າຍໄຂ່ຫລັງ 2 ກໍລະນີ

ໃນລະຫວ່າງວັນທີ 27-28 ມີນາ 2023 ຜ່ານມາ, ໂຮງໝໍສູນກາງ 103 ກອງທັບປະຊາຊົນລາວ ສົມທົບກັບ ໂຮງໝໍ 103 ກອງທັບປະຊາຊົນຫວຽດນາມ ໄດ້ຈັດຕັ້ງການຜ່າຕັດປູກຖ່າຍໄຂ່ຫລັງ ໄຕມາດທີ 1 ປະຈໍາປີ 2023 ໃຫ້ແກ່ຄົນເຈັບ 2 ກໍລະນີ ຄື: ເພດຊາຍ ອາຍຸ 58 ປີ ແລະ ເພດຍິງ ອາຍຸ 24 ປີ.

ທັງ 2 ກໍລະນີ ບົ່ງມະຕິແມ່ນພະຍາດໄຂ່ຫລັງຊຸດໂຊມໄລຍະສຸດທ້າຍ, ຄົນເຈັບທັງ 2 ເປັນພະຍາດໄຂ່ຫລັງມາຫຼາຍປີ, ໄດ້ຟອກເລືອດລຽນຕິດ ມາໄດ້ຫລາຍເດືອນ, ໄລຍະມໍ່ໆມານີ້ ຮ່າງກາຍຮູ້ສຶກອິດເມື່ອຍຫລາຍຂຶ້ນ, ການຕອບຮັບກ່ຽວກັບການຟອກເລືອດຮູ້ສຶກຫລຸດລົງ, ຈຶ່ງໄດ້ຕັດສິນໃຈຂໍຜ່າຕັດປູກຖ່າຍໄຂ່ຫລັງ. ເຊິ່ງຄົນເຈັບທັງ 2 ໄດ້ມາກວດພະຍາດຢູ່ໂຮງໝໍສູນກາງ 103 ກອງທັບ, ໄດ້ຮັບການກວດພະຍາດ ແລະ ໃຫ້ຄໍາປຶກສາຈາກຜູ້ຊ່ຽວຊານສະເພາະທາງພະຍາດໄຂ່ຫລັງ.

ພາຍຫລັງຊອກຜູ້ບໍລິຈາກຮ່ວມສາຍເລືອດໄດ້ແລ້ວ, ທາງໂຮງໝໍສູນກາງ 103 ກອງທັບ ກໍໄດ້ເລັ່ງການກວດສະພາບຮ່າງກາຍ, ກວດວິເຄາະໃຫ້ຄົບຖ້ວນ ແລະ ຢູ່ໃນເງື່ອນໄຂມາດຖານຮັບປະກັນສາມາດປູກຖ່າຍໄດ້, ແລ້ວຈຶ່ງປະສານທາງຜູ້ຊ່ຽວຊານ ໂຮງໝໍ 103 ກອງທັບຊາຊົນຫວຽດນາມ ມາຜ່າຕັດຕົວຈິງຢູ່ໂຮງໝໍສູນກາງ 103 ກອງທັບປະຊາຊົນລາວ; ເຊິ່ງການຜ່າຕັດປູກຖ່າຍໄຂ່ຫລັງ ຢູ່ໂຮງໝໍສູນກາງ 103 ກອງທັບປະຊາຊົນລາວ ເປັນກໍລະນີທີ 3 ແລະ 4.

ປັດຈຸບັນ, ພາຍຫລັງທັງ 2 ກໍລະນີ ປູກຖ່າຍໄຂ່ຫລັງໄດ້ 5 ວັນ ສະພາບຄົນເຈັບດີຂຶ້ນຕາມລໍາດັບ, ສະມາດກິນດື່ມອາຫານໄດ້, ສາມາດເຄື່ອນໄຫວໄປມາໄດ້ພາຍໃນຫ້ອງນອນ, ນໍ້າປັດສະວະ ມີປະລິມານໜ້າເພິ່ງພໍໃຈ, ບັນດາຜົນວິເຄາະຕີລາຄາກ່ຽວກັບ ໜ້າທີ່ການເຮັດວຽກຂອງໄຂ່ຫລັງ ແມ່ນດີຂຶ້ນຕາມລຳດັບ, ປະກົດການເລືອດຈາງ ແມ່ນໄດ້ແກ້ໄຂຢ່າງຈະແຈ້ງ, ເຮັດໃຫ້ຜູ້ປ່ວຍມີຮອຍຍິ້ມທີ່ເບັ່ງບານ.

ທັງນີ້, ໂຮງໝໍສູນກາງ 103 ກອງທັບປະຊາຊົນລາວ ໄດ້ສົມທົບກັບ ໂຮງໝໍ 103 ກອງທັບປະຊາຊົນຫວຽດນາມ ຜ່າຕັດປູກຖ່າຍໄຂ່ຫຼັງສໍາເລັດ 4 ກໍລະນີແລ້ວ ຢູ່ ສປປ ລາວ; ເຊິ່ງຜົນງານນີ້ ໄດ້ປະກອບສ່ວນຢ່າງໃຫຍ່ຫຼວງ ໃນການພັດທະນາເຫຼົ່າຮົບເສນາຮັກ ກໍຄື ວົງການແພດລາວ ໃຫ້ກ້າວໜ້າຂຶ້ນເລື້ອຍໆ.