ທ່ານ ນາງ ຊານນາ ມາຣິນ ນາຍົກລັດຖະມົນຕີຟິນແລນ ກຽມລົງຈາກຕໍາແໜ່ງ ຫລັງເສຍໄຊການເລືອກຕັ້ງທົ່ວໄປ

ທ່ານ ນາງ ຊານນາ ມາຣິນ ນາຍົກລັດຖະມົນຕີຂອງຟິນແລນ ກຽມລົງຈາກຕໍາແໜ່ງຜູ້ນໍາປະເທດ ຫລັງເສຍໄຊການເລືອກຕັ້ງໃຫຍ່ໃນວັນທີ 2 ເມສາ ເຖິງວ່າພັກ Social Democrats (SDP) ຂອງນາງຈະໄດ້ຮັບບ່ອນນັ່ງເພີ່ມຈາກການເລືອກຕັ້ງຄັ້ງກ່ອນ 3 ບ່ອນນັ່ງ ເປັນ 43 ບ່ອນນັ່ງ ໂດຍມີຄະແນນສຽງ 19,9% ໄດ້ອັນດັບ 3 ໃນການເລືອກຕັ້ງຄັ້ງນີ້.

ຂະນະທີ່ທ່ານ ເພັດເຕີຣີ ອໍໂປ ຜູ້ນໍາຂອງພັກຄອນເຊີເວທີບ ຄື National Coalition ເປັນຜູ້ທີ່ສາມາດໄດ້ຮັບບ່ອນນັ່ງສູງເຖິງ 48 ບ່ອນນັ່ງ ແລະ ໄດ້ຮັບຄະແນນສຽງສະໜັບສະໜູນສູງສຸດ 20,8%, ຮອງລົງມາແມ່ນທ່ານ ຣິກກາ ເພີຣາ ຈາກພັກ Finns ໄດ້ອັນດັບ 2 ດ້ວຍຄະແນນສຽງ 20,1% ໂດຍທ່ານ ອໍໂປ ຈະເປັນຜູ້ໄດ້ຮັບສິດໃນການຈັດຕັ້ງລັດຖະບານຟິນແລນຊຸດຕໍ່ໄປເປັນຄົນທໍາອິດ ຖ້າສໍາເລັດທ່ານ ອໍໂປ ຈະກ້າວຂຶ້ນເປັນນາຍົກລັດຖະມົນຕີຄົນໃໝ່ຂອງຟິນແລນທັນທີ.

ທ່ານ ອໍໂປ ລະບຸວ່າ: ຂ້າພະເຈົ້າຄິດວ່າ ປະຊາຊົນຊາວຟິນແລນຕ້ອງການການປ່ຽນແປງ ແລະ ຂ້າພະເຈົ້າຈະເລີ່ມເຈລະຈາກັບພັກການເມືອງອື່ນໆ ເພື່ອຈັດຕັ້ງລັດຖະບານປະສົມ. ຂະນະທີ່ທ່ານ ເພີຣາ ໄດ້ກ່າວສະແດງຄວາມຍິນດີຕໍ່ຜູ້ຊະນະ, ພ້ອມຊີ້ວ່າ: ຜົນການເລືອກຕັ້ງທີ່ພັກ Finns ຂອງນາງໄດ້ບ່ອນນັ່ງເພີ່ມສູງເຖິງ 7 ບ່ອນນັ່ງ ຈົນມີບ່ອນນັ່ງທັງໝົດ 46 ບ່ອນນັ່ງໃນປີນີ້ ຖືເປັນຜົນງານທີ່ດີຫລາຍໃນປະຫວັດສາດຂອງພັກການເມືອງພັກນີ້.

ນາງ ມາຣິນ ຂຶ້ນມາດໍາລົງຕໍາແໜ່ງນາຍົກລັດຖະມົນຕີອາຍຸນ້ອຍທີ່ສຸດຂອງຟິນແລນໃນປີ 2019 ດ້ວຍການຂຶ້ນມາເປັນຜູ້ນໍາລັດຖະບານປະສົມທີ່ປະກອບມີ 5 ພັກການເມືອງ ເຊິ່ງມີຜູ້ນໍາພັກເປັນຜູ້ຍິງທັງໝົດ ໂດຍນາງມີບົດບາດສໍາຄັນໃນໄລຍະການແພລະບາດຂອງໂຄວິດ ລວມທັງການຮັບມືຕໍ່ວິກິດສົງຄາມຣັດເຊຍ-ອູແກຣນ ຈົນມີສ່ວນສໍາຄັນໃນການຊຸກຍູ້ໃຫ້ຟິນແລນຍື່ນໃບສະໝັກເຂົ້າເປັນສະມາຊິກໃໝ່ຂອງອົງການ NATO ໃນກາງປີ 2022.

ອ້າງອີງ:

https://www.bbc.com/news/world-europe-65157357

https://www.independent.co.uk/…/finland-election-sanna…

https://www.theguardian.com/…/sanna-marin-finland…