ຢຸນນານ-ຜົ້ງສາລີ ສືບຕໍ່ຮ່ວມມືເຂັ້ມງວດ ສະກັດກັ້ນຂະບວນລັກລອບ, ຂົນຂວາຍຜິດກົດໝາຍຕ່າງໆ ຕາມຊາຍແດນ

ວັນທີ 30 ມີນາ 2023 ຜ່ານມານີ້ ຕຳຫລວດ ແຂວງຢຸນນານ ສປ ຈີນ ໄດ້ຈັດ ແລະ ຕຳຫລວດ ແຂວງຜົ້ງສາລີ ສປປ ລາວ ຈັດກອງປະຊຸມພົບປະຮ່ວມມື ປະຕິບັດກົດໝາຍວຽກງານຕໍາຫລວດ ຄັ້ງທີ X ຝ່າຍຈີນ ນໍາໂດຍ ທ່ານ ຈີງເຈີເຟີງ ຮອງເຈົ້ານະຄອນ, ຫົວໜ້າກອງບັນຊາການຕໍາຫລວດ ນະຄອນພູເອີ ແຂວງຢຸນນານ ພ້ອມດ້ວຍຄະນະ ແລະ ຝ່າຍລາວ ນໍາໂດຍ ທ່ານ ພັອ ຄໍາຈັນ ແສງລາວົງ ຫົວໜ້າກອງບັນຊາການ ປກສ ແຂວງຜົ້ງສາລີ.

ທັງສອງຝ່າຍໄດ້ພ້ອມກັນສັງເກດຕີລາຄາຜົນການຈັດຕັ້ງປະຕິບັດວຽກງານການຮ່ວມມືປະຕິບັດກົດໝາຍຊາຍແດນໃນ 3 ປີຜ່ານມາໂດຍສະເພາະແມ່ນ ການສະກັດກັ້ນ-ຕ້ານການກໍ່ການຮ້າຍ, ແບ່ງແຍກຊົນເຜົ່າ, ອາຊະຍາກຳຢາເສບຕິດ, ການຄ້າມະນຸດ, ການລັກລອບເຂົ້າ-ອອກເມືອງຜິດກົດໝາຍ, ການຄຸ້ມຄອງຊາຍແດນ ແລະ ອື່ນໆ.

ໃນຕໍ່ໜ້າ ທັງສອງຝ່າຍຈະສືບຕໍ່ປະຕິບັດມາດຕະການຄຸ້ມຄອງຊາຍແດນໃຫ້ເຂັ້ມງວດ, ເພີ່ມທະວີສະກັດກັ້ນປະຊາຊົນຢູ່ລຽບຕາມຊາຍແດນທີ່ຫວັງທໍາລາຍສິ່ງຂັ້ນແຍກຊາຍແດນ, ສະກັດກັ້ນການເຂົ້າຮ່ວມລັກລອບ, ຂົນຂວາຍ, ຂົ່ນສົ່ງສິ່ງຜິດກົດໝາຍຕ່າງໆ, ສະກັດກັ້ນຢ່າງແຂງແຮງຕໍ່ກົນອຸບາຍຂອງການລັກລອບຂ້າມແດນ, ມີການປະສານແລກປ່ຽນຂໍ້ມູນຂ່າວສານ, ຮ່ວມມືສະກັດກັ້ນການລັກລອບປູກ, ປຸງແຕ່ງ, ຜະລິດ, ການຂົນສົ່ງ ແລະ ຄ້າຂ່າຍຢາເສບຕິດປະເພດຕ່າງໆໃຫ້ຫລຸດໜ້ອຍຖອຍລົງ ແນໃສ່ເຮັດເຮັດສອງຊາດ ລາວ-ຈີນ ມີສະຖຽນລະພາບ ແລະ ມີຄວາມສະຫງົບປອດໄພ.