ນະຄອນຫລວງພະບາງ ກຽມປະດັບປະດາຕົວເມືອງໃຫ້ງົດງາມເພື່ອຕ້ອນຮັບບຸນປີໃໝ່ລາວ ແລະ ດຶງດູດແຂກພາຍໃນ-ຕ່າງປະເທດ

ຫ້ອງການບໍລິການຕົວເມືອງນະຄອນ ຫລວງພະບາງ ໄດ້ກະກຽມການປະດັບປະດາ, ຮັກສາຄວາມສະອາດ ແລະ ຄວາມເປັນລະບຽບຮຽບຮ້ອຍ ຂອງຕົວເມືອງແບບມີສ່ວນຮ່ວມຂອງປະຊາຊົນ. ໃນນັ້ນ, ໄດ້ອອກແຈ້ງການໃຫ້ປະຊາຊົນພາຍໃນນະຄອນຫລວງພະບາງ ລວມທັງຜູ້ປະກອບການທຸລະກິດ ໂຮງແຮມ, ເຮືອນພັກ ແລະ ຮ້ານອາຫານ ໃຫ້ເອົາໃຈໃສ່ໃນການອະນາໄມພາຍໃນຂອບເຂດຄວາມຮັບຜິດຊອບຂອງຕົນໃຫ້ຄວາມສະອາດ, ສວຍງາມ ແລະເປັນລະບຽບຮຽບຮ້ອຍ.

ທ່ານ ນາງ ໄກສອນ ແກ້ວປະເສີດ ຫົວໜ້າຫ້ອງການບໍລິການຕົວເມືອງນະຄອນຫລວງພະບາງ ໃຫ້ສຳພາດວ່າ: ເພື່ອເຮັດໃຫ້ເທດສະບານນະຄອນ ຫລວງພະບາງ ມີຄວາມສະອາດສ້າງສິ່ງດຶງດູດເອົາແຂກທັງພາຍໃນແລະຕ່າງປະເທດ ໄດ້ປະສານສົມທົບກັບອາສາສະໝັກ, ປະຊາຊົນ ແລະຜູ້ປະກອບການ ຈັດກິດຈະກຳ ໃນການອານາໄມເສັ້ນທາງແຄມຂອງ, ແຄມຄານ, ຂອບເຂດຮັບຜິດຊອບ ແລະ ບ່ອນສາທາລະນະ ເດືອນລະ 1 ຄັ້ງ, ໄດ້ລົງກວດກາ, ຈັນສັນຕົວເມືອງ ຮ່ວມກັບຄະນະຈັດສັນຂອງນະຄອນ ໃນການລົງກວດກາການລະເມີດການຂາຍເຄື່ອງຂອງປະຊົນທີ່ຂາຍເຄື່ງອໃສ່ທາງຍ່າງ ແລະ ບ່ອນທີ່ຕ້ອງຫ້າມທີ່ຜິດຕໍ່ລະບຽບ 723 ຂອງທ່ານເຈົ້າແຂວງຫລວງພະບາງ ເປັນປະຈໍາທຸກວັນ, ໄດ້ລົງກວດກາເບິ່ງຖັງຂີ້ເຫຍື້ອສາທາລະນະໃນຕົວເມືອງ ເພື່ອເອົນມາສ້ອມແປງໃໝ່ ແລະ ໃຫ້ໄດ້ວາງເປັນຈຸດພາຍໃນຕົວເມືອງ ກ່ອນໜ້າປີໃໝ່ລາວ ແລະ ລ້າງເສັ້ນທາງໃນຕົວເມືອງ, ທັງໄດ້ເພີ່ມທະວີໃນການປັດກວາດເສັ້ນທາງພາຍໃນຕົວເມືອງ ໃຫ້ເປັນປົກກະຕິ ແລະຈັດຕັ້ງການສ້ອມໄປລະບົບໄຟຟ້າເຍືອງທາງ ຈຸດທີ່ເປ່ເພ ເພື່ອໃຫ້ມີຄວາມສະຫວ່າງໃນຍາມຄໍ່າຄືນ ຕື່ມອີກ.

ໂອກາດນີ້ ທ່ານ ນາງ ໄກສອນ ແກ້ວປະເສີດ ໄດ້ຮຽກຮ້ອງໃຫ້ທຸກພາກສ່ວນ ພາຍໃນນະຄອນຫລວງພະບາງ ຈົ່ງເປັນເຈົ້າການໃນການເຮັດອະນາໄມໃນຂອບເຂດຕົນເອງຮັບຜິດຊອບ ເພື່ອເຮັດໃຫ້ນະຄອນຫລວງພະບາງ ມີຄວາມສະອາດ ແລະ ເຮັດໃຫ້ນັກທ່ອງທ່ຽວ ທີ່ເຂົ້າມາທ່ຽວຫລວງພະບາງ ໃນໄລຍະບຸນກຸດສົງການປີໃໝ່ລາວ ມີຄວາມປະທັບໃຈ.

ຂໍ້ມູນ: ວິທະຍຸແຫ່ງຊາດ