ອົງການໄອຍະການປະຊາຊົນສູງສຸດ ເປີດຂະບວນການແຂ່ງຂັນ ຮັກຊາດ ແລະ ພັດທະນາ ຮອດປີ 2025
ອົງການໄອຍະການປະຊາຊົນສູງສຸດ ໄດ້ຈັດກອງປະຊຸມເປີດຂະບວນການແຂ່ງຂັນ ຮັກຊາດ ແລະ ພັດທະນາ ແລະ ປະກາດເນື້ອໃນຂໍ້ແຂ່ງຂັນ ຮອດປີ 2025 ຂອງອົງການໄອຍະການປະຊາຊົນໃນຂອບເຂດທົ່ວປະເທດ ຂຶ້ນໃນວັນທີ 29 ມີນາ 2023, ໂດຍການເປັນປະທານຂອງ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ແລະ ມີພະນັກງານຫລັກແຫລ່ງທົ່ວອົງການໄອຍະການປະຊາຊົນສູງສຸດເຂົ້າຮ່ວມ.
ທ່ານ ຄໍາເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ ໄດ້ຂຶ້ນເຜີຍແຜ່ດໍາລັດວ່າດ້ວຍການແຂ່ງຂັນ ແລະ ຍ້ອງຍໍ ສະບັບເລກທີ 116/ລບ, ລົງວັນທີ 22 ເມສາ 2019; ເຜີຍແຜ່ ຄໍາແນະນໍາກ່ຽວກັບການຈັດຕັ້ງ-ຜັນຂະຫຍາຍດໍາລັດວ່າດ້ວຍການແຂ່ງຂັນ ແລະ ຍ້ອງຍໍ ສະບັບເລກທີ 01/ພນ, ລົງວັນທີ 07 ກຸມພາ 2020; ຜ່ານລັດຖະດໍາລັດຂອງປະທານປະເທດ ວ່າດ້ວຍການແຕ່ງຕັ້ງຄະນະຊີ້ນໍາລະດັບຊາດກ່ຽວກັບການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ສະບັບເລກທີ 025/ ປປທ, ລົງວັນທີ 07 ກຸມພາ 2022 ແລະ ຜ່ານຂໍ້ຕົກລົງແຕ່ງຕັ້ງຄະນະກໍາມະການຊີ້ນໍາການແຂ່ງຂັນ-ຍ້ອງຍໍຮັກຊາດ ແລະ ພັດທະນາ ຂອງອົງການໄອຍະການປະຊາຊົນສູງສຸດ ສະບັບເລກທີ 05/ຄຊຂຍ. ລົງວັນທີ 08 ກັນຍາ 2022.
ການເປີດຂະບວນການ ແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ເພື່ອເປັນການປຸກລະດົມເຕົ້າໂຮມກຳລັງແຮງຂອງທຸກພາກສ່ວນໃນທົ່ວອົງການໄອຍະການປະຊາຊົນ ເຊີດຊູມູນເຊື້ອຮັກຊາດ, ຄວາມພິລະອາດຫານ, ນໍ້າໃຈດຸໝັ້ນ, ປະຢັດ, ຊື່ສັດ, ອົດທົນ, ປະດິດສ້າງ, ເສີມຂະຫຍາຍສິດເປັນເຈົ້າຂອງປະຊາຊົນລາວບັນດາເຜົ່າ, ແຂ່ງຂັນກັນປະຕິບັດ ສອງໜ້າທີ່ຍຸດທະສາດ ປົກປັກຮັກສາ ແລະ ສ້າງພັດທະນາປະເທດຊາດ, ສູ້ຊົນປະຕິບັດຄາດໝາຍ ທີ່ພັກ ແລະ ລັດ ວາງອອກໃນແຕ່ລະໄລຍະໃຫ້ປະກົດຜົນເປັນຈິງ, ທັງເປັນການປຸກລະດົມພະນັກງານທົ່ວ ອົງການໄອຍະການປະຊາຊົນ ໃຫ້ມີສະຕິຊາດ ມີຄວາມເປັນເອກະພາບອັນໜຶ່ງອັນດຽວ, ເປັນເຈົ້າຕົນເອງ, ມີຈິດໃຈປະຢັດມັດທະຍັດ, ມີຄວາມດຸໝັ່ນຄົ້ນຄ້ວາຮໍ່າຮຽນ, ດຸໝັ່ນໃນການອອກແຮງງານ, ຍົກສູງສະຕິຕື່ນຕົວ, ນໍ້າໃຈບຸກບືນ ແລະ ສ້າງໃຫ້ມີຕົວແບບດີເດັ່ນກ້າວໜ້າ.
ໃນພິທີ, ທ່ານປະທານອົງການໄອຍະການປະຊາຊົນສູງສຸດ ໄດ້ຮຽກຮ້ອງໃຫ້ຄະນະພັກ-ຄະນະນໍາ, ຄະນະກົມ, ຫ້ອງການ, ສະຖາບັນຄົ້ນຄວ້າ ແລະ ຝຶກອົບຮົມໄອຍະການ, 3 ອົງການຈັດຕັ້ງມະຫາຊົນ ແລະ ພະນັກງານ-ລັດຖະກອນທົ່ວອົງການໄອຍະການປະຊາຊົນສູງສຸດ ໂດຍສະເພາະຄະນະກົມອ້ອມຂ້າງຈົ່ງນໍາເອົາເນື້ອໃນຂໍ້ແຂ່ງຂັນດັ່ງກ່າວໄປຜັນຂະຫຍາຍໃຫ້ແກ່ສະມາຊິກຕົນຮັບຜິດຊອບໃຫ້ມີຄວາມເຂົ້າໃຈຢ່າງເລິກເຊິ່ງ, ບຸກບືນຕໍ່ໜ້າທີ່ວຽກງານວິຊາສະເພາະ, ມີຄວາມສູ້ຊົນ, ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ມອບໝາຍ ແລະ ສໍາເລັດຢ່າງມີຄຸນນະພາບ.
