ຕຳແລ້ວຫລົບໜີ ເຮັດໃຫ້ເດັກອາຍຸ 8 ປີ ເສຍຊີວິດຄາທີ່ ແຕ່ມີພົນລະເມືອງດີຊ່ວຍໄລ່ນຳສາມາດຈັບຕົວໄດ້
ອີງຕາມຄວາມສະຫງົບລາຍງານ ວັນທີ 30 ມີນາ 2023 ນີ້ວ່າ: ເວລາປະມານ 23:54 ໂມງ ໄດ້ອຸບັດຕິເຫດລົດໃຫຍ່ຕຳກັບລົດຈັກ ຢູ່ເສັ້ນທາງເຂດບ້ານຄໍາຮຸ່ງ ເມືອງໄຊທານີ ນະຄອນຫລວງວຽງຈັນ ເຮັດໃຫ້ມີຜູ້ເສຍຊິວິດ 1 ຄົນ ເປັນເດັກນ້ອຍ 8 ປີ.
ເຈົ້າໜ້າທີ່ກອງຕໍາຫລວດຈະລາຈອນ ນະຄອນຫລວງວຽງຈັນ ໃຫ້ຂໍ້ມູນເບື້ອງຕົ້ນວ່າ: ລົດເກັງ ສີຂາວ ຍີ້ຫໍ້ DYD (ລົດໄຟຟ້າ) ບໍ່ຕິດປ້າຍທະບຽນ, ຂັບຂີ່ໂດຍທ້າວ ພູນຊໍາ, ອາຍຸ 43 ປີ, ຢູ່ບ້ານໂພນສະຫວ່າງ ເມືອງຈັນທະບູລີ, ຜູ້ກ່ຽວໄດ້ຂັບຂີ່ລົດມາແຕ່ເສັ້ນທາງບ້ານພະຂາວ ຈຸດປະສົງຈະຂັບຂີ່ກັບບ້ານຂອງຕົນເອງ ແຕ່ພໍຂັບຂີ່ມາຮອດເສັ້ນທາງ 4 ແຍກ (ໜ້າໂຮງແຮມຄອນປະສົງ) ໄດ້ເກີດອຸບັດຕິເຫດຕໍາກັບລົດຈັກ ເວບ 100, ປ້າຍທະບຽນ ຈກ 3244 ກໍາແພງນະຄອນ ທີ່ຂັບຂີ່ມາແຕ່ເສັ້ນທາງບ້ານສີວິໄລ, ຜູ້ຂັບຂີ່ຊື່ທ້າວ ສາຍຝົນ, ອາຍຸ 41 ປີ, ຢູ່ບ້ານດົງໝາກຄາຍ ເມືອງໄຊທານີ ໃນນັ້ນມີຜູ້ຊ້ອນທ້າຍ 1 ຄົນ ເປັນລູກສາວ ຊື່ ນາງ ມັນນີ ອາຍຸ 8 ປີ.
ພາຍຫລັງເກີດເຫດເຮັດໃຫ້ເດັກນ້ອຍເສຍຊີວິດຄາທີ່, ສ່ວນວ່າຜູ້ຂັບຂີ່ລົດເກັງໄດ້ຂັບລົດຫລົບໜີ ໂດຍບໍ່ຈອດລົດເບິ່ງຄູ່ກໍລະນີ, ແຕ່ມີພົນລະເມືອງດີເຫັນເຫດການຂັບຂີ່ລົດນໍາລົດເກັງຄັນດັ່ງກ່າວ ແລ້ວແຈ້ງເຈົ້າໜ້າທີ່ໃຫ້ກັກຕົວຜູ້ກຽວພ້ອມຍານພາຫະນະ, ປັດຈຸບັນເຈົ້າໜ້າທີ່ກໍາລັງເກັບກໍາຂໍ້ມູນເພີ່ມຕື່ມ ເພື່ອດໍາເນີນຄະດີຕາມລະບຽບກົດໝາຍ.
ຂໍສະແດງຄວາມເສຍໃຈກັບຄອບຄົວຜູ້ເສຍຊີວິດໃນອຸບັດຕິເຫດຄັ້ງນີ້ດ້ວຍ.
