ໂຮງໝໍມະໂຫສົດຍອມຮັບວ່າບໍລິການບໍ່ທົ່ວເຖິງ ຍ້ອນຄົນເຈັບມີປະລິມານຫລາຍ

ຕໍ່ກັບຫາງສຽງຂອງສັງຄົມກ່ຽວກັບການບໍລິການຂອງບັນດາໂຮງໝໍຕ່າງໆ, ໂດຍສະເພາະ ຕໍ່ຜູ້ນຳໃຊ້ບັດປະກັນສັງຄົມ ເຫັນວ່າການບໍລິການນັ້ນບໍ່ທັນເໝາະສົມກັບເງິນປະກັນທີ່ເສຍໄປໃນແຕ່ລະເດືອນ, ຊຶ່ງທ່ານ ບຸນທະພານີ ບຸນຊ່ວຍ ອຳນວຍການໂຮງໝໍມະໂຫສົດ ໄດ້ໃຫ້ສຳພາດຕໍ່ນັກຂ່າວລາວພັດທະນາ ໃນໂອກາດເຂົ້າຮ່ວມກອງປະຊຸມຖອດຖອນບົດ ຮຽນລະຫວ່າງຫ້ອງການກອງທຶນປະກັນສັງຄົມແຫ່ງຊາດ ແລະ ບັນດາໂຮງໝໍທົ່ວປະເທດ ໃນວັນທີ 29 ມີນານີ້ວ່າ: ໃນສົກປີ 2015-2016 ຜ່ານມານີ້, ໂຮງໝໍມະໂຫສົດ ມີຜູ້ນຳໃຊ້ບັດປະກັນສັງຄົມ ເຂົ້າມາໃຊ້ບໍລິການຫລາຍກວ່າແສນຄົນ, ໃນນັ້ນ ມີຜູ້ປິ່ນປົວໃນເຂດນອກ, ສຸກເສີນ ແລະ ນອນປິ່ນປົວໃນໂຮງໝໍ, ຊຶ່ງຈະເຫັນວ່າຄົນເຈັບດັ່ງກ່າວແມ່ນມີຈຳນວນຫລວງຫລາຍ, ອາດເຮັດໃຫ້ການບໍລິການຂອງແພດໝໍບໍ່ພຽງພໍກັບຄວາມຕ້ອງການ, ພາຍໃນໂຮງໝໍ ກໍມີລະບົບບັດຄິວໃຫ້ຄົນເຈັບທີ່ເຂົ້າມາປິ່ນປົວ ເພື່ອອຳນວຍຄວາມສະດວກໃຫ້ກັບຜູ້ທີ່ມາກ່ອນມາຫລັງໃຫ້ມີຄວາມເປັນລະບຽບ, ແຕ່ເວົ້າໄດ້ວ່າ ພະນັກງານແພດໝໍທຸກຄົນ ແມ່ນປະຕິບັດຕາມລະບຽບການທາງໂຮງໝໍວາງອອກທຸກຂັ້ນຕອນ, ໂດຍສະເພາະການເອົາໃຈໃສ່ຄົນເຈັບທຸກປະເພດ, ທຸກລະດັບແມ່ນເທົ່າທຽມກັນ, ແຕ່ກໍມີຄົນເຈັບຈຳນວນໜຶ່ງທີ່ບໍ່ສາມາດລໍຖ້າໄດ້ ຈຶ່ງອອກໄປປິ່ນປົວຢູ່ນອກເຂດບໍລິການຂອງໂຮງໝໍ ແລະ ເປັນສາເຫດເຮັດໃຫ້ມີຫາງສຽງຈົ່ມວ່າ ແລະ ບໍ່ພໍອົກພໍໃຈຕາມມາ. ແຕ່ເຖິງຢ່າງໃດກໍຕາມ ໃນຈຳນວນຄົນເຈັບທີ່ເພີ່ມຂຶ້ນນັ້ນ, ຄະນະອຳນວຍການໂຮງໝໍມະໂຫສົດທຸກຄົນ ໄດ້ພ້ອມກັນປຸກລະດົມແພດໝໍ ແລະ ພະນັກງານທຸກຄົນ ເອົາໃຈໃສ່ ແລະ ສຶກສາອົບຮົມວຽກງານການບໍລິການ ເພື່ອເຮັດໃຫ້ແພດໝໍມີຄວາມກະຕືລືລົ້ນ ແລະ ຫລີກລ້ຽງຫາງສຽງຈົ່ມວ່າຈາກສັງຄົມ. ນອກນີ້ ໂຮງໝໍມະໂຫສົດຍັງໄດ້ນຳໃຊ້ຢາພື້ນຖານຈຳ ນວນ 400 ກວ່າລາຍການ ເພື່ອຮອງຮັບການປິ່ນປົວພະຍາດໃນແຕ່ລະປະເພດ ແລະ ຫລີກລ້ຽງການຊື້ຈ່າຍຢາຢູ່ນອກໂຮງໝໍມາກິນ.

ປັດຈຸບັນ ໂຮງໝໍມະໂຫສົດ ມີຕູ້ຮັບຄຳຄິດເຫັນຈາກຜູ້ທີ່ເຂົ້າໄປໃຊ້ບໍລິການ ແລະ ສາຍດ່ວນທີ່ສາມາດໂທເຂົ້າໄປໄດ້ຕະຫລອດເວລາ, ເພື່ອແກ້ໄຂຄຳຮ້ອງທຸກຂອງຜູ້ເຂົ້າໄປໃຊ້ບໍລິການໃຫ້ທັນການ ແລະ ວ່ອງໄວ, ຊຶ່ງຜ່ານມາ ກໍມີຄົນເຈັບຈຳນວນໜຶ່ງໂທເຂົ້າໄປ ແລະ ກໍໄດ້ຮັບການແກ້ໄຂໃນທັນທີ ແລະ ມີຄວາມໂປ່ງໃສທັງສອງຝ່າຍອີກດ້ວຍ.