ລີເວີພູລ ເອົາແທ້ພ້ອມຄວ້າ ເມສັນ ເມົາ ເສີມເກມບຸກລະດູການນີ້

ລີເວີພູລ ຕົກເປັນຂ່າວສະແດງຄວາມສົນໃຈ ເມສັນ ເມົາ ກອງໜ້າ ເຊລຊີ ມາຮ່ວມທີມໃນຕະຫລາດນັກເຕະລະດູການນີ້ ຫລັງການເຈລະຈາເລື່ອງສັນຍາໃຫມ່ຂອງນັກເຕະກັບ ເຊລຊີ ບໍ່ຄືບໜ້າ.

ສຳລັບ ເມົ້າ ເຊິ່ງເປັນຜົນຜະລິດຂອງສະໂມສອນ ເຊລຊີ ລົງສະໜາມໃຫ້ທີມຊຸດໃຫຍ່ມາຕັ້ງແຕ່ປີ 2019 ເຊິ່ງລາວກໍສ້າງຜົນງານໄດ້ຢ່າງໜ້າປະທັບໃຈ ຫລັງຍິງ 27 ປະຕູ ຈາກການລົງສະໜ!ມ 127 ເກມ ລວມທຸກລາຍການ ພ້ອມພາ ເຊລຊີ ຄວ້າແຊ໊ມຫລາຍຢ່າງເຊັ່ນ : ຢູຟາ ແຊ໊ມປຽນ ລີກ, ຢູຟາ ຊຸບເປີ ຄັບ ແລະ ຟີຟາ ຄລັບ ເວີນ ຄັບ.

ແນວໃດກໍຕາມ ສັນຍາຂອງດາວເຕະອາຍຸ 24 ປີ ກັບເຊລຊີ ເຫລືອເຖິງໄລຍະລະດູການ 2024 ເທົ່ານັ້ນ ໂດຍເຖິງວ່າເຊລຊີ ຈະສະແດງທ່າທີຈະແຈ້ງວ່າຕ້ອງການຕໍ່ສັນຍາກັບ ເມົ້າ ອອກໄປ ແຕ່ນັກເຕະທີມຊາດອັງກິດຍັງບໍ່ມີທ່າທີວ່າຈະຈົດປາກກາຂະຫຍາຍສັນຍາ ທັງທີ່ເຈລະຈາມາຫລາຍເດືອນແລ້ວ.

ຈາກສະຖານະການທີ່ເກີດຂຶ້ນ ເຮັດໃຫ້ມີຂ່າວວ່າຫລາຍສະໂມສອນໃນພຣີເມຍລີກ ທັງ ແມນເຊສເຕີ ຢູໄນເຕັດ, ແມນເຊສເຕີ ຊິຕີ ແລະ ລີເວີພູລ ພວມຈັບຕາເບິ່ງ ເມົ້າ ຢູ່.