ເຈົ້າໜ້າທີ່ພາສີ ປະຈຳຈຸດປະສານງານດານຊີ ນະຄອນຫລວງວຽງຈັນ ຢຶດລົດກະບະ 2 ຄັນ ທີ່ບໍ່ມີເອກະສານຖືກຕ້ອງຕາມລະບຽບກົດໝາຍ

ວັນທີ 28 ມີນາ 2023 ນີ້, ເຈົ້າໜ້າທີ່ພາສີພະແນກສືບສວນ-ສອບສວນ ແລະ ປາບປາມການລັກລອບໜີພາສີ ປະຈໍາຈຸດປະສານງານດານຊີ ນະຄອນຫລວງວຽງຈັນ (ນວ), ໄດ້ປະສານສົມທົບກັບເຈົ້າໜ້າທີ່ຂະແໜງກວດກາ ແລະ ສືບສວນ-ສອບສວນ ຂຶ້ນກັບພະແນກສືບສວນ-ສອບສວນ ແລະ ປາບປາມການລັກລອບໜີພາສີ (ພສປ), ໄດ້ອອກເຄື່ອນໄຫວປະຕິບັດໜ້າທີ່ຕາມສາຍຂ່າວຢູ່ເຂດບ້ານໜອງແຕ່ງ, ບ້ານຊຳເກດ ເມືອງສີໂຄດຕະບອງ ນະຄອນຫລວງວຽງຈັນ.

ໂດຍຕິດຕາມ, ກວດກາ ແລະ ສາມາດ ຢຶດລົດກະບະຈໍານວນ 2 ຄັນຄື:  ລົດກະບະໂຕໂຢຕ້າ, ຍີ່ຫໍ້: ລີໂວ 4 ປະຕູ, ສີປອນເທົາ. ແລະ ລົດກະບະໂຕໂຢຕ້າ ສະມາດແຄັບສີຂາວ. ເຊິ່ງຜ່ານການສືບສວນ-ສອບສວນເບື້ອງຕົ້ນ ລົດດັ່ງກ່າວແມ່ນນໍາເຂົ້າມາບໍ່ຖືກຕ້ອງ, ບໍ່ມີເອກະສານນໍາເຂົ້າເສຍພາສີ-ອາກອນ. ດັ່ງນັ້ນ, ຈຶ່ງໄດ້ມອບລົດທັງ 2 ຄັນ ດັ່ງກ່າວໃຫ້ພະແນກສືບສວນ-ສອບສວນ ແລະ ປາບປາມການລັກລອບໜີພາສີ, ດຳເນີນຂັ້ນຕອນຕາມກົດໝາຍ ແລະ ລະບຽບການຕໍ່ໄປ.