ອິຕາລີຜະເຊີນໄພແຫ້ງແລ້ງປີທີສອງ ເຮັດໃຫ້ຜົນຜະລິດເຂົ້າຫລຸດລົງ

ກຸ່ມກະສິກອນໃນອິຕາລີເຕືອນ ຜົນຜະລິດເຂົ້າຄາດວ່າຈະຫລຸດລົງໃນປີນີ້ ເນື່ອງຈາກກະສິກອນກໍາລັງຜະເຊີນໄພແຫ້ງແລ້ງເປັນປີທີສອງ ສົ່ງຜົນໃຫ້ເນື້ອທີ່ສໍາລັບການປູກຝັງເຫລືອໜ້ອຍທີ່ສຸດໃນຮອບ 20 ກວ່າປີ.

ວັນທີ 27 ມີນາ, ສໍານັກຂ່າວຣອຍເຕີ ລາຍງານວ່າ: ທ່ານ ໂຣແບໂຕ ມັກນາກີ ຫົວໜ້າອົງກອນເຂົ້າແຫ່ງຊາດອິຕາລີ ກ່າວວ່າ: ອິຕາລີຈະມີເນື້ອທີ່ປູກເຂົ້າບໍ່ເກີນ 211.000 ເຮັກຕາ ໃນປີ 2023 ເຊິ່ງຖືວ່າມີຂະໜາດນ້ອຍທີ່ສຸດໃນຮອບ 23 ປີ ໂດຍມີການຄາດຄະເນວ່າ: ເນື້ອທີ່ຈະຫລຸດລົງ 7.400 ເຮັກຕາ ຈາກປີ 2022 ແລະ 16.000 ເຮັກຕາ ເມື່ອທຽບໃສ່ປີ 2021.

ທ່ານ ມັກນາກີ ລະບຸອີກວ່າ: ສະພາບໃນພາກພື້ນລອມບາດີ ແລະ ປີເຢມອນ ຮ້າຍແຮງກວ່າປີຜ່ານມາ ເຊິ່ງພືດຜົນຖືກທໍາລາຍຈາກໄພແຫ້ງແລ້ງ ແລະ ຜົນຜະລິດຫລຸດລົງ 17% ຈາກປີກ່ອນໜ້າ.

ທ່ານ ອັນເດຣອາ ໂທເຣຕີ ຜູ້ຊ່ຽວຊານດ້ານກະສິກໍາ ຈາກສູນວິໄຈຮ່ວມຂອງຄະນະກໍາມາທິການເອີຣົບ (EC) ກ່າວວ່າ: ລະດັບຄວາມຊຸ່ມໃນດິນຍັງບໍ່ຟື້ນຕົວຈາກໄພແຫ້ງແລ້ງໃນປີຜ່ານມາ ແລະ ການສະສົມຂອງຫິມະໃນປັດຈຸບັນຢູ່ພູເຂົາແອລຍັງຕໍ່າກວ່າລະດັບໃນປີ 2022 ເຊັ່ນດຽວກັບບັນດານັກວິທະຍາສາດ ແລະ ກຸ່ມສິ່ງແວດລ້ອມຫລາຍກຸ່ມທີ່ເຕືອນເຖິງການຂາດເຂີນນໍ້າຂອງອິຕາລີໃນເດືອນມັງກອນຜ່ານມາ ຫລັງມີຫິມະຕົກໜ້ອຍກວ່າເກົ່າຫລາຍ.

ຂະນະທີ່ ນາຍົກລັດຖະມົນຕີ ທ່ານ ນາງ ຈໍເຈຍ ເມໂລນີ ຜູ້ນໍາອິຕາລີ ກ່າວຕໍ່ລັດຖະສະພາ ໃນວັນທີ 21 ມີນາຜ່ານມາວ່າ: ທ່ານກໍາລັງເຮັດວຽກຮ່ວມກັບໜ່ວຍງານລະດັບພາກພື້ນ ແລະ ລະດັບເມືອງ ກ່ຽວກັບ “ແຜນນໍ້າແຫ່ງຊາດ” ເພື່ອປັບປຸງໂຄງລ່າງພື້ນຖານດ້ວຍເຕັກໂນໂລຊີໃໝ່ ແລະ ສ້າງຈິດສໍານຶກສາທາລະນະກ່ຽວກັບຄວາມຈໍາເປັນໃນການປະຢັດນໍ້າ.

ເຂົ້າ ເປັນໜຶ່ງໃນພືດທີ່ຕ້ອງການນໍ້າປະລິມານຫລາຍ ເຊິ່ງການປູກເຂົ້າຕ້ອງໃຊ້ນໍ້າລະຫວ່າງ 3.000-10.000 ລິດ ເພື່ອໃຫ້ໄດ້ຜົນຜະລິດ 1 ກິໂລ. ທັງນີ້ ປະລິມານນໍ້າທີ່ໃຊ້ຍັງຂຶ້ນຢູ່ກັບສາຍພັນເຂົ້າ ແລະ ເງື່ອນໄຂອື່ນໆນຳອີກ.