ເລື່ອງໜ້າຮູ້ກ່ຽວກັບສິວສະເຕຍຣອຍ

ເລື່ອງຂອງສິວ ດັ່ງທີ່ຮູ້ກັນດີວ່າມີຫລາຍປະເພດ ເຖິງວ່າສິວຈະບໍ່ໄດ້ເປັນອັນຕະລາຍກັບຮ່າງກາຍຂອງເຮົາ ແຕ່ກໍສາມາດເຮັດໃຫ້ໃບໜ້າຂອງຫລາຍຄົນໝົດຄວາມໝັ້ນໃຈໄດ້ ເຊິ່ງບັນຫາສິວສ່ວນຫລາຍກໍຈະມີທັງສິວຜື່ນ, ສິວຝົດເຫື່ອ, ສິວອັນຕັນ, ສິວສ້ຽນ, ສິວອັກເສບ, ສິວຫົວຊ້າງ ຫລື ແມ່ນແຕ່ສິວສະເຕຍຣອຍ. ມື້ນີ້ພວກເຮົາຈະມາເວົ້າເຖິງສິວສະເຕຍຣອຍ ທີ່ຢາກຈະໃຫ້ທຸກທ່ານມາສ້າງຄວາມຮູ້ຈັກກັນໃຫ້ຫລາຍຂຶ້ນ.

• ສິວສະເຕຍຣອຍ ແມ່ນຫຍັງ ? ສິວສະເຕຍຣອຍບໍ່ແມ່ນສິວ, ແຕ່ເປັນສະເຕຍຣອຍ ຫລື ສິວຕິດສານ ເປັນພະຍາດຜິວໜັງຊະນິດໜຶ່ງທີ່ເກີດຈາກການໃຊ້ສະເຕຍຣອຍຕິດຕໍ່ກັນເປັນເວລາດົນ, ຢູ່ໃນຢາກຸ່ມ Corticosteroid anabolic steroids ແລະ ສະເຕຍຣອຍແບບບທາ (Topical steroids) ຫລາຍເກີນໄປ ດົນກ່ວາກຳນົດ ເຊັ່ນ: ສະເຕຍຣອຍຊະນິດທາ ໃນຜະລິດຕະພັນທີ່ດູແລຜິວຕ່າງໆ ບໍ່ວ່າຈະເປັນຄຣີມໜ້າໃສ, ຄຣີມໜ້າຂາວ, ສະບູລ້າງໜ້າ, ຄຣີມກັນແດດ, ຢາປິ່ນປົວສິວ ເມື່ອໃຊ້ຕໍ່ເນື່ອງໄປດົນໆຈະມີຜົນຂ້າງຄຽງໄດ້ ຈົນສົ່ງຜົນກັບລະບົບຮ່າງກາຍ ແລະ ເຮັດໃຫ້ເກີດພະຍາດຜິວໜັງອື່ນໆ ທັງອາການຂອງສິວ, ຮູຂຸມຂົນອັກເສບ ແລະ ຜິວໜັງອັກເສບ.
• ລັກສະນະຂອງສິວສະເຕຍຣອຍ :​ ຫລາຍໆທ່ານອາດຈະແຍກບໍ່ອອກວ່າ ສິວສະເຕຍຣອຍນັ້ນຕ່າງຈາກສິວອັກເສບ ຫລື ສິວອື່ນໆແນວໃດ ສັງເກດງ່າຍໆ ຕາມນີ້ເລີຍ.

1. ມີສິວຝົດຜື່ນ, ສິວອັດຕັນຂຶ້ນເປັນຜື່ນໆ, ເປັນເປີ້ນ.
2. ຜິວເປັນເປີ້ນແຜ່ນແດງໆ ຄືກັບແພ້ຫຍັງມາ.
3. ຜິວເລີ່ມບາງ ແລະ ແພ້ງ່າຍ.
4. ຜິວໜ້າມັນງ່າຍຫລາຍກ່ວາປົກກະຕິ.
5. ຫາກເປັນສິວອັກເສບ ກໍຈະອັກເສບເປັນຫົວແດງໆ ຕຸ່ມໃຫຍ່ ແລະ ເຈັບ.

• ການປິ່ນປົວສິວສະເຕຍຣອຍ :

1. ເຊົາໃຊ້ຜະລິດຕະພັນທຸກປະເພດທີ່ມີສ່ວນປະສົມຂອງສະເຕຍຣອຍ.
2. ໃຊ້ຜະລິດຕະພັນທີ່ມີຄວາມອ່ອນໂຍນຕໍ່ຜິວ, ປາສະຈາກສະບູ, ນຳ້ຫອມ, AHA/BHA ແລະ ກົດວິຕາມິນ
3. ໃຊ້ສະກິນແຄທີ່ມີເນັ້ນໃຫ້ຜິວແຂງແຮງ, ຄືນຄວາມດຸ່ນດ່ຽງໃຫ້ແກ່ຜິວ, ຕື່ມຄວາມຊຸ່ມຊື່ນ.
4. ບໍ່ຮຸກຖູ ຫລື ຂັດຜິວ, ລອກຜິວ, ຂັດໜ້າ ຫລື ນວດໜ້າ.
5. ພະຍາຍາມຫລີກເວັ້ນການຖືກແສງແດດ ເພາະຜິວທີ່ຖືກແສງແດດຈະຟື້ນຕົວເອງຊ້າ ແລະ ອາດຈະໄປກະຕຸ້ນການແຜ່ລາມຂອງສິວຂຶ້ນມາອີກ.
6. ດື່ມນຳ້ຫລາຍໆ, ກິນອາຫານທີ່ມີປະໂຫຍດ ແລະ ພັກຜ່ອນໃຫ້ພຽງພໍ.