ໂຣນັລໂດ ສ້າງສະຖິຕິໃຫມ່ເປັນນັກເຕະລົງຫລິ້ນໃຫ້ທີມຊາດຫລາຍທີ່ສຸດໃນໂລກ

ຄຣິສຕຽນໂນ ໂຣນັລໂດ ກອງໜ້າຊຸບເປີສະຕາ ທີມຊາດໂປຣຕຸເກສ ສ້າງສະຖິຕິກາຍເປັນນັກເຕະທີ່ລົງສະໜາມໃຫ້ທີມຊາດທີ່ສຸດໃນປະຫວັດສາດດ້ວຍຈຳນວນ 197 ນັດ.

ໂດຍ ໂຣນັລໂດ ໄດ້ລົງສະໜາມເປັນຕົວຈິງໃນເກມທີ່ ໂປຣຕຸເກສ ຖະຫລົ່ມ ລິເຕນສະໄຕ 4-0 ໃນບານເຕະຢູໂຣ 2024 ຮອບຄັດເລືອກ ກຸ່ມ ເຈ ນັດທຳອິດ ເມື່ອວັນທີ 23 ມີນາ.

ຈາກການລົງສະໜາມດັ່ງກ່າວສົ່ງຜົນໃຫ້ ໂຣນັລໂດ ສ້າງປະຫວັດສາດກາຍເປັນນັກເຕະທີ່ລົງສະໜາມໃຫ້ກັບທີມຊາດຫລາຍທີ່ສຸດດ້ວຍຈຳນວນ 197 ນັດ ແຊງໜ້າສະຖິຕິຂອງ ບາເດີ ອັລ ມູຕາວາ ນັກເຕະທີມຊາດຄູເວດ ທີ່ຫລິ້ນໃຫ້ທີມຊາດໄປ 196 ນັດ.

ນອກຈາກນັ້ນ ດາວເຕະອາຍຸ 38 ປີ ຍັງທຳລາຍສະຖິຕິທີ່ໜ້າສົນໃຈອີກຫລາຍຢ່າງໃນເກມນີ້ທີ່ລາວເຫມົາຄົນດຽວ 2 ປະຕູລວດ ເລີ່ມຈາກເປັນນັກເຕະທີ່ສາມາດຍິງປະຕູໃນນາມທີມຊາດໂປຣຕຸເກສໄດ້ທຸກໆປີ ນັບຕັ້ງແຕ່ປີ 2004, ຍິງປະຕູໃຫ້ທີມຊາດ 120 ປະຕູ ແລະ ຍິງປະຕູຈາກບານຟຣີຄິກ ທີ່ 60 ປະຕູ ໃນອາຊີບນັກເຕະເປັນຕົ້ນ.