ມີຫລາຍປັດໄຈ ທີ່ຕ້ອງເອົາໃຈໃສ່ ເພື່ອໃຫ້ຜູ້ຂັບຂີ່ໄດ້ຮັບຄວາມປອດໄພເທິງທ້ອງຖະໜົນ

ໂດຍ: ມຶກບໍ່ແຫ້ງ

ການເກີດອຸບັດເຫດເທິງທ້ອງຖະໜົນຂອງລາວຍັງມີອັດຕາສູງ ແລະເປັນສາເຫດທີ່ສຳຄັນຂອງການເສຍຊີວິດ ແລະເສຍອົງຄະຂອງຄົນຈຳນວນບໍ່ໜ້ອຍໃນແຕ່ລະປີ ເພາະສະນັ້ນ ຈະສາມາດເພີ່ມລະດັບຄວາມປອດໄພຂຶ້ນໄດ້ແນວໃດ?

ການເສຍຊີວິດຂອງຜູ້ຂັບຂີ່ລົດຈັກທີ່ຈອດຖ້າໄຟແດງທີ່ນະຄອນຫຼວງວຽງຈັນເມື່ອບໍ່ດົນຜ່ານມານີ້ ເປັນໜ້າເສົ້າໃຈທີ່ສຸດ ເພາະຜ່ານມາສ່ວນຫຼາຍພວກເຮົາໄດ້ຍິນແຕ່ວ່າ ການລ່ວງໄຟແດງແມ່ນມີຄວາມສ່ຽງຕໍ່ອຸບັດເຫດ ແລະເກີດຂຶ້ນແລ້ວຫຼາຍກໍລະນີ ແຕ່ດຽວນີ້ ການຈອດຖ້າໄຟແດງກໍຕ້ອງໄດ້ລະມັດລະວັງມີສະຕິ ຄືກັນ ເພາະບໍ່ຮູ້ວ່າ ລົດບັນທຸກ ຫຼື ລົດຂະໜາດໃຫຍ່ຈະມາຊົນດ້ານຫຼັງໄດ້ເມື່ອໃດ ໂດຍສະເພາະຜູ້ຂັບຂີ່ລົດຈັກ.

ອີງຕາມສະຖິຕິຂອງກະຊວງປ້ອງກັນຄວາມສະຫງົບໃນປີ 2022 ນັ້ນ ມີອຸບັດເຫດທາງຖ້ອງຖະໜົນທັງໝົດ 6,440 ຄັ້ງທົ່ວປະເທດ ມີຜູ້ເສຍຊີວິດ 947 ກໍລະນີ ແລະ ບາດເຈັບ 6,315 ກໍລະນີ. ມູນຄ່າຄວາມເສຍຫາຍຂອງຊັບສິດທັງໝົດປະມານ 103 ​ຕື້ກີບ ຫຼື ກວ່າ 6 ລ້ານໂດລາສະຫະລັດ. ຈາກສະພາບການດດັ່ງກ່າວເຫັນວ່າອຸບັດເຫດເພີ່ມຂຶ້ນຈາກ 2021 ທີ່ມີອຸບັດເຫດເກີດຂຶ້ນທັງໝົດ 5.576 ກໍລະນີ ແລະມີຜູ້ເສຍຊີວິດ 531 ກໍລະນີ ແລະ ບາດເຈັບ 8,388​ ກໍລະນີ ຈາກການລາຍງານດ່ັງກ່າວມານີ້ເຫັນວ່າ ອຸບັດເຫດ ເທິງທ້ອງຖະໜົນແມ່ນສາເຫດຂອງການເສຍຊີວິດຂອງປະຊາຊົນ ຈຳນວນບໍ່ໜ້ອຍໃນແຕ່ລະປີ ເຊັ່ນດຽວກັບ ຜູ້ບາດເຈັບ ແລະ ມີມູນຄ່າຄວາມເສຍຫຼາຍຈຳນວນມະຫາສານ.

ການດຳເນີນມາດຕະການ ປ້ອງກັນ ແລະຍົກສູງຄວາມປອດໄພເທິງທ້ອງຖະໜົນ ຈຶ່ງເປັນສິ່ງຈຳເປັນຮີບດ່ວນທີ່ສຸດ ເປັນຕົ້ນແມ່ນ ທົບທວນຄືນກັບການຄວບຄຸມລົດບັນທຸກ, ລົດຂະໜາດໃຫຍ່ແລ່ນເຂົ້າໃຈກາງເມືອງໃນຊົ່ວໂມງເລັ່ງດ່ວນ ຫຼື ສະພາບເຕັກນິກຂອງລົດ ແລະຫຼາຍກໍລະນີ ຜູ້ຂັບລົດບັນທຸກ, ລົດທີ່ຮັບໃຊ້ວຽກງານກໍ່ສ້າງອື່ນໆ ແມ່ນຍັງມີຄວາມປະໝາດ, ບໍ່ໃຫ້ກຽດລົດນ້ອຍ ລະເມີດ ລະບຽບການຈາລະຈອນອື່ນໆ ເຊິ່ງຄວນໄດ້ຮັບການສຶກສາອົບຮົມ, ຄຸ້ມຄອງຢ່າງຮັດກຸມຂຶ້ນຕື່ມ ເພາະວ່າການເກີດອຸບັດເຫດທີ່ຮ້າຍແຮງຫຼາຍກໍລະນີຜ່ານມາ ແມ່ນກ່ຽວກັບລົດບັນທຸກຂະໜາດໃຫຍ່.

ການລະເມີດການສັນຈອນຂອງຜູ້ຂັບຂີ່ຍັງມີຫຼາຍ ໂດຍສະເພາະ ສາເຫດທີ່ເປັນ ຄລາສສິກ ຂອງປະເທດເຮົາກໍວ່າໄດ້ຄື “ເມົາແລ້ວຂັບ”, ການຂັບຂີ່ຜິດທິດທາງ ເຊິ່ງເປັນສາເຫດຂອງການເກີດອຸບັດເຫດຫຼາຍຕໍ່ຫຼາຍຄັ້ງມາແລ້ວ. ຍິ່ງໄປກວ່ານັ້ນ ການລະເຫຼີງການສວບໃສ່ໝວກກັນເນາະເວລາຂັບຂີ່ແມ່ນເຫັນຢ່າງຫຼວງຫຼາຍຕາມທ້ອງຖະໜົນ ໂດຍສະເພາະ ແມ່ນໝູ່ນັກຮຽນ ມໍປາຍ ເຊິ່ງແມ່ນມີຄວາມສ່ຽງຫຼາຍທີ່ສຸດ ໂດຍສະເພາະ ບັນດາສະຖາບັນຫຼາຍແຫ່ງທີ່ມີຊື່ສຽງ.

ພ້ອມນັ້ນ, ພວກເຮົາຍັງສັງເກດເຫັນວ່າເສັ້ນທາງຫຼາຍຈຸດໃນເຂດໃຈກາງເມືອງນະຄອນຫຼວງວຽງຈັນ ແມ່ນບໍ່ເຫັນຮອດລາຍ, ເຮັດໃຫ້ຜູ້ຂັບຂີ່ບໍ່ສາມາດຈຳແນກໄດ້ຊັດເຈນຂອບເຂດເລນຕົນເອງ ຫຼື ບ່ອນຈອດຖ້າໄຟແດງກໍບໍ່ເຫັນລາຍຂອງທາງມ້າລາຍ ເຮັດໃຫ້ການຈອດລົດຖ້າໄຟແດງບໍ່ຄ່ອຍເປັນລະບຽບ ແລະເມື່ອໄຟແດງຕາຍ ບາງບ່ອນໃຊ້ເວລາດົນ ກວ່າຈະສາມາດມາສ້ອມແປງ ເຊິ່ງກໍມີສ່ຽງການເກີດອຸບັດເຫດເຊັ່ນກັນ.

ທັງໝົດນີ້ ພາກສ່ວນກ່ຽວຂ້ອງຈະຕ້ອງໄດ້ກວດກາຄືນ ແລະໃສ່ລະບຽບຕາມຄວາມເໝາະສົມ, ສ້າງຈິດສຳນຶກສັງຄົມໃຫ້ໄດ້ຢ່າງກວ້າງຂວາງ.

ສິ່ງດັ່ງກ່າວຄວນໄດ້ຮັບການກວດກາ ແລະຈັດສັນງົບປະມານທີ່ຈຳເປັນ ເພື່ອແກ້ໄຂໃຫ້ທັນກັບສະພາບການ ຫຼຸດຜ່ອນຄວາມສ່ຽງອຸບັດເຫດທີ່ອາດຈະເກີດຂຶ້ນ.