ປະທານປະເທດແຫ່ງ ສປປ ລາວ ພົບປະໂອ້ລົມການນຳແຂວງເຊກອງ

ຕອນເຊົ້າວັນທີ 24 ມີນາ 2023 ນີ້, ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ໄດ້ລົງເຄື່ອນໄຫວເຮັດວຽກ ແລະ ເຂົ້າຮ່ວມກອງປະຊຸມວຽກງານການເມືອງ-ແນວຄິດ ທີ່ແຂວງເຊກອງ, ທ່ານໄດ້ໂອ້ລົມຊີ້ນຳຫລາຍບັນຫາສຳຄັນໃຫ້ການນຳແຂວງເຊກອງ, ເຊິ່ງໃຫ້ກຽດຕ້ອນຮັບໂດຍທ່ານ ເຫລັກໄຫລ ສີວິໄລ ກຳມະການສູນກາງພັກ, ເລຂາພັກແຂວງ ເຈົ້າແຂວງເຊກອງ, ມີຄະນະລັດຖະມົນຕີ, ການນຳຫລັກແຫລ່ງຂອງແຂວງ ແລະ ເມືອງເຂົ້າຮ່ວມ.

ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ໄດ້ລາຍງານຜົນສຳເລັດກອງປະຊຸມວຽກງານການເມືອງ-ແນວຄິດທົ່ວແຂວງເຊກອງ ໂດຍຫຍໍ້ ແລະ ທິດທາງແຜນການ ຮອດປີ 2025 ຊຶ່ງໄດ້ຍົກໃຫ້ເຖິງຜົນງານ-ຜົນສຳເລັດໃນການປະຕິບັດໜ້າທີ່ວຽກງານຂອງຄະນະພັກ ແຕ່ລະຂັ້ນກ່ຽວກັບວຽກງານການເມືອງ-ແນວຄິດ, ເວລາໃດກໍຖືສຳຄັນວຽກງານດັ່ງກ່າວ ເປັນໜ້າທີ່ສໍາຄັນພື້ນຖານ, ເປັນວຽກງານກົກ, ເປັນວຽກງານທີ່ຕ້ອງເຮັດກ່ອນ, ເຮັດເປັນປະຈໍາ ແລະ ສອດຫ້ອຍໄປທຸກຂົງເຂດວຽກງານຂອງພັກ-ລັດຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງສັງຄົມ, ບົນຈິດໃຈດັ່ງກ່າວ ຄະນະນໍາພັກ-ລັດ, ອົງການຈັດຕັ້ງແນວລາວສ້າງຊາດ ແລະ ອົງການຈັດຕັ້ງມະຫາຊົນທຸກຂັ້ນ ໄດ້ເອົາໃຈໃສ່ຈັດຕັ້ງເຜີຍແຜ່, ເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ ໂດຍຕິດພັນກັບມະຕິກອງປຊຸມໃຫຍ່ຄັ້ງທີ X ຂອງອົງຄະນະພັກແຂວງເຊກອງ ເອົາໃຈໃສ່ເຜີຍແຜ່ເຊື່ອມຊຶມການຈັດຕັ້ງຜັນຂະຫຍາຍ ເອກະສານວ່າດ້ວຍ ການປະຕິບັດວາລະແຫ່ງຊາດ, ການປະຕິບັດມາດຕະການປ້ອງກັນຄວບຄຸມ ສະກັດກັ້ນ ແລະແກ້ໄຂການແຜ່ລະບາດຂອງພະຍາດໂຄວິດ-19 ແລະ ນິຕິກໍາອື່ນໆທີ່ສໍາຄັນ ຂອງພັກ ຂອງຊາດ ໃຫ້ແກ່ພະນັກງານຫຼັກແຫຼ່ງ, ທະຫານ, ຕຳຫຼວດ, ສະມາຊິກພັກ, ພະນັກງານລັດຖະກອນ ແລະ ປະຊາຊົນບັນດາເຜົ່າຮັບຮູ້ເຂົ້າໃຈຢ່າງທົ່ວເຖິງ. ພ້ອມກັນນີ້, ທີ່ປະຊຸມກໍໄດ້ຮັບຟັງການປະກອບຄຳຄິດ-ຄຳເຫັນຈາກເລຂາພັກເມືອງ, ຄະນະພັກສອງກຳລັງປະກອບອາວຸດ, ພະແນກການອ້ອມຂ້າງແຂວງ ຈຳນວນ 15 ພາກສ່ວນ, ຊຶ່ງແຕ່ລະພາກສ່ວນໄດ້ຍົກໃຫ້ເຫັນ ຄວາມເອົາໃຈໃສ່ ຂອງຄະນະພັກແຕ່ລະຂັ້ນ ກ່ຽວກັບສຶກສາອົບຮົມການເມືອງ-ແນວຄິດໃຫ້ແກ່ພະນັກງານ, ສະມາຊິກພັກ ຕະຫຼອດຮອດປະຊາຊົນບັນດາເຜົ່າ ທີ່ຢູ່ໃນການຄຸ້ມຄອງຂອງຕົນ ແລະ ທົ່ວສັງຄົມ ດ້ວຍຄວາມຮັບຜິດຊອບສູງ.

ໃນໂອກາດດັ່ງກ່າວ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ໄດ້ມີຄໍາເຫັນໂອ້ລົມ ແລະ ເນັ້ນໜັກຫຼາຍບັນຫາສໍາຄັນ ສືບຕໍ່ຈັດຕັ້ງປະຕິບັດບັນດາແຜນການ ແລະ ວຽກຈຸດສຸມຕໍ່ໃຫ້ມີຜົນສຳເລັດ ເຊິ່ງວຽກງານຈຸດສຸມທີ່ຕ້ອງໄດ້ເອົາໃຈໃສ່ແມ່ນວຽກງານການເມືອງແນວຄິດ, ດ້ວຍການຜັນຂະຫຍາຍທຸກມະຕິ, ຄຳສັ່ງຂອງພັກໃຫ້ບັນດາສະຫາຍສະມາຊິກພັກເຊື່ອມຊຶມ, ກຳແໜ້ນໄປພ້ອມກັບການສຶກສາອົບຮົມທາງດ້ານການເມືອງໃຫ້ມີຄວາມຫຼັກໝັ້ນ ແລະ ເປັນເອກະພາບຕໍ່ແນວທາງຂອງພັກຢ່າງເລິກເຊິ່ງ, ສືບຕໍ່ປັບປຸງແກ້ໄຂຊີວິດການເປັນຢູ່ຂອງປະຊາຊົນໃຫ້ຫຼຸດພົ້ນຈາກຄວາມທຸກຍາກ, ດ້ວຍການສ້າງອາຊີບຄົງທີ່ໃຫ້ເຂົ້າເຈົ້າມີວຽກເຮັດງານທຳ; ເອົາໃຈໃສ່ປັງປຸງວຽກງານການພັດທະນາຊັບພະນາກອນມະນຸດ ດ້ວຍການສົ່ງເສີມໃຫ້ເດັກໃນເກນອາຍຸໄດ້ເຂົ້າໂຮງຮຽນໃຫ້ທົ່ວເຖິງ, ປັບປຸງລະບົບຕາໜ່າງການສຶກສາໃຫ້ກ້ວາງຂວາງ ແລະ ແກ້ໄຂບັນຫາປະລະການຮ່ຳຮຽນຂອງເດັກ, ພ້ອມນັ້ນ ໃຫ້ເອົາໃຈໃສ່ຕິດຕາມຂໍ້ມູນຂ່າວສານທີ່ເປັນປະໂຫຍດ, ເປັນກະບອກສຽງຂອງພັກລັດເປັນຕົ້ນສື່ວິທະຍຸ-ໂທລະພາບ ແລະສື່ສິ່ງພິມອື່ນໆທີ່ຫນ້າເຊື່ອຖືໄດ້ ເພື່ອຮັບຮູ້ຂໍ້ມູນຂ່າວສານທັນເຫດການ ຕິດພັນກັບການປັບປຸງຄຸນນະພາບຂອງສື່ຕ່າງໆໃຫ້ມີຫຼາກຫຼາຍຮູບແບບ, ຫຼາຍສີສັນ ແລະໃຫ້ມີເນື້ອໃນຖືກຕ້ອງຕາມເຫດການ ເພື່ອເປັນຊ່ອງທາງທີ່ສຳຄັນ ໃຫ້ສັງຄົມຮັບຮູ້ເຫດການອັນພົ້ນເດັ່ນເກີດຂຶ້ນຢູ່ພາຍໃນ ແລະ ຕ່າງປະເທດ.