ການດຳເນີນທຸລະກິດທີ່ດິນ ຕ້ອງມີໃບອະນຸຍາດຈາກກະຊວງອຸດສາຫະກຳ ແລະ ການຄ້າ ຖ້າບໍ່ມີຫ້າມດຳເນີນໂດຍເດັດຂາດ
ວັນທີ 14 ມີນາ 2023 ຜ່ານມານີ້ ກົມທີ່ດິນ ກະຊວງຊັບພະຍາກອນ ແລະ ສິ່ງແວດລ້ອມ ອອກແຈ້ງການ ເລື່ອງການຂໍໃບອະນຸຍາດດໍາເນີນທຸລະກິດກ່ຽວກັບທີ່ດິນ ວ່າ: ທ່ານ ໃດທີ່ມີຈຸດປະສົງ ຢາກດໍາເນີນທຸລະກິດກ່ຽວກັບທີ່ດິນເຊັ່ນ:
- ການບໍລິການສໍາຫຼວດວັດແທກ ແລະ ສ້າງແຜນທີ່ຕາດິນ;
- ການບໍລິການປະເມີນລາຄາທີ່ດິນ ເພື່ອຈຸດປະສົງການຊື້-ຂາຍ, ແລກປ່ຽນສິດນໍາໃຊ້ທີ່ດິນ, ເອົາທີ່ດິນເຂົ້າເປັນ ຮຸ້ນ, ເປັນຫຼັກຊັບຄໍ້າປະກັນ;
- ການຊື້ ຂາຍສິດນໍາໃຊ້ທີ່ດິນ ດ້ວຍທຶນຂອງຕົນເອງ ເປັນຕົ້ນ ການຊື້-ຂາຍສິດນໍາໃຊ້ທີ່ດິນ ເພື່ອຂາຍເກງກໍາໄລ ຫຼື ຈັດສັນທີ່ດິນແບ່ງຂາຍເປັນຕອນ ຫຼື ປຸກສ້າງເຮືອນຈັດສັນຂາຍເປັນແຕ່ລະຕອນ ແລະ ການພັດທະນາເປັນ ຕົວເມືອງໃໝ່ເເລ້ວຈັດສັນຂາຍເປັນຕອນ, ສ້າງເປັນຄອນໂດມີນຽມ, ອາພາດເມັນ ແລະ ການຊື້ ຂາຍ ສິດນໍາ ໃຊ້ທີ່ດິນຂອງລັດແບບມີກໍານົດ ທີ່ພົວພັນກັບສິດນໍາໃຊ້ທີ່ດິນ
- ການບໍລິການຊື້ ຂາຍສິດນໍາໃຊ້ທີ່ດິນ ແລະ ການບໍລິການອື່ນກ່ຽວກັບທີ່ດິນ ເປັນຕົ້ນ ການໃຫ້ຄໍາປຶກສາ ເເລະ ເປັນນາຍໜ້າໃຫ້ບຸກຄົນອື່ນ ກ່ຽວກັບທີ່ດິນ ເປັນຕົ້ນ ການຊື້-ຂາຍ, ການມອບ ຫຼື ຍົກສິດນໍາໃຊ້ທີ່ດິນ, ແລກປ່ຽນ ສິດນໍາໃຊ້ທີ່ດິນ, ການເອົາສິດນໍາໃຊ້ທີ່ດິນເຂົ້າເປັນຮຸ້ນ, ການເຊົ່າ ຫຼື ສໍາປະທານທີ່ດິນ, ການສ້າງ ລະບົບຖານຂໍ້ມູນກ່ຽວກັບການຄຸ້ມຄອງ-ບໍລິຫານທີ່ດິນ.
ການດໍາເນີນທຸລະກິດກ່ຽວກັບທີ່ດິນ ທີ່ກ່າວມາຂ້າງເທິງນີ້ ຕ້ອງໄດ້ຂໍໃບທະບຽນວິສາຫະກິດ ຈາກກົມທະບຽນ ແລະ ຄຸ້ມຄອງວິສາຫະກິດ, ກະຊວງອຸດສາຫະກໍາ ແລະ ການຄ້າກ່ອນ ຈາກນັ້ນ ຈຶ່ງມາຂໍໃບອະນຸຍາດດໍາເນີນທຸລະກິດກ່ຽວກັບທີ່ດິນ ນໍາກົມທີ່ດິນ ເພື່ອໃຫ້ຖືກຕ້ອງຕາມກົດໝາຍວ່າດ້ວຍທີ່ດິນ ສະບັບເລກທີ 70/ສພຊ, ລົງວັນທີ 21 ມິຖຸນາ 2019 ແລະ ສອດຄ່ອງຕາມຂໍ້ຕົກລົງ ວ່າດ້ວຍທຸລະກິດກ່ຽວກັບທີ່ດິນ ສະບັບເລກທີ 4329/ກຊສ, ລົງວັນທີ 23 ສິງຫາ 2022.
ກໍລະນີຢູ່ບັນດາແຂວງ ແລະ ນະຄອນຫຼວງວຽງຈັນ ແມ່ນໃຫ້ຂໍໃບທະບຽນວິສາຫະກິດ ຈາກພະແນກອຸດສາຫະ ກໍາ ແລະ ການຄ້າ ແຂວງ, ນະຄອນຫຼວງວຽງຈັນ ກ່ອນ ຈາກນັ້ນ ຈຶ່ງສະເຫນີຂໍໃບອະນຸຍາດດໍາເນີນທຸລະກິດກ່ຽວກັບທີ່ດິນ ນໍາພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງ, ນະຄອນຫຼວງວຽງຈັນ.
ຖ້າຫາກວ່າບໍ່ມາຂໍໃບອະນຸຍາດດໍາເນີນທຸລະກິດກ່ຽວກັບທີ່ດິນ ແມ່ນບໍ່ສາມາດເຄື່ອນໄຫວດໍາເນີນທຸລະກິດກ່ຽວທີ່ດິນໄດ້ ຢ່າງເດັດຂາດ.
ດັ່ງນັ້ນ, ຈຶ່ງແຈ້ງມາຍັງທຸກພາກສ່ວນທີ່ມີຈຸດປະສົງດໍາເນີນທຸລະກິດກ່ຽວກັບທີ່ດິນ ເພື່ອຮັບຊາບ ແລະ ໃຫ້ການ ຮ່ວມມືໃນການຈັດຕັ້ງປະຕິບັດກົດໝາຍ ແລະ ລະບຽບການທີ່ກ່ຽວຂ້ອງ ຢ່າງເຂັ້ມງວດ
