ກາງເດືອນເມສາ 2023 ນີ້ ລົດໄຟລາວ-ຈີນ ຈະເລີ່ມແລ່ນຈາກນະຄອນຫລວງວຽງຈັນ ຫາ ນະຄອນຄຸນໝິງ ສປ ຈີນ

ວັນທີ 22 ມີນາ 2023, ທ່ານ ວົງທອງ ສຸພັນທອງ ຮອງຫົວໜ້າວິສະວະກອນໃຫຍ່ ບໍລິສັດທາງລົດໄຟລາວ-ຈີນ ຈໍາກັດ ໃຫ້ສໍາພາດຕໍ່ CMG ປະຈໍາລາວ ວ່າ: ບໍລິສັດທາງລົດໄຟລາວ-ຈີນ ຈະເປີດບໍລິການລະຫວ່າງປະເທດ ຈາກນະຄອນຫລວງວຽງຈັນ ຫາ ນະຄອນຄຸນໝິງ ສປ ຈີນ, ນະຄອນຄຸນໝິງ-ນະຄອນຫລວງວຽງຈັນ ໃນກາງເດືອນເມສາ 2023 ນີ້. ປັດຈຸບັນແມ່ນຢູ່ໃນຂັ້ນຕອນການປະສານສົມທົບ ການກະກຽມຄວາມພ້ອມໃນດ້ານຕ່າງໆຂອງທັງສອງຝ່າຍລາວ-ຈີນ ເພື່ອເປີດບໍລິການໃນກາງເດືອນເມສານີ້.

ສໍາລັບຮູບແບບການເດີນທາງດ້ວຍລົດໄຟລະຫວ່າງປະເທດ, ລົດໄຟທີ່ອອກຈາກນະຄອນຫລວງວຽງຈັນໄປຮອດສະຖານີຄຸນໜິງ ສປ ຈີນ ຕ້ອງໄດ້ລົງແຈ້ງເອກະສານເຂົ້າ-ອອກເມືອງຢູ່ສະຖານີບໍ່ເຕ່ນ ສປປ ລາວ ກ່ອນ. ຈາກນັ້ນ, ໄປແຈ້ງເຂົ້າເມືອງຢູ່ສະຖານີບໍ່ຫານ ສປ ຈີນ ເພື່ອເຂົ້າ ສປ ຈີນ ເຊິ່ງອີງໃສ່ລະບຽບການເຂົ້າ-ອອກຂອງແຕ່ລະປະເທດ.

ອີງຕາມສະຖິຕິບໍລິສັດລົດໄຟລາວ-ຈີນໃຫ້ຮູ້ວ່າ: ຫລັງຈາກ ສປປ ລາວ ແລະ ສປ ຈີນ ໄດ້ປະກາດເປີດປະເທດ, ມີນັກທອ່ງທ່ຽວ, ນັກທຸລະກິດ ເດີນທາງໄປ-ມາຢ່າງຫລວງຫລາຍ ໂດຍຜ່ານທາງລົດໄຟລາວ-ຈີນ ເຂົ້າທາງສະຖານີບໍ່ເຕ່ນ ເພື່ອເຂົ້າມາ ສປປ ລາວ ແລະ ຈຸດຕ່າງໆຕາມແລວທາງລົດໄຟ ໂດຍສະເລ່ຍແລ້ວມີປະມານ 1.500-1.600 ຄົນຕໍ່ມື້.