ເກີດແຜ່ນດິນໄຫວ 6,5 ຣິກເຕີ ໃນພາກພື້ນອາຊີໃຕ້ ເສຍຊີວິດ ຫລາຍກວ່າ 10 ຄົນ

ສຳນັກຂ່າວຕ່າງປະເທດລາຍງານ: ສຳນັກສຳຫລວດ ທໍລະນີ ວິທະຍາ ສ.ອາເມລິກາ ຫລື ຢູເອສຈີເອສ ລາຍງານວ່າ: ວັນທີ 22 ມີນາ 2023 ຜ່ານມາ, ເກີດເຫດ ແຜ່ນດິນໄຫວ ຂະໜາດ 6,5 ຣິກເຕີ ໃນຫລາຍພື້ນທີ່ ຢູ່ອາຊີໃຕ້. ໃນນັ້ນ ລວມທັງ ອັບຟະການິດສະຖານ, ປາກິດສະຖານ ແລະ ບາງພື້ນທີ່ ຂອງ ອິນເດຍ ໂດຍມີ ສູນກາງ ຢູ່ໃກ້ກັບເມືອງ ຈຣູມ ທາງພາກ ຕາເວັນອອກສຽງເໜືອຂອງ ອັບຟະການິດສະຖານ ໂດຍເລິກລົງໄປ ໃຕ້ພື້ນດິນ ປະມານ 187 ກິໂລແມັດ ເຮັດໃຫ້ມີ ຜູ້ເສຍຊີວິດ ຢ່າງໜ້ອຍ 11 ຄົນ ແລະ ບາດເຈັບເລັກໜ້ອຍ 180 ຄົນ, ສ້າງຄວາມເສຍຫາຍ ໃຫ້ແກ່ອາຄານ, ບ້ານເຮືອນຈຳນວນ ຫລວງຫລາຍ ຂອງ 3 ປະເທດນີ້. ເຫດການໃນຄັ້ງນີ້ ສົ່ງຜົນໃຫ້ ຜູ້ຄົນພາກັນແຕກຕື່ນ ແລ່ນອອກຈາກ ເຮືອນຊານ. ປັດຈຸບັນ, ໜ່ວຍງານກ່ຽວຂ້ອງ ກຽມຮັບມືກັບ ໄພພິບັດ ແລະ ໜ່ວຍງານ ສາທາລະນະສຸກ ຂອງ ອັບຟະການິດສະຖານ, ປາກິດສະຖານ ຍັງຢູ່ໃນລະຫວ່າງ ກຽມຄວາມພ້ອມ ໃນການຮັບມືກັບ ເຫດສຸກເສີນ ແລະ ການຊ່ວຍເຫລືອປະຊາຊົນ.