ກຽມຈິດໃຈສະຫລອງປີໃໝ່ໃຫ້ໄດ້ຮັບໝາກຮັບຜົນ ຮັກສາໄດ້ຮີດຄອງປະເພນີອັນດີງາມ

ໂດຍ: ທິດກໍ່າ
ຍັງອີກ​ 2 ອາທິດກວ່າໆກໍຈະຮອດບຸນປີໃໝ່ລາວ ພສ 2566, ຈສ 1385 ແລະ ຄສ 2023. ຕາມໂຫຣາສາດລາວໄດ້ກ່າວໄວ້ວ່າ: ປີໃໝ່ປີນີ້ປະຊາຊົນພົນລະເມືອງຈະມີຄວາມສຸກໃນລະດັບປານກາງ, ໝາກໄມ້ຈະດົກໜາ, ເຮັດນາໄດ້ເຂົ້າຫລາຍ. ວັນສັງຂານລ່ວງແມ່ນວັນສຸກ ກົງກັບວົນທີ 14 ເມສາ 2023, ສັງຂານເນົາຖືກວັນເສົາ ກົງກັບວັນທີ 15 ເມສາ 2023 ແລະ ສັງຂານຂຶ້ນກົງກັບວັນອາທິດ ວັນທີ 16 ເມສາ 2023 ນາງສັງຂານມີຊື່ວ່າ ກິມິທາເທວີ ຂີ່ຄວາຍເປັນພາຫະນະ ຈະມີຝົນຕົກ 500 ຫ່າ, ຕົກໃນມະຫາສະໝຸດ 100 ຫ່າ, ຕົກໃນຈັກກະວານ 200 ຫ່າ, ຕົກໃນປ່າຫິມະພານ 150 ຫ່າ ແລະ ຕົກໃນມະນຸດສະໂລກ 50 ຫ່າ.

ແຕ່ແນວໃດກໍຕາມ, ນີ້ເປັນພຽງຕໍາລາໂຫຣາສາດທີ່ຄູບາອາຈານເພິ່ນໄດ້ທໍານາຍທາຍທັກຕາມຕໍາຫລັກຕໍາລາມາໃຫ້ພວກເຮົາໄດ້ສຶກສາຄົ້ນຄວ້າຕິດຕາມ ສ່ວນຈະເປັນຄວາມຈິງພຽງໃດນັ້ນ ມັນກໍຂຶ້ນກັບການປ່ຽນແປງຂອງໂລກໃນແຕ່ລະໄລຍະມາເປັນຕົວວັດ, ແຕ່ຕາມທິດກໍ່າຄິດ ບຸນປີໃໝ່ລາວປີນີ້ຕ້ອງມ່ວນຊື່ນຄຶກຄັກແນ່ນອນ ເພາະມີຫລາຍປັດໄຈມາເອື້ອອໍານວຍໃຫ້ຢ່າງເຕັມຮູບແບບ ເປັນຕົ້ນອັນທີໜຶ່ງ ເຮົາຈະໄດ້ພັກຍາວນານເຖິງ 5 ວັນເຕັມ ເພາະຈະໄດ້ພັກຊົດເຊີຍ ຍ້ອນວ່າວັນສັງຂານເນົາກັບສັງຂານຂຶ້ນມັນຖືກວັນເສົາກັບວັນທິດ. ອັນສອງມາ ການແພ່ລະບາດຂອງພະຍາດໂຄວິດ-19 ໄດ້ມະຫັບມະຫາຍໄປຈາກເມືອງລາວເຮົາແລ້ວ, ພັກ ແລະ ລັດຖະບານໄດ້ເປີດປະເທດມາແຕ່ເດືອນພຶດສະພາ 2022 ເປັນຕົ້ນມາ, ສ່ວນອັນທີສາມ ກໍແມ່ນການໄປມາທ່ອງທ່ຽວຍິ່ງຈະສະດວກສະບາຍ ໂດຍສະເພາະແມ່ນທາງພາກເໜືອ ເພາະມີສາຍທາງລົດໄຟ ລາວ-ຈີນ ເປັນປັດໄຈພື້ນຖານໃນການໄປມາ. ເພາະສະນັ້ນ ນັກທ່ອງທ່ຽວຈະເຂົ້າມາທ່ຽວລາວໃນໄລຍະປີໃໝ່ຢ່າງຫລວງຫລາຍ ໂດຍສະເພາະຢູ່ຫລວງພະບາງ ແລະ ວັງວຽງ.

ສະນັ້ນ, ໃນໂອກາດວັນເວລານາທີທອງຂອງປີໃໝ່ລາວໄດ້ໝູນວຽນມາເຖິງ ຖ້າບ້ານໃດ, ເມືອງໃດ ຫລື ແຂວງໃດຮູ້ຊອກຮູ້ຫາເພື່ອດຶງເອົານັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາສໍາຜັດກໍຍິ່ງຈະເຮັດໃຫ້ການສະຫລອງປີໃໝ່ໄດ້ຮັບໝາກຮັບຜົນ ຍ້ອນໄດ້ທັງຮີດໄດ້ທັງຄອງ ທັງເປັນການສົ່ງເສີມປະເພນີວັດທະນະທໍາອັນດີງາມຂອງຊາດ. ອັນທີ່ພິເສດກໍຈະໄດ້ເງິນເຕັມຖົງຈາກເຮືອນພັກ, ໂຮງແຮມ, ຮ້ານອາຫານ, ການບໍລິການຂາຍສິນຄ້າ ແລະ ການບໍລິການນໍາທ່ຽວອື່ນໆ.

ໃນເງື່ອນໄຂທີ່ບ້ານເມືອງພວມມີບັນຫາທາງດ້ານເສດຖະກິດ-ການເງິນຫລຸດຖອຍ, ເງິນກີບລາວເຟີ້, ສິນຄ້າຂຶ້ນລາຄາແບບບໍ່ຢຸດຢ່ອນ ພວກເຮົາຕ້ອງຈັບໂອກາດໃຫ້ເປັນເງິນເປັນຄໍາເພື່ອຄວາມຢູ່ລອດຂອງປາກທ້ອງ.