UN ເຜີຍຜູ້ລີ້ໄພໜີຈາກມຽນມາ ເຂົ້າບັງກະລາເທດແລ້ວ 164.000 ຄົນ
ອົງການສະຫະປະຊາຊາດ ຫຼື UN ລາຍງານໃນວັນທີ 7 ກັນຍານີ້ວ່າ: ມີຜູ້ລີ້ໄພ ເຊິ່ງສ່ວນຫຼາຍເປັນຊາວໂຣຮິງຢາ ເດີນທາງຂ້າມຊາຍແດນໄປບັງກະລາເທດແລ້ວປະມານ 164.000 ຄົນ ນັບແຕ່ເກີດເຫດນອງເລືອດຄັ້ງໃຫຍ່ຢູ່ລັດຍະໄຂ່ຂອງມຽນມາໃນເດືອນຜ່ານມາ.
ລາຍງານລະບຸວ່າ: ນັບແຕ່ກອງທັບມຽນມາເລີ່ມກວາດລ້າງຊາວໂຣຮິງຢາໃນເດືອນຕຸລາປີຜ່ານມາ ມີຊາວມຸດສະລິມໂຣຮິງຢາອົບພະຍົບອອກຈາກປະເທດແລ້ວຫຼາຍກວ່າ 250.000 ຄົນ ໂດຍກ່ອນຈະເລີ່ມມີປະຕິບັດການກວາດລ້າງຄັ້ງໃໝ່ ຫຼັງກຸ່ມຕິດອາວຸດຊາວໂຣຮິງຢາບຸກໂຈມຕີດ່ານຕຳຫຼວດຫຼາຍແຫ່ງໃນວັນທີ 25 ສິງຫາຜ່ານມາ ມີຜູ້ອົບພະຍົບຫຼົບໜີຂ້າມໄປບັງກະລາເທດເປັນຈຳນວນ 87.000 ຄົນ ສົ່ງຜົນໃຫ້ບັງກະລາເທດຜະເຊີນມະຫັນຕະໄພດ້ານມະນຸດສະທຳຄັ້ງໃຫຍ່.
ລັດຖະບານມຽນມາ ນຳໂດຍນາງ ອອງຊານ ຊູຈີ ເຈົ້າຂອງລາງວັນໂນເບລສາຂາສັນຕິພາບ ປະຕິເສດຂ້ໍກ່າວຫາທີ່ວ່າເປັນຝ່າຍກະທຳໂຫດຮ້າຍປ່າເຖື່ອນຕໍ່ຊາວໂຣຮິງຢາ ແລະ ກ່າວວ່າ: ຂໍ້ມູນດັ່ງກ່າວບິດເບືອນໂດຍສື່ມວນຊົນ, ກຸ່ມອົງການນອກພາກລັດ (NGO) ແລະ UN. ນາງ ຊູຈີ ກ່າວໃນວັນທີ 6 ກັນຍາວ່າ: ຄວາມເຫັນອົກເຫັນໃຈຊາວໂຣຮິງຢາລ້ວນເປັນຜົນມາຈາກການໄດ້ຮັບຂໍ້ມູນທີ່ບິດເບືອນ.
ລັດຖະບານມຽນມາກ່າວວ່າ: ຄວາມຮຸນແຮງທີ່ເກີດຂຶ້ນລ້ວນເປັນຝີມືຂອງກຸ່ມຕິດອາວຸດທີ່ຕັ້ງໃຈຈູດທຳລາຍເຮືອນຕົນເອງ ເຮັດໃຫ້ຫຼ້າສຸດມີເຮືອນຂອງຊາວໂຣຮິງຢາຖືກຈູດທຳລາຍແລ້ວ 6.600 ຫຼັງ ແລະ ມີເຮືອນຂອງປະຊາຊົນທີ່ບໍ່ແມ່ນຊາວມຸດສະລິມໄດ້ຮັບຄວາມເສຍຫາຍອີກ 201 ຫຼັງ ນັບແຕ່ວັນທີ 25 ສິງຫາຜ່ານມາ. ນອກຈາກນີ້ ຍັງມີພົນລະເຮືອນເສຍຊີວິດຈາກເຫດສູ້ຮົບໃນພື້ນທີ່ແລ້ວປະມານ 30 ຄົນ ແບ່ງເປັນຊາວໂຣຮິງຢາ 7 ຄົນ, ຊາວຮິນດູ 7 ຄົນ ແລະ ຊາວພຸດໃນລັດຍະໄຂ່ 16 ຄົນ.
