ຊະລາຕັນ ຂຶ້ນແທ່ນນັກເຕະອາຍຸຫລາຍທີ່ສຸດຍິງປະຕູໄດ້ໃນ ເຊເຣຍ ອາ

ຊະລາຕັນ ອີບຣາຮີໂມວິດ ກອງໜ້າປະສົບການຫລາຍຊາວສະວີເດັນ ຂຶ້ນແທ່ນນັກເຕະອາຍຸຫລາຍທີ່ສຸດທີ່ຍິງປະຕູໄດ້ໃນລຍການ ເຊເຣຍ ອາ ອີຕາລີ ຫລັງຍິງໄປ 1 ປະຕູ ໃນເກມທີ່ ເອຊີ ມິລານ ເສຍໃຫ້ ອູດີເນເຊ ເມື່ອວັນທີ 18 ມິນາ ທີ່ຜ່ານມາ.

ກ່ອນໜ້ານີ້ ຊະລາຕັນ ອີບຣາຮີໂມວິດ ຫາກໍເຊົາຈາກອາການບາດເຈັບ ແລະ ກັບມາລົງສະໜາມໃຫ້ກັບ ເອຊີ ມິລານ ໄດ້ເມື່ອບໍ່ເທົ່າໃດນັດຜ່ານມາ ແລະ ຫລ້າສຸດລາວຫາກໍສ້າງສະຖິຕິໃຫມ່ຫລັງຍິງ 1 ປະຕູ ໃນເກມທີ່ທີມເສຍໃຫ້ກັບ ອູດີເນເຊ 1-3 ເຊິ່ງປະຕູດັ່ງກ່າວທີ່ລາວເຮັດໄດ້ນັ້ນ ເຮັດໃຫ້ລາວກາຍເປັນນັກເຕະອາຍຸຫລາຍທີ່ສຸດທີ່ຍິງປະຕູໄດ້ໃນເກມລີກສູງສຸດຂອງອິຕາລີ  ດ້ວຍອາຍຸ 41 ປີ ກັບ ອີກ 166 ມື້ ທຳລາຍສະຖິຕິເກ່ົາຂອງອະດີດນັກເຕະເອຊີ ມິລານ ຂອງ ອາເລສຊານໂດຣ ຄອສຕາຄູຕາ ທີ່ເຄີຍເຮັດໄວດ້ດ້ວຍອາຍຸ 41 ປີ ກັບອີກ 25 ມື້ ນອກຈາກນີ້ຍັງເປັນການຍິງປະຕູໃນເຊເຣຍ ອາ ປະຕູທຳອິດ ໃນຮອບ 430 ວັນ ຂອງຫົວໜ້າທີມຊາດສະວີເດັນນຳອີກ.

ໂດຍ ຊະລາຕັນ ກ່າວ ຫລັງສ້າງສະຖິຕິວ່າ : “ ຂ້ອຍພູມໃຈທີ່ໄດ້ຢູ່ໃນປະຫວັດສາດຂອງສະໂມສອນແຫ່ງນີ້ ເພາະນີ້ຄືສະໂມສອນທີ່ຍິ່ງໃຫຍ່ທີ່ມີປະຫວັດສາດທີ່ຍິ່ງໃຫຍ່ ມີນັກເຕະທີ່ເຮັດໃນສິ່ງທີ່ສຸດຍອດ ແລະ ຫລາຍຄົນມີຄວາມຫມາຍກັບຂ້ອຍ ປະຕູນີ້ບໍ່ສາມາດຄວ້າຄະແນນເຊິ່ງເປັນສິ່ງທີ່ຂ້ອຍຕ້ອງການໄດ້ ຂ້ອຍພູມໃຈທີ່ໄດ້ເປັນຫົວໜ້າທີມ ແຕ່ເກມນີ້ບໍ່ໄດ້ອອກມາຢ່າງທີ່ເຮົາຕ້ອງການ ”.

ເຊິ່ງກອງໜ້າອາຍຸ 41 ປີ ກ່າວເຖິງການໄດ້ສວມປອກແຂນຫົວໜ້າທີມ ແທນທີ່ຂອງ ອິສມາເອລ ເບນາເຊີ ວ່າ : “ ອິສມາເອລ ມາທີ່ຫ້ອງຂ້ອງຂ້ອຍ ແລະ ບອກວ່າຢາກໃຫ້ຂ້ອຍເປັນຫົວໜ້າທີມ ຂ້ອຍຈະຮັບຄວາມກົດດັນຕໍ່ຈາກເຈົ້າ ແລະ ໃຫ້ເຈົ້າມີສະມາທິກັບເກມ ”.