ເງິນກີບລາວຈະແຂງຄ່າກໍຕໍ່ເມື່ອຄົນລາວຍົກສູງສະຕິເປັນເຈົ້າຢ່າງແທ້ຈິງ

ໂດຍ: ທິດກໍ່າ

ເວົ້າໄດ້ວ່າ ນັບແຕ່ລັດຖະບານມີຄໍາສັ່ງຍົກເລີກຮ້ານແລກປ່ຽນເງິນຕາຂອງເອກະຊົນ ໂດຍເລີ່ມມີຜົນສັກສິດແຕ່ເດືອນມັງກອນ 2023 ເຫັນວ່າສະພາບຄວາມອ່ອນຄ່າຂອງເງິນກີບມີທ່າອ່ຽງຄົງທີ່ຫລາຍຂຶ້ນ. ມາຮອດວັນທີ 17 ມີນາ 2023 ອັດຕາແລກປ່ຽນຊື້ຂາຍຢູ່ໃນລະດັບ 1 ພັນບາດເທົ່າກັບ 502.830 ກີບ  ສ່ວນເງິນໂດລາກໍມີລັກສະນະຄົງທີ່ຄ້າຍໆຄືກັນ.

ຢ່າງໃດກໍດີ, ໃນສະເພາະໜ້າ ແລະ ຍາວນານ ເງິນກີບລາວຈະມີການແຂງຄ່າຂຶ້ນ ຫລື ອ່ອນຄ່າລົງນັ້ນ ມັນກໍຂຶ້ນກັບຫລາຍປັດໄຈ ແຕ່ອັນທີ່ຕັດສິນກວ່າໝູ່ໝົດກໍແມ່ນລະບົບເສດຖະກິດ-ການເງິນມະຫາພາກຕ້ອງເຕີບໃຫຍ່ເຂັ້ມແຂງ ແລະ ຂະຫຍາຍຕົວຂຶ້ນ ຈຶ່ງຈະສາມາດກູ້ວິກິດເງິນກີບລາວໃຫ້ຫວນກັບມາແຂງຄ່າທຽບຖານກັບສະກຸນເງິນອື່ນໆທີ່ມີໃນພາກພື້ນ ແລະ ສາກົນ.

ຫາກຕັ້ງໂຈດກັນວ່າ ດ້ວຍສາເຫດໃດເງິນກີບລາວຈຶ່ງມີທ່າອ່ຽງຄົງທີ່ດີຂຶ້ນ. ຄໍາຕອບໂຈດກໍຄື ຍ້ອນຫລາຍປັດໄຈມາກະທົບ ເປັນຕົ້ນອັນທີໜຶ່ງແມ່ນມາຈາກຜົນຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ເຊິ່ງໄດ້ໄຂຂຶ້ນແຕ່ວັນທີ 5-30 ທັນວາ 2022. ໃນວາລະກອງປະຊຸມດັ່ງກ່າວໄດ້ມີຜູ້ແທນຫລາຍທ່ານສະເໜີຕໍ່ສະພາວ່າໃຫ້ມີການຍົກເລີກ ເພາະບັນດາຮ້ານເຫລົ່ານີ້ເປັນຕົວການປັ່ນເລດເງິນໃຫ້ສູງຂຶ້ນໃນແຕ່ລະວັນ. ອັນທີສອງ ເບື້ອງມະຫາພາກກໍມີວິທີຄຸມເຂັ້ມດີຂຶ້ນກວ່າເກົ່າ ທັງເລັ່ງປັບປຸງກົງຈັກການຈັດຕັ້ງໃນຂັ້ນລັດຖະບານ ແລະ ຂະແໜງເສດຖະກິດ-ການເງິນສອດຄ່ອງ ແລະ ດີຂຶ້ນກວ່າເກົ່າ. ສ່ວນອັນສຸດທ້າຍເຫັນວ່າການຜະລິດສິນຄ້າເພື່ອບໍລິໂພກພາຍໃນ ແລະ ສົ່ງອອກຂອງລາວເຮົາມີທ່າອ່ຽງເພີ່ມຂຶ້ນເລື້ອຍໆ ເປັນຕົ້ນດ້ານພະລັງງານ ແລະ ຜົນຜະລິດດ້ານກະສິກໍາ. ນອກຈາກນັ້ນ ຄົນລາວເຮົາຈໍານວນບໍ່ໜ້ອຍກໍຫັນມາຊົມໃຊ້ສິນຄ້າທີ່ຄົນລາວເຮົາຜະລິດເອງໄດ້. ຄາດວ່າຖ້າເປັນສະພາບແບບນີ້ ຊະຕາກໍາຂອງເງິນກີບລາວຈະຫວນກັບມາແຂງຄ່າ ຫລື ຄົງທີ່ດີຂຶ້ນຕາມການເວລາ.

ຫາກພວກເຮົາພ້ອມກັນມາວິເຄາະສະພາບຕົວຈິງໃນການສ້າງສາພັດທະນາບ້ານເມືອງຂອງພັກ ແລະ ລັດຖະບານ ໂດຍສະເພາະອີງໃສ່ມະຕິຄັ້ງທີ XI ຂອງພັກມາເປັນຕົວວັດ ເຮົາເຫັນວ່າໃນອະນາຄົດເສດຖະກິດລາວເຮົາຕ້ອງສົດໃສເດີນໜ້າແນ່ນອນ ເພາະໂຄງການພັດທະນາໃນແຕ່ລະດ້ານພວມດໍາເນີນໄປຢ່າງບໍ່ຢຸດຢັ້ງ ເຊັ່ນອັນທີ່ພົ້ນເດັ່ນແມ່ນການສ້າງຖະໜົນຫົນທາງ, ການຜະລິດປູກຝັງລ້ຽງສັດ, ການລົງທຶນ ແລະ ການທ່ອງທ່ຽວ ສົມທົບກັບຄົນລາວເຮົາເອງມີສະຕິເປັນເຈົ້າຂອງປະເທດຊາດ ແນ່ນອນເງິນກີບລາວຕ້ອງຫວນກັບມາແຂງຄ່າຢູ່ກັບຊາດລາວ ຄົນລາວຕະຫລອດໄປ.