ສະເປີ ຢືນຢັນ ບໍ່ຂາຍ ແຮລີ່ ເຄນ ໃນຊ່ວງລະດູຮ້ອນນີ້ ເຖິງຈະສ່ຽງ ເສຍນັກເຕະແບບຟຣີຕົວແທນ

ທັອດແນມ ຮັອດສະເປີ ສະໂມສອນແຫ່ງພຣີເມຍລີກ ອັງກິດ ຈະບໍ່ຍອມຂາຍ ແຮລີ່ ເຄນ ກອງໜ້າຄົນສຳຄັນໃນລະດູຮ້ອນນີ້. ເຖິງແມ່ນວ່າພວກເຂົາມີຄວາມສ່ຽງທີ່ຈະສູນເສຍນັກເຕະແບບບໍ່ມີຕົວແທນ ໃນຕະຫລາດຊື້ຂາຍເດືອນມັງກອນປີໜ້າກໍ່ຕາມ.

ເຄນ ຕົກເປັນຂ່າວວ່າຕ້ອງການຍ້າຍອອກໄປຫາຄວາມສໍາເລັດກັບສະໂມສອນອື່ນ. ຫລັງຈາກຍອມຮັບສະພາບວ່າການຢູ່ກັບສະເປີຕໍ່ໄປຈະເຮັດໃຫ້ລາວບໍ່ສາມາດຄວ້າແຊ້ມເພື່ອປະດັບກຽດສັກສີໄດ້ແນ່ນອນ.

ໃນຊ່ວງທີ່ຜ່ານມາ, ຫລາຍສະໂມສອນສະແດງຄວາມສົນໃຈຢາກໄດ້ ເຄນ ມາຮ່ວມທັບ ໂດຍສະເພາະ ແມນເຊັສເຕີ ຢູໄນເຕັດ ທີ່ຕັ້ງໃຈດຶງໂຕກັບຕັນທີມຊາດອັງກິດ ມາຮັບບົດບາດໜ້າເປົ້າໃຫ້ກັບທັບ “ຜີສາດແດງ” ຫລັງຈາກຈົບລະດູການນີ້.

ຢ່າງໃດກໍ່ຕາມ, ສະກາຍ ສະປອດ ສື່ດັງເມືອງຜູ້ດີລາຍງານວ່າ ທັອດແນມ ຈະບໍ່ຂາຍກອງໜ້າໄວ 29 ປີ ທີ່ຍິງໄປ 22 ປະຕູໃນທຸກການແຂ່ງຂັນໃນລະດູການນີ້. ໃນຊ່ວງລະດູຮ້ອນນີ້ຢ່າງເດັດຂາດ.

ຖ້າ ສະເປີ ຕັດສິນໃຈເຮັດແນວນັ້ນແທ້ໆ ນັ້ນຫມາຍຄວາມວ່າພວກເຂົາມີຄວາມສ່ຽງຕໍ່ການສູນເສຍ ເຄນ ໄປແບບບໍ່ມີຄ່າໂຕ. ເນື່ອງຈາກວ່າສັນຍາປັດຈຸບັນຂອງນັກເຕະຈະຫມົດລົງເມື່ອຈົບລະດູການ 2023/2024, ດັ່ງນັ້ນລາວສາມາດເຊັນສັນຍາລ່ວງຫນ້າກັບທີມນອກປະເທດອັງກິດໄດ້ໃນເດືອນມັງກອນປີຫນ້າ. ແລະ ຍ້າຍທີມແບບຟຣີຕົວແທນເມື່ອຈົບລະດູການ.