ຍ້ອນປະຊາຊົນໃຫ້ຄວາມຮ່ວມມື ຈຶ່ງສາມາດຈັບເປົ້າໝາຍຄ້າຂາຍຢາເສບຕິດໄດ້ 3 ຄົນ ພ້ອມຂອງກາງ 25.392 ເມັດ

ທ່ານ ພັທ ເຂີງຄຳ ຈັນທະວີໄຊ ຫົວໜ້າພະແນກຕໍາຫລວດ ປກສ ເມືອງນາຊາຍທອງ ລາຍງານໃນວັນທີ 10 ມີນາ 2023 ວ່າ: ວັນທີ 20 ກຸມພາ 2023 ຜ່ານມາ ໄດ້ຮັບແຈ້ງຈາກພົນລະເມືອງດີວ່າ: ມີກຸ່ມຄົນບໍ່ດີເຄື່ອນໄຫວຄ້າຂາຍຢາເສບຕິດ ຢູ່ເຂດບ້ານນາສ້ຽວ ເມືອງນາຊາຍທອງ. ດັ່ງນັ້ນ ເຈົ້າໜ້າທີ່ກອງບັນຊາການ ປກສ ເມືອງນາຊາຍທອງ ໄດ້ລົງຕິດຕາມເກັບກຳຂໍ້ມູນ ແລະ ເຫັນວ່າມີມູນຄວາມຈິງ; ຈິ່ງໄດ້ເຂົ້າກັກຕົວເປົ້າໝາຍໄດ້ 1 ຄົນ, ຊື່ທ້າວ ສົມສະນຸກ ອາຍຸ 45 ປີ ກຳມະກອນ ຢູ່ບ້ານນາສ້ຽວ ພ້ອມຢຶດຢາບ້າໄດ້ 120 ເມັດ ໃນເວລາ 12:00 ໂມງ ຂອງວັນທີ 22 ກຸມພາ 2023; ຈາກນັ້ນ ເຈົ້າໜ້າທີ່ໄດ້ສອບສວນຂະຫຍາຍຜົນນໍາຈັບກຸ່ມແກ້ງທີ່ຮ່ວມຂະບວນການໄດ້ອີກ 2 ຄົນ ໃນເວລາ 1:30 ໂມງ ຊື່: ທ້າວ ແສງທະວີ ອາຍຸ 37 ປີ ກຳມະກອນ ບ້ານນາສ້ຽວ ຢຶດຂອງກາງຢາບ້າ 1.250 ເມັດ ແລະ ທ້າວ ບຸນທະວີ ອາຍຸ 28 ປີ ກໍາມະກອນ ບ້ານນາສ້ຽວ ເມືອງນາຊາຍທອງ ມີຢາບ້າ 24.022 ເມັດ ມາດໍາເນີນຄະດີ.

ຜ່ານການເປີດການສອບສວນຂອງເຈົ້າໜ້າທີ່ຜູ້ຖືກຫາທັງສາມ ໃຫ້ການຍອມຮັບສາລະພາບວ່າ: ຢາບ້າທີ່ເຈົ້າໜ້າທີ່ພົບເຫັນ ແລະ ຢຶດໄວ້ນັ້ນເປັນຂອງພວກກ່ຽວແທ້; ເຊີ່ງໄດ້ຊື້ມານໍາຜູ້ຮ່ວມຂະບວນການອີກຄົນໜຶ່ງ ຢູ່ເຂດບ້ານນາສ້ຽວ ເມືອງນາຊາຍທອງ ນວ ແລະ ເຄີຍຊື້ມາແລ້ວຫລາຍຄັ້ງ ເມື່ອໄດ້ຢາມາ ແລ້ວ ສ່ວນໜື່ງເອົາມາເສບ ອີກສ່ວນໜື່ງແມ່ນ ຂາຍໃຫ້ໄວໜຸ່ມທົ່ວໄປທີ່ຕ້ອງການຊື້.

ປັດຈຸບັນ, ເຈົ້າໜ້າທີ່ ປກສ ເມືອງນາຊາຍທອງ ໄດ້ສະເໜີຂໍຄໍາສັ່ງກັກຂັງພາງຜູ້ຖືກຫາທັງ 3 ຄົນ ເພື່ອສືບຕໍ່ຂະຫຍາຍຜົນຫາກຸ່ມແກ້ງຮ່ວມຂະບວນການ ແລ້ວສະຫລຸບສໍານວນຄະດີ ສົ່ງໄອຍະການ ດຳເນີນຄະດີຕາມລະບຽບກົດໝາຍ.