ນັກຮຽນຢູ່ເມືອງໄຊພູທອງ ປະລະການຮຽນ ຍ້ອນສະພາບຄວາມຫຍຸ້ງຍາກທາງດ້ານເສດຖະກິດ ຈຶ່ງອອກໄປເຮັດວຽກເພື່ອຫາລາຍໄດ້ຊ່ວຍຄອບຄົວ

ທ່ານ ບຸນມາ ສົງວິໄລ ເຈົ້າເມືອງ ເມືອງໄຊພູທອງ ແຂວງສະຫວັນນະເຂດ ໃຫ້ສໍາພາດຜ່ານລາຍການຮອບບ້ານຜ່ານເມືອງ ວິທະຍຸກະຈາຍສຽງແຫ່ງຊາດລາວໃນວັນທີ 15 ມີນາ 2023  ວ່າ: ອັດຕາປະລະການຮຽນຢູ່ ເມືອງໄຊພູທອງ ໃນສົກຮຽນ 2023-2024 ນີ້ ຖືເປັນສະຖິຕິສູງທີ່ສຸດແບບບໍ່ເຄີຍມີມາກ່ອນ. ສາເຫດທີ່ເຮັດໃຫ້ນັກຮຽນປະລະການຮຽນ ຕົ້ນຕໍແມ່ນຍ້ອນສະພາບຄວາມຫຍຸ້ງຍາກທາງດ້ານເສດຖະກິດຄອບຄົວ, ໃນນີ້ ສະເພາະນັກຮຽນຊັ້ນມັດທະຍົມ, ສ່ວນໜຶ່ງປະລະການຮຽນແລ້ວໄປຊອກເຮັດວຽກເພື່ອຫາລາຍໄດ້ຊ່ວຍຄອບຄົວ. ສ່ວນນັກຮຽນຊັ້ນປະຖົມ ແມ່ນຜູ້ປົກຄອງໃຫ້ອອກຍ້ອນເຫັນຄວາມຫຍຸ້ງຍາກດ້ານເສດຖະກິດຄອບຄົວ. ເພື່ອແກ້ໄຂບັນຫາທີ່ເກີດຂຶ້ນ, ທາງເມືອງໄດ້ໃຊ້ວິທີສຶກສາອົບຮົມຜູ້ປົກຄອງນັກຮຽນໃຫ້ຮັບຮູ້ ແລະ ເຂົ້າໃຈຄວາມສໍາຄັນຂອງການສຶກສາ ເພື່ອໃຫ້ເຂົາເຈົ້າເອົາລູກຫລານຕົນເອງກັບມາເຂົ້າຮຽນອີກຄັ້ງ. ມາຮອດເດືອນກຸມພາ 2023 ນີ້ ມີນັກຮຽນຊັ້ນປະຖົມສຶກສາຢູ່ພາຍໃນເມືອງໄຊພູທອງ, ແຂວງສະຫວັນນະເຂດ ປະລະການຮຽນ 44 ຄົນ, ຊັ້ນມັດທະຍົມສຶກສາ 50 ກວ່າຄົນ ເຊີ່ງເປັນສະຖິຕິທີ່ບໍ່ເຄີຍມີມາກ່ອນພາຍໃນເມືອງ.

ນອກນັ້ນ, ທ່ານຍັງໃຫ້ຮູ້ຕື່ມວ່າ: ສໍາລັບສົກຮຽນ  2022-2023 ຜ່ານມາ, ທົ່ວເມືອງໄຊພູທອງ, ແຂວງສະຫວັນນະເຂດ ມີນັກຮຽນປະຖົມປະລະການຮຽນ 10 ກວ່າຄົນ ແລະ ຊັ້ນມັດທະຍົມສຶກສາ 20 ກວ່າຄົນ.