ພາຍໃນ 1 ອາທິດ ທະນາຄານໃຫຍ່ 3 ແຫ່ງ ຂອງສະຫະລັດປິດຕົວລົງ ອາດຍ້ອນການຂຶ້ນອັດຕາດອກເບ້ຍຂອງທະນາຄານກາງ
ສຳນັກຂ່າວຕ່າງປະເທດລາຍງານວ່າ: ໃນອາທິດຜ່ານມາ ທະນາຄານທຸລະກິດໃຫຍ່ ຂອງສະຫະລັດອາເມລິກາ ປິດຕົວລົງ ຕໍ່ເນື່ອງກັນພາຍໃນອາທິດດຽວ 3 ແຫ່ງ ຄື: ທະນາຄານ ຊິວເວີເກດ (Silvergate), ທະນາຄານ ເອັສວີບີ (SVB) ແລະ ຊິກເນເຈີແບັງ (SIGNATURE BANK). ເຫດການດັ່ງກ່າວໄດ້ກະທົບຕໍ່ຄວາມເຊື່ອໝັ້ນຂອງນັກລົງທຶນທົ່ວໂລກ ແລະ ກັງວົນວ່າຈະເກີດວິກິດການເງິນອີກຮອບໃໝ່.
ຢ່າງໃດກໍຕາມ, ນັກເສດຖະສາດສ່ວນຫລາຍໃຫ້ທັດສະນະວ່າ: ເຫດການດັ່ງກ່າວແຕກຕ່າງຈາກຫລາຍປີຜ່ານມາ ທີ່ໂລກປະເຊີນກັບວິກິດຄັ້ງກ່ອນໆ; ເຖິງຈະເປັນວິກິດຂັ້ນເລີ່ມຕົ້ນ ແຕ່ບໍ່ຄວນປະໝາດ ເພາະນີ້ອາດເປັນສັນຍານເຕືອນຈຸດເລີ່ມຕົ້ນຂອງເສດຖະກິດໂລກຖົດຖອຍ.
ເຫດຜົນທີ່ເກີດເຫດການດັ່ງກ່າວ: ບັນຫາຂອງທະນາຄານທຸລະກິດທັງ 3 ແຫ່ງເກີດມາຈາກ ການບໍລິຫານຊັບສິນ ແລະ ໜີ້ສິນທີ່ຜິດພາດເທົ່ານັ້ນ, ບໍ່ເຖິງຂັ້ນເປັນວິກິດການເງິນທົ່ວໂລກແຕ່ຢ່າງໃດ..
ນັກວິເຄາະເບິ່ງວ່າ ໃນອະນາຄົດ ຖ້າຫາກທະນາຄານກາງສະຫະລັດ (FED) ຍັງປັບຂຶ້ນດອກເບ້ຍແບບຕໍ່ເນື່ອງ ຈົນເຖິງ 6% ຈະບໍ່ມີພຽງແຕ່ 3 ທະນາຄານນີ້ທີ່ປິດຕົວລົງ ແຕ່ອາດຈະຫລາຍກວ່ານີ້ກໍເປັນໄດ້.
