ເກີດເຫດລົດໂມ້ປູນເບກແຕກຕໍາລົດຈັກທີ່ຈອດສະລໍໄຟອໍານາດ ເຮັດໃຫ້ເສຍຊີວິດຄາທີ່ 1 ຄົນ

ອີງຕາມຄວາມສະຫງົບ ລາຍງານວ່າ: ເວລາ 9:50 ໂມງ ຂອງວັນທີ 13 ມີນາ 2023 ເກີດອຸບັດຕິເຫດລົດໂມ້ປູນເບກແຕກ ຕໍາເອົາລົດຈັກທີ່ຈອດສະລໍໄຟອໍານາດ ຢູ່ເສັ້ນທາງເຂດບ້ານທາດຫລວງ ເມືອງໄຊເສດຖາ ນະຄອນຫລວງວຽງຈັນ ເຮັດໃຫ້ຜູ້ຂັບຂີ່ລົດຈັກຖືກລົດໂມ້ປູນຢຽບ ເສຍຊີວິດຄາທີ່.

ທ່ານ ພັຕ ວິໄຊ ວິໄລສານ ເຈົ້າໜ້າທີ່ພະແນກຕໍາຫລວດຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ກ່ອນເກີດເຫດ ທ້າວ ທອງໃສ ອາຍຸ 33 ປີ ສັນຊາດລາວ ອາຊີບຂັບລົດ ພັກເຊົາຢູ່ບ້ານ ໜອງພະຍາ ເມືອງໄຊທານີ, ໄດ້ຂັບຂີ່ລົດໂມ້ປູນ ຍີ່ຫໍ້ອີຊູຊຸ ໝາຍເລກທະບຽນ ບກ 7063 ກໍາແພງນະຄອນ ມຸ້ງໜ້າມາແຕ່ຕະຫລາດຫົວຂົວ ພໍຮອດຈຸດເກີດເຫດໄກຈະຮອດ 4 ແຍກໄຟອໍານາດທາດຫລວງ ແລະ ມີລົດທາງໜ້າຈໍານວນຫລາຍຄັນຢຸດຈອດລໍຖ້າໄຟອຳນາດຢູ່,   ແຕ່ບັງເອີນລົດຄັນດັ່ງກ່າວເກີດເບກແຕກ ເຊິ່ງຜູ້ຂັບຂີ່ລົດໂມ້ປູນຈຶ່ງຮ້ອງໃສ່ລົດຄັນທາງໜ້າວ່າເບກແຕກ ກ່ອນຕໍາເອົາລົດຈັກ 2 ຄັນທີ່ຈອດຖ້າໄຟຂຽວ ເຮັດໃຫ້ຜູ້ຂັບຂີ່ລົດຈັກເວບໂຄລາວໝາຍເລກທະບຽນ ຍກ 7502 ກໍາແພງນະຄອນ ຮູ້ໂຕໂດດອອກຈາກລົດ, ສ່ວນລົດຈັກໂຊນິກ ໂຄລາວ ໝາຍເລກທະບຽນ ດສ 6317 ກໍາແພງນະຄອນ ຂັບຂີ່ໂດຍທ້າວ ຄໍາຫອມ ອາຍຸ 40 ປີ ພະນັກງານ ຢູ່ບ້ານຮ່ອງສຸພາບ ເມືອງໄຊເສດຖາ ບໍ່ໄດ້ຍິນສຽງຮ້ອງ ຈຶ່ງຖືກຕໍາເອົາລາກໄປກັບລົດ; ພໍລົດໄດ້ຕໍາເອົາລົດຈັກ 2 ຄັນ ຜູ້ຂັບຂີ່ຢ້ານເກີດອຸບັດຕິເຫດຫລາຍຄັນຈຶ່ງໄດ້ຕັດສິນໃຈຫັກພວງມະໄລລ້ຽວອອກມາທາງຂົວມື ເພື່ອໃຊ້ຟຸດບາດທາງຢຸດລົດ ເຮັດໃຫ້ຜູ້ຂັບຂີ່ລົດຈັກທີ່ຕິດຢູ່ໜ້າລົດຕໍາກັບຟຸດບາດທາງຟົ້ງຂຶ້ນໄປທາງຄົນຍ່າງ ເສຍຊີວິດຄາທີ່.

ຕໍ່ກັບອຸບັດຕິເຫດດັ່ງກ່າວ ເກີດຍ້ອນສະພາບເຕັກນິກລົດບໍ່ຮັບປະກັນ (ເບກແຕກ); ປັດຈຸບັນ ເຈົ້າໜ້າທີ່ຕໍາຫລວດຈະລາຈອນ ນະຄອນຫລວງວຽງຈັນ ກໍາລັງເລັ່ງສອບສວນ ແລະ ເກັບກໍາຂໍ້ມູນຫລັກຖານ ເພື່ອປະກອບໃສ່ສໍານວນຄະດີ ສົ່ງຕາມຂັ້ນຕອນວິຊາສະເພາະ.