ອັນເລກຣີ ເຜີຍວ່າກຽມໃຫ້ໂອກາດ ປັອກບາ ລົງຫລິ້ນ ແຕ່ນັກເຕະກັບມາເຈັບອີກຄັ້ງ

ມັສຊິມີເຣຍໂນ ອັນເລກຣີ ນາຍໃຫຍ່ຂອງ ຢູເວນຕຸສ ໄດ້ເປີດເຜີຍວ່າ ພອລ ປັອກບາ ມີອາການບາດເຈັບ ແລະ ຈະກັບມາລົງສະໜາມອີກຄັ້ງຫລັງຈາກພັກເຕະທີມຊາດ.

ກອງກາງທີມຊາດຝຣັ່ງ ຫາກໍ່ມີໂອກາດລົງຫລິ້ນໃຫ້ກັບມ້າລາຍ ເມື່ອຊ່ວງທ້າຍເດືອນກຸມພາທີ່ຜ່ານມາ. ຫລັງຈາກທີ່ຍ້າຍກັບຄືນຮ່ວມທີມເປັນຫົນທີສອງໃນລະດູຮ້ອນທີ່ຜ່ານມາ. ຢ່າງໃດກໍຕາມ, ລາວໄດ້ປະເຊີນກັບອາການບາດເຈັບຢ່າງຕໍ່ເນື່ອງ.

ນອກຈາກນັ້ນ, ປັອກບາ ຍັງຖືກຕັດຊື່ອອກຈາກທີມໃນເກມ ຢູໂຣປາ ລີກ ກັບ ໄຟລບວກ ຫລັງຈາກເດີນທາງມາລາຍງານໂຕຊ້າ.

ເຊິ່ງໃນເກມຫລ້າສຸດ ຢູເວນຕຸສ ເອົາຊະນະ ຊາມໂດເລຍ 4-2, ກໍເປັນອີກນັດທີ່ບໍ່ມີຊື່ຂອງ ປັອກບາ ກ່ອນທີ່ ອັນເລກຣີ ຈະເປີດເຜີຍວ່າ ເຂົາກຽມຈະໃຫ້ໂອກາດນັກເຕະໄດ້ກັບໄປລົງສະໜາມແລ້ວແຕ່ນັກເຕະກັບມາເຈັບອີກຮອບໃໝ່ເສຍກ່ອນ.