ເຈົ້າຂອງເຊລຊີ ພ້ອມຈ່າຍບໍ່ອັ້ນລ່າ ດາວຍິງ ນິວຄາສເຊິລ ເສີມທີມລະດູການນີ້

ເຊລຊີ ສະໂມສອນດັງພຣີເມຍລີກ ອັງກິດ ກຽມລົງທຶນຈຳນວນເງິນມະຫາສານຄວ້າ ບຣູໂນ ກິມາໄຣ ກອງກາງ ນິວຄາສເຊິລ ຢູໄນເຕັດ ເຂົ້າມາເສີມທີມໃນລະດູການນີ້.

ໂບລີ ວາງຕົວ ກິມາໄຣ ເປັນເປົ້າຫມາຍລຳດັບທຳອິດ ທີ່ຢາກໃຫ້ຍ້າຍມາຍັງສະແຕມຟອດ ບຣິດ ໃນຕະຫລາດນັກເຕະຮອບຖັດໄປ ເຊິ່ງລາວກໍຫມັ້ນໃຈວ່າ ຫາກຄວ້າດາວຍິງຊາວບຣາຊິລ ມາຮ່ວມທີມໄດ້ສຳເລັດນັ້ນ ເຊລຊີ ຈະມີແຜງກອງກາງລະດັບໂລກທີ່ແຂງແກ່ນ.

ນັບຕັ້ງແຕ່ຍ້າຍມາຈາກ ໂອລິມປິກ ລີຢົງ ໃນຝຣັ່ງ ມາຫລິ້ນກັບ ນິວຄາສເຊິລ ເມື່ອເດືອນມັງກອນປີ 2022 ກໍມາໄຣ ກໍກາຍເປັນຫົວໃຈສຳຄັນໃນແດນກາງຂອງທີມ ນິວຄາສເຊິລ ທັນທີ ແລະ ຈາກຜົນງານທີ່ສຸດຍອດກໍເຮັດໃຫ້ລາວໄດ້ຮັບຄຳຊື່ນຊົມຫລາຍ.

ໂບລີ ຕ້ອງການໃຫ້ ເກຣແຮມ ພັອດເຕີ ຜູ້ຈັດການທີມສ້າງແຜນກອງກາງສາຍເລືອດໃຫມ່ ໂດຍມີ ເອັນໂຊ ເຟີນານເດສ ທີ່ຍ້າຍມາຈາກ ເບນຟີກາ ເມື່ອຕະຫລາດໜ້າໜາວຢືນເປັນຕົວຫລັກ ແລະ ມີ ກິມາໄຣ ເຂົ້າມາຮ່ວມເສີມກຳລັງສ້າງສັນເກມ.

ແນວໃດກໍຕາມ ນິວຄາສເຊິລ ບໍ່ຕ້ອງການຈະປ່ອຍ ກອງກາງຊາວບຣາຊິລ ອອກໄປ ແລະ ເບິ່ງວ່ານັກເຕະຍັງເປັນກຳລັງສຳຄັນຂອງທີມໃນອະນາຄົດ.