ກະຊວງອຸດສາຫະກຳ ແລະ ການຄ້ານເນັ້ນຈະສືບຕໍ່ມາດຕະການຄຸ້ມຄອງລາຄາສິນຄ້າ ແລະ ຄ່າບໍລິການ ໃຫ້ເຂັ້ມງວດ ແລະ ເດັດຂາດ
ວັນທີ 7 ມີນາ 2023 ຜ່ານມານີ້ ກະຊວງອຸດສາຫະກຳແລະການຄ້າ(ອຄ) ຈັດກອງປະຊຸມຄະນະຊີ້ນຳວຽກງານຄຸ້ມຄອງລາຄາສິນຄ້າ ແລະ ຄ່າບໍລິການຄັ້ງທີ 4 ໂດຍເປັນປະທານຂອງ ທ່ານມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ
ທ່ານ ບຸນເຖິງດວງສະຫວັນ ຮອງລັດຖະມົນຕີກະຊວງອຸດສາຫະກຳແລະການຄ້າຜູ້ປະຈຳການຄະນະຊີ້ນຳວຽກ ງານຄຸ້ມຄອງລາຄາສິນຄ້າແລະຄ່າບໍລິການໄດ້ລາຍງານວ່າ: ການຈັດຕັ້ງປະຕິບັດວຽກງານປະຈຳປີ 2022 ຜ່ານມາ ໄດ້ສໍາເລັດການກໍານົດລາຍການສິນຄ້າຄວບຄຸມລາຄາ ແລະ ຄ່າບໍລິການເພື່ອແກ້ໄຂບັນຫາລາຄາສິນຄ້າ, ຄະນະຊີ້ນໍາ ຂັ້ນສູນກາງ ໄດ້ອອກນິຕິກໍາຕ່າງເປັນແຕ່ລະໄລຍະ ເພື່ອເປັນບ່ອນອີງໃຫ້ທ້ອງຖິ່ນ, ຫລ້າສຸດໄດ້ອອກແຈ້ງການສະບັບເລກທີ 1825/ ອຄ, ລົງວັນທີ 9/12/2022 ເຖິງຄະນະຊີ້ນໍາວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ຂັ້ນແຂວງ ເອົາໃຈໃສ່ຕິດຕາມ, ກວດກາລາຄາສິນຄ້າ ແລະ ຄ່າບໍລິການ ເພື່ອບໍ່ໃຫ້ຜູ້ປະກອບການສວຍໂອກາດຂຶ້ນລາຄາສິນຄ້າ ຕາມລຳພັງໃຈ.
ນອກຈາກນັ້ນ, ຍັງໄດ້ຊຸກຍູ້ບັນດາຂະແໜງການຕ່າງໆ ຄົ້ນຄວ້າຄືນລະອຽດບັນດາລາຍຈ່າຍຕົວຈິງໃນໂຄງປະກອບລາຄາຊີ້ນໝູແລະ ເຂົ້າກິນເພື່ອໃຫ້ສອດຄ່ອງກັບຕົ້ນທຶນຕົວຈິງ, ຊຸກຍູ້ ນໍາໃຊ້ເຂົ້າສານໜຽວປະເພດ 2 ໃນໂຄງການຄັງແຮເຂົ້າແຊກແຊງລາຄາ ແລະ ດັດສົມຕະຫລາດຈໍານວນ 340 ໂຕນອອກມາຂາຍໃນລາຄາ 9.700 ກີບ/ກິໂລ (ລາຄາແຊກແຊງ) ຊຶ່ງເລີ່ມຂາຍຕັ້ງແຕ່ວັນທີ 24 ຕຸລາ-24 ທັນວາ 2022 ແລະ ໂຄງການທົດລອງຂາຍຊີ້ນໝູໃນລາຄາຊີ້ນຳ ແມ່ນໄດ້ສິ້ນສຸດລົງ ໃນວັນທີ 4 ພະຈິກ2022.
ໃນຕໍ່ໜ້າ ແມ່ນເພື່ອສືບຕໍ່ ແລະ ປັບປຸງແກ້ໄຂ ບັນຫາການຄຸ້ມຄອງລາຄາສິນຄ້າ ແລະ ຄ່າບໍລິການ ຄື:
- ກະຕຸກ-ຊຸກຍູ້ ຄະນະຊີ້ນຳວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ຂັ້ນທ້ອງຖິ່ນ ໃຫ້ເອົາໃຈໃສ່ປະສານສົມທົບກັບຂະແໜງການກ່ຽວຂ້ອງ ໃນການກໍານົດໂຄງປະກອບລາຄາສິນຄ້າ ຕາມບັນຊີ (ກ) ແລະ ສິນຄ້າທີ່ຕ້ອງຕິດຕາມການເໜັງຕີງລາຄາບັນຊີ(ຂ)
- ມອບໃຫ້ຂັ້ນທ້ອງຖິ່ນຮັບຜິດຊອບໃຫ້ຮູ້ໄດ້ສາເຫດການຂຶ້ນລາຄາເພື່ອມີມາດຕະການແກ້ໄຂໃຫ້ທັນກັບສະພາບການ.
- ປະສານສົມທົບຊຶ່ງກັນ ແລະ ກັນ ລະຫວ່າງຂະແໜງການພາຍໃນ ຄະນະຊີ້ນຳວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ (ຂັ້ນສູນກາງ-ຂັ້ນທ້ອງຖິ່ນ).
- ຄົ້ນຄວ້າວິທີການ-ກົນໄກຄຸ້ມຄອງລາຄາສິນຄ້າ ແລະ ຄ່າບໍລິການ ທີ່ຂຶ້ນກັບຄວາມຮັບຜິດຊອບຂອງແຕ່ລະຂະແໜງການ ໃຫ້ແທດເໝາະກັບແຕ່ລະປະເພດສິນຄ້າ ແລະ ຄ່າບໍລິການ ທີ່ຄວບຄຸມລາຄາ.
- ກໍານົດໂຄງປະກອບລາຄາໃນແຕ່ລະຂອດ ເປັນພື້ນຖານ ເພື່ອຮັບປະກັນຄວາມເປັນທໍາໃຫ້ຜູ້ຊົມໃຊ້, ຜູ້ຜະລິດ ຫຼື ຜູ້ປະກອບການ ແລະ ພາກລັດ,ຕິດຕາມ, ຄຸ້ມຄອງລາຄາສິນຄ້າ.
- ສືບຕໍ່ຊຸກຍູ້ຄົ້ນຄວ້ານຳເຂົ້າສິນຄ້າຈາກແຫຼ່ງໃໝ່, ສົ່ງເສີມອຳນວຍຄວາມສະດວກໃຫ້ແກ່ຜູ້ປະກອບການປຸງແຕ່ງພາຍໃນ.ຮ່ວມເຮັດວຽກກັບກະຊວງກະສິກໍາ ແລະ ປ່າໄມ້, ເລີ່ມຕັ້ງແຕ່ຂັ້ນເມືອງໃຫ້ມີລະບົບສະໜອງສະຖິຕິຂໍ້ມູນການຜະລິດສິນຄ້າພາຍໃນ ແລະ ແຜນການຜະລິດອອກໃນແຕ່ລະໄລຍະ ເພື່ອສາມາດເຮັດການດຸ່ນດ່ຽງພາຍໃນ ແລະ ນຳເຂົ້າ-ສົ່ງອອກ ທັງຮັບປະກັນໃຫ້ມີສິນຄ້າສະໜອງ ໄດ້ຕາມຄວາມຕ້ອງການ ແລະ ປ້ອງກັນບໍ່ໃຫ້ລາຄາສິນຄ້າແພງຂຶ້ນເກີນຄວາມເປັນຈິງ ແລະ ອື່ນໆ.
