ຊາລາ ກຽມສະຫລອງເຮັດສະຖິຕິຍິງໃຫ້ ລີເວີພູລ ຫລາຍທີ່ສຸດຕະຫລອດການໃນພຣີເມຍລີກ
ໂມຮາເຫມັດ ຊາລາ ເປີດເຜີຍວິທີທີ່ລາວຈະສະຫລອງການເປັນດາວຍິງສູງສຸດຕະຫລອດການຂອງລີເວີພູລໃນພຣີເມຍລີກ ຫລັງເຫມົາສອງປະຕູຊ່ວຍໃຫ້ທີມຖະຫລົ່ມ ແມນເຊສເຕີ ຢູໄນເຕັດ 7-0.
ຊາລາ ທຳລາຍສະຖິຕິຂອງ ຣ໊ອບບີ ຟາວເລີ ເປັນນັກເຕະລີເວີພູລທີ່ຍິງປະຕູໃນພຣີເມຍລີກຫລາຍທີ່ສຸດ ໂດຍໄຊຊະນະດັ່ງກ່າວເຮັດໃຫ້ລີເວີພູລຂຶ້ນໄປຢູ່ອັນດັບ 5 ຂອງຕາຕະລາງ ຕາມຫລັງ ສະເປີ ອັນດັບ 4 ພຽງ 3 ຄະແນນ ແຕ່ແຂ່ງຫລາຍກວ່າ 1 ນັດ.
ດາວຍິງອາຍຸ 30 ປີ ຍິງໄປແລ້ວ 129 ປະຕູໃຫ້ ລີເວີພູລ ໃນພຣີເມຍລີກ ນັບຕັ້ງແຕ່ຍ້າຍມາຈາກ ອາແອສ ໂຣມາ ດ້ວຍຄ່າຕົວ 37 ລ້ານປອນ ໃນລະດູການ 2017.
ເມື່ອຖືກຖາມເຖິງການທຳລາຍສະຖິຕິຂອງ ຟາວເລີ ແລະ ວິທີທີ່ລາວຈະສະຫລອງກັບສະຖິຕິດັ່ງກ່າວ ຊາລາ ກ່າວວ່າ : ມັນພິເສດຫລາຍ ຂ້ອຍຕົວະບໍ່ໄດ້.
“ ສະຖິຕິນີ້ຢູ່ໃນຄວາມຄິດຂອງຂ້ອຍຕັ້ງແຕ່ຍ້າຍມາຢູ່ນີ້ ຫລັງຈາກລະດູການທຳອິດ ຂ້ອຍໄລ່ລ່າສະຖິຕິມາໂດຍຕະຫລອດ ການເອົາຊະນະ ແມນຢູ ໃນມື້ນີ້ດ້ວຍຜົນການແຂ່ງຂັນຂັ້ນເຫລືອເຊື່ອຫລາຍ ”.
“ ຂ້ອຍຈະກັບບ້ານໄປສະຫລອງກັບຄອບຄົວ ດື່ມຊາຄາໂມມາຍ ແລ້ວກໍເຂົ້ານອນ ”.
