ບັນຫາການມົ້ວສຸມຢາເສບຕິດຢູ່ຮ້ານບັນເທີງເມືອງຕົ້ນເຜິ້ງ ເຖິງຂັ້ນຊັອກ ແລະ ຖືກນໍາສົ່ງເຂົ້າໂຮງໝໍມື້ລະ 4-5ລາຍ ບາງລາຍເຖິງຂັ້ນເສຍຊີວິດ
ທ່ານ ພັຕ ອິນສົມ ບຸນຍົງ ຫົວໜ້າພະແນກຕຳຫຼວດ ກອງບັນຊາການ ປກສ ເມືອງ ຕົ້ນເຜິ້ງ ລາຍງານ ວັນທີ 2 ມີນາ 2023 ຜ່ານມານີ້ວ່າ: ບັນຫາການມົ້ວສຸມຢາເສບຕິດປະເພດຕ່າງໆ ເຊິ່ງມີຜົນຮ້າຍແຮງຕໍ່ຮ່າງກາຍ ເຖິງຂັ້ນຊັອກ ແລະ ຖືກນໍາສົ່ງເຂົ້າໂຮງໝໍມື້ລະ 4 – 5 ລາຍ ບາງລາຍເຖິງຂັ້ນເສຍຊີວິດ , ບັນຫາການອາລະວາດຕີກັນ, ບັນຫາການເປີດບໍລິການເກີນໂມງເວລາ ແລະ ເປີດເພງດັງເກີນກຳນົດສົ່ງສຽງລົບກວນຊຸມຊົນໃກ້ຄຽງ, ບັນຫາການຈອດລົດບໍ່ເປັນລະບຽບຕາມສອງຂ້າງທາງໜ້າຮ້ານບັນເທີງ, ຮ້ານກິນດື່ມ, ຮ້ານຄາລະໂອເກະ, ຮ້ານອາຫານ ກີດຂວາງການສັນຈອນ ແລະ ສ່ຽງຕໍ່ການເກີດອຸບັດເຫດ ແລະ ອື່ນໆ.
ຈາກການສ່ອງແສງ ແລະ ຊີ້ແຈງຂອງຮ້ານພົບວ່າ ບາງບັນຫາແມ່ນເກີດຈາກຜູ້ໃຊ້ບໍລິການເອງ ແລະ ບາງບັນຫາກໍມາຈາກຜູ້ປະກອບການ ເຊັ່ນ: ບາງຮ້ານຍັງມີການເປີດໃຫ້ມີບ່ອນມົ້ວສຸມຢາເສບຕິດ ເຊິ່ງສະແດງອອກຈາກຫຼັກຖານອຸປະກອນການເສບທີ່ເຈົ້າໜ້າທີ່ຢຶດມາໄດ້ ແລະ ຈາກການສອບສວນຜູ້ເສບທີ່ເຈົ້າໜ້າທີ່ນໍາຕົວມາສອບສວນ, ບາງຮ້ານບໍ່ໃຫ້ການຮ່ວມມືກັບເຈົ້າໜ້າທີ່ເວລາເກີດເຫດຕ່າງໆຢູ່ຮ້ານຂອງຕົນ ເຊັ່ນ ການລົບຂໍ້ມູນພາບໃນກ້ອງວົງຈອນປິດ, ບາງຮ້ານຍັງເປີດບໍລິການເກີນໂມງເວລາເຖິງ 4 – 5 ໂມງເຊົ້າ ທັງມີການມົ້ວສຸມຢາເສບຕິດປະເພດຕ່າງໆ.
ເຈົ້າໜ້າທີ່, ພາກສ່ວນກ່ຽວຂ້ອງ ແລະ ຜູ້ປະກອບການພ້ອມກັນເຊັນຮັບຮູ້ບົດບັນທຶກສະບັບດັ່ງກ່າວ ເພື່ອເປັນເອກະພາບກັນປະຕິບັດຂໍ້ຫ້າມຕ່າງໆ ຄື: ຫ້າມບໍ່ໃຫ້ເຈົ້າຂອງຮ້ານ, ພະນັກງານ ແລະ ລູກຄ້າ ພົວພັນປັນຫາສິ່ງເສບຕິດທຸກປະເພດຢູ່ຮ້ານ ເປັນຕົ້ນແມ່ນ ກະເຟ (ມີສານເສບຕິດ) ເຄຕາມິນ (ຢາເຄ) ໝາກປູມເປົ້າ, ຢາບ້າ, ຢາໄອສ໌ ແລະ ຢາເສບຕິດປະເພດອື່ນໆ ທີ່ຜິດຕໍ່ລະບຽບກົດໝາຍແຫ່ງ ສປປ ລາວ,ຫ້າມບໍ່ໃຫ້ເຈົ້າຂ້ອງຮ້ານ ພະນັກງານ ແລະ ບຸກຄົນອຶ່ນໆຫຍຸ້ງກ່ຽວພົວພັນກັບຢາເສບຕິດເປັນຕົ້ນການຊື້ – ຂາຍ ເສບ, ນຳເຂົ້າ, ສົ່ງອອກ ຫຼື ອໍານວຍຄວາມສະ ດວກໃຫ້ບຸກຄົນອື່ນມົ້ວສຸມຢາເສບຕິດຢູ່ໃນຮ້ານຢ່າງ ເດັດຂາດ, ໃຫ້ເຈົ້າຂອງຮ້ານມີຄວາມຮັບຜິດຊອບຕິດຕາມລູກຄ້າທີ່ມາບໍລິການກິນດື່ມບໍ່ໃຫ້ມີການມົ້ວສຸມສິ່ງເສບຕິດທຸກປະເພດຢູ່ໃນຮ້ານ, ຖ້າພົບເຫັນແມ່ນໃຫ້ແຈ້ງຕໍ່ເຈົ້າໜ້າທີ່ໆກ່ຽວຂ້ອງ,ຖ້າຫາກຮ້ານໃດຫາກຝ່າພື້ນຫຼືບໍ່ປະຕິບັດຕາມບົດບັນທຶກສະບັບນີ້ແມ່ນຈະໄດ້ປະຕິບັດຕາມລະບຽບກົດໜາຍທີ່ໄດ້ກຳນົດໄວ້, ໃຫ້ເຈົ້າຂອງຮ້ານປະຕິບັດເວລາປີດຮ້ານບໍ່ໃຫ້ເກີນເວລາ 11 : 30 ນາທີ, ຖ້າຮ້ານໃດຫາກໃຫ້ລູກຄ້າມົ້ວສຸມຢາເສບຕິດປະເພດຕ່າງໆ ຫຼື ຫຼິ້ນກິນເກີນຂອບເຂດ, ເຮັດໃຫ້ລູກຄ້າ ຊັອກ ຫຼື ເສຍຊີວິດ, ຈະໄດ້ຮັບຜິດຊອບຕໍ່ເຫດການດັ່ງກ່າວ ແລະ ຈະຖືກດຳເນີນຄະດີຕາມລະບຽບກົດໝາຍ.
