ການຈົດທະບຽນການເກີດ ຜ່ານລະບົບ eCRVS ຈະພັດທະນາໃຫ້ສາມາດຈົດຜ່ານອອນລາຍເທິງມືຖືໄດ້
ທ່ານ ປອ ທອງຈັນ ມະນີໄຊ ລັດຖະມົນຕີກະຊວງພາຍໃນ ໄດ້ມີຄໍາເຫັນກ່າວເປີດບັ້ນການຈົດທະບຽນການເກີດ ຜ່ານລະບົບຄຸ້ມຄອງຂໍ້ມູນພົນລະເມືອງ ເອເລັກໂຕຣນິກ eCRVS ວັນທີ 28 ກຸມພາ 2023 ຜ່ານມານີ້ວ່າ: ລະບົບຄຸ້ມຄອງພົນລະເມືອງ ເອເລັກໂຕຣນິກ ນີ້ ຈະຕອບສະໜອງ ແລະ ອໍານວຍຄວາມສະດວກໃຫ້ແກ່ການຄຸ້ມຄອງ, ນໍາໃຊ້, ປົກປັກຮັກສາ ແລະ ຄົ້ນຫາຂໍ້ມູນຂອງພົນລະ ເມືອງ ສະດວກ ແລະ ວ່ອງໄວ, ວິເຄາະ ວິໄຈ ສະຖິຕິພົນລະເມືອງ ເພື່ອວາງແຜນພັດທະນາເສດຖະກິດ-ສັງຄົມຂອງລັດຖະບານ ແລະ ເປົ້າໝາຍຕົວຊີ້ບອກແຜນພັດທະນາຍຶນຍົງ, ຖະແຫຼງການ ແລະ ຂໍ້ຕົກລົງຕ່າງໆ ຊຶ່ງລັດຖະບານໄດ້ຮ່ວມລົງນາມ.
ກະຊວງພາຍໃນ ໄດ້ລິເລີ່ມພັດທະນາລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກ eCRVS ຕັ້ງແຕ່ປີ 2017 ແລະ ທົດລອງນໍາໃຊ້ຢູ່ 3 ແຂວງ ຄື: ນະຄອນຫຼວງວຽງຈັນ, ແຂວງຫຼວງພະບາງ ແລະ ແຂວງຈໍາປາສັກ ມີ 31 ເມືອງ. ລະບົບດັ່ງກ່າວເປັນລະບົບການໃຫ້ບໍລິການຈົດທະບຽນການເກີດ, ການເສຍຊິີວິດ, ການແຕ່ງດອງ, ການຢ່າຮ້າງ ແລະ ອື່ນໆ ຕາມທີ່ໄດ້ກໍານົດໄວ້ໃນ ກົດໝາຍວ່າດ້ວຍທະບຽນຄອບຄົວ ສໍາເລັດເບື້ອງຕົ້ນ.
ເພື່ອໃຫ້ລະບົບທັນສະໄໝ ແລະ ໄດ້ມາດຕະຖານສາກົນ ກະຊວງພາຍໃນ ໄດ້ພັດທະນາໃຫ້ສາມາດບໍລິການຈົດທະບຽນ ແບບອອນລາຍ ແລະ ອອບລາຍ ຜ່ານຄອມພິວເຕີ ແລະ ໂທລະສັບມືຖື ທີ່ສາມາດເຊື່ອມຕໍ່ຂໍ້ມູນຈາກຫ້ອງການພາຍໃນເມືອງ ຫາ ຂັ້ນສູນກາງ ແລະ ຂະແໜງການທີ່ກ່ຽວຂ້ອງກັບການແຈ້ງເກີດ ເປັນຕົ້ນ: ສາທາລະນະສຸກ ຫາ ພາຍໃນ, ພາຍໃນ ຫາ ປກສ ແລະ ຂະແໜງການອື່ນໆທີ່ກ່ຽວຂ້ອງ. ລະບົບດັ່ງກ່າວ ຍັງສາມາດສ້າງການລາຍງານສະຖິຕິພົນລະເມືອງ ປະຈໍາວັນ, ປະຈໍາເດືອນ ແລະ ປະຈໍາປີ ດ້ວຍຫຼາຍຮູບແບບ ເຮັດໃຫ້ມີຄວາມສະດວກ, ວ່ອງໄວ ແລະ ທັນສະໄໝ. ນອກນັ້ນ, ຍັງມີປ່ອງບໍລິການ ເພື່ອໃຫ້ປະຊາຊົນ ສາມາດສະເໜີຄໍາຄິດຄໍາເຫັນຕໍ່ການບໍລິການ ການຈົດທະບຽນພົນລະເມືອງຂອງພາກລັດ ແບບອອນລາຍ ນໍາອີກ.
ຮັບປະກັນຄາດໝາຍສູ້ຊົນຂອງ ລັດຖະບານ ສປປ ລາວ ທີ່ໄດ້ກໍານົດໄວ້ ຮອດປີ 2024 ສປປ ລາວ ຈະສູ້ຊົນໃຫ້ພົນລະເມືອງ ແລະ ເດັກເກີດໃໝ່ໃຫ້ໄດ້ຮັບການຈົດທະບຽນ ແລະ ມີໃບຢັ້ງຢືນການເກີດ ເປັນທາງການຢ່າງໜ້ອຍໃຫ້ໄດ້ 70%.
