ຟີມີໂນ ບໍ່ຕໍ່ສັນຍາ ລີເວີພູລ ກຽມອຳລາທີມຫລັງຈົບລະດູການນີ້

ສື່ຊື່ດັງລາຍງານວ່າ ໂຣແບໂຕ ຟີມີໂນ ກອງໜ້າ ລີເວີພູລ ໄດ້ແຈ້ງກັບ ເຈີເກັນ ຄລອບ ໄດ້ຮູ້ແລ້ວວ່າ ລາວຈະຍ້າຍອອກຈາກ ລີເວີພູລ ຫລັງຫມົດສັນຍາລະດູການນີ້.

ໂດຍ ຟີມີໂນ ຍ້າຍຈາກ ຮອຟເຟັນໄຮ ມາຢູ່ກັບ ລີເວີພູລ ເມື່ອປີ 2015 ເຊິ່ງລາວກໍເປັນກຳລັງສຳຄັນໃນການພາທີມຄວ້າແຊ໊ມມາຄອງທັງ ພຣີເມຍລີກ ອັງກິດ, ເອຟເອ ຄັບ, ຄາຣາບາວ ຄັບ, ຢູຟາ ແຊ໊ມປຽນ ລີກ, ຢູຟາ ຊຸບເປີ ຄັບ ແລະ ຟີຟາ ຄລັບ ເວີນຄັບ.

ສ່ວນຜົນງານສ່ວນຕົວຂອງດາວເຕະອາຍຸ 31 ປີ ລາວຍິງໄດ້ 107 ປະຕູ 78 ແອສຊິສ ຈາກການລົງສະໜາມ 352 ນັດລວມທຸກລາຍການ, ສຳລັບລະດູການນີ້ລາວຍິງໄປແລ້ວ 9 ປະຕູ ກັບ 4 ແອສຊິສ ຈາກການລົງສະໜາມ 25 ນັດ ລວມທຸກລາຍການ.

ແນວໃດກໍຕາມ ຟີມີໂນ ພວມຈະຫມົດສັນຍາກັບ ລີເວີພູລ ຫລັງຈົບລະດູການນີ້ ເຊິ່ງກ່ອນໜ້ານີ້ມີລາຍງານວ່າ ຄລອບ ຕ້ອງການໃຫ້ນັກເຕະລາຍນີ້ຢູ່ກັບທີມຕໍ່ໄປ.

ຫລ້າສຸດ  ຟລໍຣຽນ ເພລດເທນເບີກ ນັກຂ່າວຊື່ດັງຂອງ ສະກາຍ ສະປອດ ເປີດເຜີຍວ່າ ຟີມີໂນ ໄດ້ແຈ້ງກັບ ຄລອບ ເປັນການສ່ວນຕົວແລ້ວວ່າ ລາວຈະບໍ່ຕໍ່ສັນຍາ ແລະ ຈະຍ້າຍອອກຈາກສະໂມສອນແບບບໍ່ມີຄ່າຕົວໃນລະດູການນີ້.