ນຳເຂົ້າສິນຄ້າອີເລັກໂຕຣນິກ ຕ້ອງມີໃບຢັ້ງຢືນມາດຕະຖານເຕັກນິກ ຫາກບໍ່ມີບໍ່ອະນຸຍາດໃຫ້ນໍາເຂົ້າ ສປປ ລາວ ຢ່າງເດັດຂາດ
March 3, 2023 - 2:10 PM
ວັນທີ 13 ກຸມພາ 2023 ຜ່ານມານີ້ ກົມພາສີ ອອກແຈ້ງການເຖິງ ຫົວຫນ້າພາສີປະຈໍາແຂວງ, ນະຄອນຫຼວງ ແລະ ຫົວໜ້າດ່ານພາສີສາກົນໃນຂອບເຂດທົ່ວປະເທດໃຫ້ເອົາໃຈໃສ່ໃນການຄຸ້ມຄອງ, ກວດກາໃບຢັ້ງຢືນມາດຕະຖານເຕັກນິກສໍາລັບອຸປະກອນໂທລະຄົມມະນາຄົມ ແລະ ໄອຊີທີ (ICT) ຕາມຂໍ້ຕົກລົງວ່າດ້ວຍການຄຸ້ມຄອງອຸປະກອນໂທລະຄົມມະນາຄົມ ແລະ ໄອຊີທີ (ICT) ຂອງກະຊວງເຕັກໂນໂລຊີ ແລະ ການສື່ສານສະບັບເລກທີ 3583/ກຕສ, ລົງວັນທີ 13 ທັນວາ 2022 (ລາຍການສິນຄ້າ, ເຄື່ອງຂອງລະອຽດຕາມເອກະສານຊ້ອນ 5 ແລະ ເອກະສານຊ້ອນທ້າຍ 6 ຢ່າງເຂັ້ມງວດ.
ລາຍການສິນຄ້າ, ເຄື່ອງຂອງດັ່ງກ່າວ ຕ້ອງມີໃບຢັ້ງຢືນມາດຕະຖານເຕັກນິກຈາກກົມຄື້ນຄວາມຖີ່ວິທະຍຸສື່ສານ (ກະຊວງ ເຕັກໂນໂລຊີ ແລະ ການສື່ສານ) ເສຍກ່ອນ ຈຶ່ງສາມາດປະກອນໃບແຈ້ງພາສີເປັນລາຍລະອຽດຕາມລະບຽບການ ໄດ້. ຖ້າບໍ່ມີໃບຢັ້ງຢືນມາດຕະຖານເຕັກນິກຈາກກົມຄື້ນຄວາມຖີ່ວິທະຍຸສື່ສານ ແມ່ນບໍ່ອະນຸຍາດໃຫ້ນໍາເຂົ້າ ສປປ ລາວ ຢ່າງເດັດຂາດ.
