ອີກ 12 ປີ ຫລື ພາຍໃນປີ 2035 ຍອດຂາຍ “ລົດຍົນ EV” ທົ່ວໂລກ ຈະຂຶ້ນມາຄອງສ່ວນແບ່ງທາງການຕະຫລາດເຖິງ 50%
ການນໍາໃຊ້ລົດຍົນໄຟຟ້າທົ່ວໂລກມີທ່າອ່ຽງເຕີບໃຫຍ່ຢ່າງວ່ອງໄວ ສ່ວນໜຶ່ງເປັນຍ້ອນກະແສທົ່ວໂລກກໍາລັງມຸ້ງສູ່ເປົ້າໝາຍການເປັນກາງທາງກາດບອນ (Carbon Neutrality) ແລະ ການປ່ອຍແກັສເຮືອນແກ້ວເປັນສູນ (Net Zero Emissions) ໂດຍ Goldman Sachs ຄາດຄະເນວ່າ: ພາຍໃນປີ 2035 ລົດຍົນໄຟຟ້າຈະມີອັດຕາສ່ວນປະມານ 50% ຂອງຍອດຂາຍລົດຍົນໃໝ່ທົ່ວໂລກ.
ເຖິງວ່າອຸດສາຫະກໍາລົດຍົນໄຟຟ້າກໍາລັງຜະເຊີນຄວາມທ້າທາຍຫລາຍປະການເຊັ່ນ: ຄ່າໄຟຟ້າ ແລະ ສ່ວນປະກອບຂອງແບັດເຕີຣີລົດຍົນທີ່ສູງຂຶ້ນ ລວມທັງກົດໝາຍປັບຫລຸດເງິນເຟີ້ (Inflation Reduction Act: IRA). ເຖິງຢ່າງໃດກໍຕາມ, ນັກກົນລະຍຸດຂອງ Goldman Sachs Research ຄາດຄະເນວ່າ: ຄວາມກ້າວໜ້າທາງເຕັກໂນໂລຊີຈະສາມາດເອົາຊະນະບັນຫາເຫລົ່ານີ້ໄດ້ໃນອະນາຄົດ.
Goldman Sachs Research ຄາດຄະເນວ່າ: ຍອດຂາຍລົດຍົນໄຟຟ້າຈະເພີ່ມຂຶ້ນຫລາຍຈາກປະມານ 2 ລ້ານຄັນໃນປີ 2020 ເປັນປະມານ 73 ລ້ານຄັນໃນປີ 20240 ໃນຊ່ວງເວລານີ້ລົດຍົນໄຟຟ້າຄາດວ່າຈະມີອັດຕາສ່ວນເພີ່ມຂຶ້ນຈາກ 2% ເປັນ 61% ຂອງຍອດຂາຍລົດຍົນໃໝ່ທົ່ວໂລກ ໂດຍຈະມີຍອດຂາຍລົດຍົນໄຟຟ້າຫລາຍກວ່າ 80% ໃນປະເທດທີ່ພັດທະນາແລ້ວຫລາຍປະເທດ.
Kota Yuzawa ນັກກົນລະຍຸດດ້ານການວິໄຈສານທຶນຂອງ Goldman Sachs ຄາດຄະເນວ່າ: ອຸດສາຫະກຳລົດຍົນຈະຜ່ານການປ່ຽນແປງຄັ້ງໃຫຍ່ລະຫວ່າງປີ 2020-2030 ເນື່ອງຈາກການໃຊ້ລົດຍົນໄຟຟ້າ ແລະ ເຕັກໂນໂລຊີໄຮ້ຄົນຂັບທີ່ເພີ່ມຂຶ້ນ ໂດຍລົດຍົນໄຟຟ້າຈະໄດ້ຮັບຄວາມນິຍົມເພີ່ມຂຶ້ນຢ່າງຕໍ່ເນື່ອງ ເນື່ອງຈາກກົດລະບຽບດ້ານສິ່ງແວດລ້ອມທີ່ເຂັ້ມງວດຂຶ້ນ ແລະ ຄວາມກ້າວໜ້າຂອງເຕັກໂນໂລຊີການໃຊ້ພະລັງງານໄຟຟ້າ.
ແລະ ເມື່ອລະບົບນິເວດລົດຍົນໄຟຟ້າເຕີບໃຫຍ່ຂຶ້ນ ຈະສົ່ງຜົນໃຫ້ແຫລ່ງທີ່ມາຂອງກໍາໄລໃນກຸ່ມອຸດສາຫະກໍາລົດຍົນປ່ຽນແປງຈໍານວນຫລາຍ ພວກເຂົາເຊື່ອວ່າຍອດຂາຍລົດຍົນໄຟຟ້າຈະເຕີບໃຫຍ່ 32% ຕໍ່ປີໃນອີກ 10 ປີຕໍ່ໜ້າ ເຖິງວ່າຍອດຂາຍຜະລິດຕະພັນທີ່ກ່ຽວຂ້ອງກັບເຄື່ອງຈັກແອັດຊັງຈະຕົກຕໍ່າກໍຕາມ.
ໂດຍຄາດວ່າຜົນກໍາໄລຈາກການດໍາເນີນງານຂອງອຸດສາຫະກໍາລົດຍົນທົ່ວໂລກຈະເຕີບໃຫຍ່ຂຶ້ນເປັນ 4,18 ແສນລ້ານໂດລາສະຫະລັດໃນປີ 2030 ເພີ່ມຂຶ້ນຈາກ 3,15 ແສນລ້ານໂດລາໃນປີ 2020. ຂະນະທີ່ຜົນກໍາໄລລວມສໍາລັບລົດຍົນໄຟຟ້າຄາດວ່າຈະເພີ່ມຂຶ້ນເປັນ 1,10 ແສນລ້ານໂດລາຈາກ 1 ພັນລ້ານໂດລາ.
ຂະນະດຽວກັນຕົ້ນທຶນຂອງແບັດເຕີຣີລົດຍົນໄຟຟ້າມີອັດຕາສ່ວນສູງເຖິງ 40% ຂອງຕົ້ນທຶນໂດຍລວມຂອງລົດຍົນ ແລະ ຕະຫລາດສໍາລັບແບັດເຕີຣີເຫລົ່ານີ້ມີການແຂ່ງຂັນທີ່ເຂັ້ມງວດຂຶ້ນ. ໃນປີ 2020 ຜູ້ຜະລິດແບັດເຕີຣີລົດຍົນໄຟຟ້າລາຍໃຫຍ່ຂອງໂລກ 5 ອັນດັບທໍາອິດມີສ່ວນແບ່ງຕະຫລາດທົ່ວໂລກຫລາຍກວ່າ 80% ທຽບໃສ່ຜູ້ຜະລິດລົດຍົນ 5 ອັນດັບທໍາອິດທີ່ມີສ່ວນແບ່ງຕະຫລາດທົ່ວໂລກປະມານ 40%. ປັດຈຸບັນຜູ້ຜະລິດແບັດເຕີຣີມີອໍານາດໃນການກໍານົດລາຄາເພີ່ມຂຶ້ນ ເຊິ່ງເຮັດໃຫ້ບັນດາຜູ້ຜະລິດແບັດເຕີຣີໄດ້ປຽບໃນການສ້າງລາຍໄດ້ທີ່ສູງຂຶ້ນ ເພື່ອສ້າງສົມດູນນີ້ ຜູ້ຜະລິດລົດຍົນຕ່າງພະຍາຍາມພັດທະນາການຜະລິດແບບບູລະນາການໃນແນວດິ່ງ (Vertical Integration) ແລະ ສ້າງໂຮງງານຮ່ວມທຶນເພື່ອໃຫ້ມີອິດສະຫລະເພີ່ມຂຶ້ນໃນການຜະລິດແບັດເຕີຣີ.
