ອິນໂດເນເຊຍເດີນໜ້າສ້າງນິຄົມອຸດສາຫະກຳ ສໍາລັບແບັດເຕີຣີລົດຍົນໄຟຟ້າ

ປະທານາທິບໍດີ ໂຈໂກ ວິໂດໂດ ຜູ້ນໍາອິນໂດເນເຊຍ ເປີດເຜີຍໃນວັນທີ 28 ກຸມພາວ່າ: ອິນໂດເນເຊຍກໍາລັງກໍ່ສ້າງນິຄົມອຸດສາຫະກໍາຂະໜາດ 16.400 ເຮັກຕາ ຢູ່ເກາະກາລິມັນຕັນ ສໍາລັບກຸ່ມຜູ້ຜະລິດແບັດເຕີຣີລົດຍົນໄຟຟ້າເປັນຫລັກ.

ປະທານາທິບໍດີ ວິໂດໂດ ກ່າວໃນເວລາຢ້ຽມຢາມນິຄົມອຸດສາຫະກໍາໃນເຂດບູລູງັນ ແຂວງກາລິມັນຕັນເໜືອວ່າ: ນິຄົມແຫ່ງນີ້ຈະເປັນນິຄົມອຸດສາຫະກໍາທີ່ເປັນມິດຕໍ່ສິ່ງແວດລ້ອມຂະໜາດໃຫຍ່ທີ່ສຸດໃນໂລກ ແລະ ເປັນອະນາຄົດຂອງອິນໂດເນເຊຍ.

ປັດຈຸບັນອິນໂດເນເຊຍກໍາລັງເດີນໜ້າສົ່ງເສີມລະບົບນິເວດລົດຍົນໄຟຟ້າ ແລະ ການປ່ຽນຜ່ານສູ່ພະລັງງານທີ່ເປັນມິດຕໍ່ສິ່ງແວດລ້ອມ ໂດຍພະຍາຍາມດຶງດູດກຸ່ມນັກລົງທຶນອຸດສາຫະກໍາລົດຍົນໄຟຟ້າ ໃນຖານະໜຶ່ງໃນຜູ້ຜະລິດແຮ່ນິກເກິລລາຍໃຫຍ່ທີ່ສຸດຂອງໂລກ ອັນເປັນສ່ວນປະກອບຫລັກຂອງແບັດເຕີຣີລົດຍົນໄຟຟ້າ.

ປະທານາທິບໍດີ ວິໂດໂດ ເປີດເຜີຍວ່າ: ນິຄົມອຸດສາຫະກໍາ ເຊິ່ງມີກໍານົດເລີ່ມດໍາເນີນການຊ່ວງຕົ້ນປີ 2024 ຈະໃຊ້ເຕັກໂນໂລຊີທີ່ເປັນມິດຕໍ່ສິ່ງແວດລ້ອມຢ່າງເຕັມຮູບແບບ ນັບແຕ່ການໃຊ້ໂຮງໄຟຟ້າພະລັງງານນໍ້າທີ່ເປັນມິດຕໍ່ສິ່ງແວດລ້ອມໄປຈົນເຖິງການຜະລິດຜະລິດຕະພັນທີ່ເປັນມິດຕໍ່ສິ່ງແວດລ້ອມເຊັ່ນ: ແບັດເຕີລີລົດຍົນໄຟຟ້າ ອີກທັງຈະມີການຕັ້ງໂຮງງານປິໂຕຣເຄມີ ແລະ ໂຮງງານຜະລິດອາລູມີນຽມໃນນິຄົມດັ່ງກ່າວນໍາອີກ. ພ້ອມກ່າວເຊື້ອເຊີນນັກລົງທຶນທຸກຄົນທີ່ສົນໃຈຜະລິດຕະພັນທີ່ເປັນມິດຕໍ່ສິ່ງແວດລ້ອມມາລົງທຶນໃນປະເທດພາຍໃຕ້ແນວຄິດອຸດສາຫະກໍາທີ່ເປັນມິດຕໍ່ສິ່ງແວດລ້ອມ.